2 PETRUS 1:12 - KITTA' MATANGKASA'

¹² Lanri kammanami anjo natuli kupakaingakko ri yangasenna anjo passalaka, manna pole nanuassemmo siagang manna pole nanutappa' tojeng-tojemmo mae ri anjo biritta nutarimaya battu ri Allata'ala.

2 PETRUS 1:12 ပူးပေါင်းရင်းမြစ်များ

LAMPA-LAMPANA 16:5

Jari pila' jarre'mi tappa'na anjo jamaah-jama'aka, siagang pila' mange allo pila' katambammi jaina ke'nanga.

FILIPI 3:1

Jari, sari'battangku ngaseng, paralluko marannu lanri asse're mako siagang Batara. Tena nabattala' kusa'ring ampau poleangi apa le'baka kutulisi' mae ri kau riolo; nasaba' anjo bajiki untu' kasalamakkannu.

KOLOSE 1:5

Tappa' mako siagang mangngamaseang mako, nasaba' nurannuammi apa Napasadiaya Allata'ala ri suruga untu' ikau. Le'ba'mi nulangngere' anjo kabaraka, ri wattunna nipabattu Kabara' Baji' tojenga battua ri Allata'ala mae ri kau.

KOLOSE 2:7

siagang anna'gala' majarre' mako mae ri Ia. Parallui nubangung katallassannu lalang ri Isa Almasi, sanrapanga batu majarre'. Parallui pila' majarre' tappa'nu mae ri Isa situru' apa le'baka nipangngajarrang mae ri kau. Siagang paralluko tamalanrea appala' sukkuru'.

1 TIMOTIUS 4:6

Punna nupangngajarrang baji'mo yangasenna anjo mae ri parannu tau tappa', a'jari palayanNa mako Isa Almasi, siagang nugaukang baji'mi jama-jamannu. Siagang parallui pila' nupattimbo pa'mai'nu siagang kana nipatappaka battu ri Allata'ala, siagang pangngajarang katojengang nupinawangamo siapa sallona ri kamma-kammaya anne.

2 TIMOTIUS 1:6

Lanri kammana kupappiu'rangiangi mae ri kau sollanna nupattimbo anjo passare malammoro'Na Allata'ala mae ri kau ri wattunna kupatompang limangku irateanganna ulunnu.

IBRANI 10:32

U'rangi antekamma lampa-lampana katallassannu ngaseng ri wattu allaloa. Anjo wattua, ri wattunnu Nasiori cayaNa Allata'ala, teai sipato' jaina pa'risi'nu; mingka tuli majarrekko attahang siagang akkareso.

IBRANI 13:9

Teako sarei kasampatang ajarang mara'-maraenga ampakalinguko. Musti nipakajarreki atinta lanri kabajikang pa'mai'Na Allata'ala; iaminjo bajika mae ri katte; jari teai paratorang-paratoranna agamaya ri passala'na kanre-kanreanga. Sikamma tu rioloa, anturukiai anjo paratorang-paratoranga, tena ngaseng nagappai matu-matunna.

1 PETRUS 5:10

Mingka punna le'ba' mako sessa sinampe', KalenNa Allata'ala lampa'jari sukkukko. LaNapaentengko, siagang laNasareko kagassingang kammayatompa laNapakajarrekko. Nasaba' Iami Allata'ala sannaka baji'na pa'mai'Na; Iami le'baka angkiokko untu' angkasia' tongi kala'birang mannannunganga tete ri Almasi.

1 PETRUS 5:12

I Silas ambantua' nakupare' anne sura' bodoa bonena. Kubilangi Silas tu Karisteng tamamminraya. Erokka' ampakamajuko siagang ampakajarreki tappa'nu angkanaya anne apa kutulisika biritta kammatojeng ri sesena passare lammoro'Na Allata'ala. Paralluko anna'gala' jarre' mae ri anjo passare malammoroka.

2 PETRUS 1:13

Genteng ri tallasakku ija, paralluko kupakaingakkang yangasenna anjo passalaka.

2 PETRUS 1:15

Jari lakuusahai sollanna manna pole matema', tuli lanuu'ranginna ammotere' yangasenna anne passalaka.

2 PETRUS 3:1

Sikamma sari'battangku sannaka kukarimangnginna! Iaminne surakku makaruaya mae ri kau. Lalang ri anjo surakku ruaya, kuusahakammi ampabangungi pikkirang-pikkirang annabaya lalang ri kalennu.

2 PETRUS 3:17

Mingka ikau sikamma sari'battangku sannaka kukamaseanna, nuasseng ngasemmi anne passalaka. Lanri kammana, tutu laloko, gassingka katuru'-turukangko mae ri kalinguanna anjo tau tenaya naassengi atoranga sa'gennu tu'guru' battu ri pammantangang amanga.

1 YOHANES 2:21

Jari kutulisiki anne suraka mae ri kau ngaseng teai lanri tenanapa nanuassengi pangngajarang tojenga, mingka ba'lalo lanri nuassennamo; siagang nuassenna tommo angkanaya anjo pangngajarang tojenga tale'bakai a'balle-balle.

2 YOHANES 1:2

Nasaba' niaki Allata'ala matojenga ammantang lalang ri atinta, siagang latuli niaki anrurungangki' sa'genna satunggu-tungguna.

YUDAS 1:17

Mingka sikamma sari'battangku sannaka kukarimangnginna, u'rangi apa-apa le'baka napau sikamma tunisuroNa Batara Isa Almasi pirangalloang.

YUDAS 1:3

Sikamma sari'battangku sannaka kukarimangnginna! Sanna' dudu erokku annulisi' sura' mae ri kau ngaseng ri passala'na kasalamakkang nitarimayamo. Mingka kamma-kamma anne erokka' kusa'ring ampakaingakko lalang ri anne suraka, sollannu barjuang turus untu' katappakkanta; anjo katappakkanga sikaliji Napassareang Allata'ala sa'genna satunggu-tungguna mae ri Umma'Na.

YUDAS 1:5

Yangasenna anjo nuasseng ngasemmi. Mingka, erokko kupakainga' ri passala' antekamma bateNa Batara ampasalamaki umma' Israel battu ri butta Mesir; mingka ribokoanganna Nabunoi sikamma tau tenaya natappa' ri alla'na ke'nanga.