2 PATTOTTORANG 7:10 - KITTA' MATANGKASA'

¹⁰ nampa ammukona ri tanggala' 23 bulang 7, nasuromi Salomo ammotere' anjo taua. Rannu kabusuki taua mae ri anjo sikontu kabajikang Nagaukanga Batara mae ri bansa Israel umma'Na, mae ri Daud, kammayatompa mae ri Salomo.

2 PATTOTTORANG 7:10 ပူးပေါင်းရင်းမြစ်များ

1 KARAENG-KARAENG 8:66

Ri allo makasagantujuna, nasuromi Salomo taua ammotere'. Yangasenna ke'nanga mammujimi ri ia, nampa ammotere' mange ri balla'na ke'nanga siagang rannu pa'mai', lanri yangasenna anjo barakka' Napassareanga Batara mae ri atanNa Daud siagang mae ri umma'Na bansa Israel.

2 PATTOTTORANG 29:36

Sannammi pa'mai'na Karaeng Hizkia siagang ra'yaka lanri lalang wattu sinampekang le'ba'mi nibantu ke'nanga ri Allata'ala untu' anggaukang kabusuki anjo sikammaya.

2 PATTOTTORANG 30:26

Sanna' suara'na kota Yerusalem, lanri baku'na jammang ammarentana Salomo ana'na Daud, tena le'bakai kajariang anjo gau' kammaya.

2 PATTOTTORANG 6:41

Ammenteng maKi' nai' kamma-kamma anne, o Karaeng Allata'ala! Kammayatompa antama' maKi' anrinni ri anne BallatTa siagang anjo Patti Parjanjiang pammatei kakoasanTa na Kiammantang anrinni sa'genna satunggu-tungguna. Kibarakkaki laloi sikontu jama-jamanna imang-imanTa, siagang dasi-dasi namate'ne sikontu ummatTa lanri bajitTa mae ri ke'nanga.

2 PATTOTTORANG 7:11

Le'baki napa'jari jama-jamanna Salomo untu' ambangungi Balla'Na Batara siagang balla' karaenga situru' rancanana,

2 PATTOTTORANG 7:9

Tuju alloi ke'nanga a'rappung untu' upacara niresmikanna tampa' pakkoro'bangnganNa Batara, nampa tuju allo pole untu' ansuarri Allo Lompo Pa'ballakang Leko'-lekoka. Ri allo kala'busanna nigaukammi kasuarrang pannongko'na anjo upacaraya,

NEHEMIA 8:10

Kamma-kamma anne ammotere' mako; angnganre angnginung mako a'rannu-rannu. Passareangi sipa'gang kanrenu siagang anggoro'nu mae ri tau kakuranganga. Anne alloa, allo nipakatangkasa' untu' Batara, jari teako susai. Karannuang Napassareanga Batara lampakajarrekko.”

PAMMUJI 100:2

Gaukangi ibadanu mae ri Batara siagang rannu, battuko mandallekang ri Ia siagang kelong ma'reja-reja!

PAMMUJI 105:3

Iami Batara Kaminang Matangkasaka; rannu mako saba' Ia ampatangki' sikontu anynyombaya siratang rannu.

PAMMUJI 106:5

Poro kucini' tollalo kacopponganna tunipileTa siagang a'rannu-rannu siagang ummatTa. Poro lompo todong pa'maikku siagang rannu siagang sikamma tua'jaria Kipatang.

PAMMUJI 32:11

He, sikamma tu bajika, rannu mako siagang ma'reja-reja mako lanri apa le'baka Nagaukang Batara. Akkio' rannu mako, he sikontu tu lambusu' pa'maika!

PAMMUJI 92:4

angngo'bi' gitar sampuloa otere'na, nirurungang ri gambusu' siagang kacapi.

KALAPPASSANG 18:1

Yitro, matoanna Musa, imang Midian, nalangngereki kabara'na sikontu apa le'baka Nagaukang Allata'ala untu' Musa siagang bansa Israel, ri wattunna napimping ke'nanga assulu' battu ri pa'rasangang Mesir.

YEHEZKIEL 45:25

Ri passua'-suarrang allo lompo Pa'ballakang Leko'-leko', ia nipakaramulaya ri tanggala' sampulo allima bulang tuju, tunggala' allo lalang tuju allo sikamma patugasaka musti assarei koro'bang sangkamma, iamintu koro'bang pammopporang dosa, koro'bang nitunu, koro'bang gandung siagang minynya' zaitun.”

LAMPA-LAMPANA 16:34

Le'baki anjo nierammi Paulus siagang Silas mange ri balla'na anjo kapala tarungkua nampa nitoana siagang nisare kanre ke'nanga. Sannang sikalimi anjo kapala tarungkua siagang sikontu tau niaka ri balla'na, lanri tappa'mi ke'nanga ri Allata'ala.

LAMPA-LAMPANA 2:46

Allo-allona ke'nanga tuli a'rappungang ri Balla'Na Batara; kammayatompa a'le'ba'-le'basaki ke'nanga assama-sama angnganre ri balla'na. Na rannu pa'mai' siagang tuna pa'mai' ngasengi ke'nanga.

PAOLE 12:12

A'rannu-rannuko ri dallekanNa Karaeng Allata'alanu, siagang sikamma ana'-ana'nu, ata-atannu siagang sikamma tu Lewi ammantanga ri kota-kotanu, lanri anjo tu Lewi tena nanggappa pambageang butta ri pa'rasangannu.

PAOLE 12:18

Ikau siagang ana'-ana'nu, kammayatompa sikamma ata-atannu, siagang tu Lewi ammantanga ri kotanu, musti nakanrei anjo passarea ri dallekanNa Karaeng Allata'alanu, ri tampa' Napilea Karaeng Allata'alanu. Siagang anjoreng mako ri anjo tampaka musti a'rannu-rannu lanri sikontu wassele' usahanu.

PAOLE 12:7

Anjoreng tommi, ri dallekanNa Karaeng Allata'alanu, ikau ngaseng siagang sikamma kaluarganu musti angnganre siagang a'rannu-rannu lanri nugappana wassele' usahanu lanri nibarakkakinna ri Karaeng Allata'alanu.

PAOLE 16:11

A'rannu-rannuko ri dallekanNa Karaeng Allata'alanu, ri anjo tampa' le'baka Napattantu, siagang ngaseng ana'-ana'nu, ata-atannu, kammayatompa tu Lewi, tubattu-battua, ana'-ana' kukanga siagang sikamma janda niaka ammantang ri kota-kotanu.

PAOLE 16:14

A'rannu-rannu mako siagang ana'-ana'nu, ata-atannu, tu Lewi, tubattu-battua, ana'-ana' kukanga siagang sikamma janda niaka ammantang ri kota-kotanu.

FILIPI 4:4

Poro tuli rannu ngasengi pa'mai'nu, lanri le'ba'numo asse're siagang Batara. Sikalipi pole kukana: rannu mako!