2 PATTOTTORANG 5:11 - KITTA' MATANGKASA'

^11-14 Sikontu imang niaka anjoreng, battu ri sikontu kalompoka, le'ba' kabusu'mi napasadia kalenna untu' anggaukangi anjo upacaraya. Sikontu pakelonga siagang pakarena musika lalang ri suku Lewi, iamintu Asaf, Heman, Yedutun siagang sikontu anggota lokoang bijanna ke'nanga, ammakei pakeang kaeng lenang. Anjo tu Lewia ammentengi ri rayanganna tampa' pakkoro'bangnganga anna'gala' gambusu' siagang kacaping. Nia' naagang ke'nanga 120 tau imang patui' tarompe'. Kelonna pakelonga nipasiallei siagang sa'ra musi' tarompe', gambusu' siagang pakkakasa' musi' maraengannaya. Kammaminne kana-kana pammuji nakelonganga ke'nanga untu' Batara: “Pujimi Batara, lanri baji'Na, Mangngamaseangi satunggu-tungguna.” Ri wattunna assulu' sikamma imanga battu ri anjo Balla'Na Batara, ti'ring rassimi anjo Ballaka siagang caya kahaderanNa Batara, sa'genna takkulleamo ke'nanga ampannarrusuki upacara panynyombanga.

2 PATTOTTORANG 5:11 ပူးပေါင်းရင်းမြစ်များ

1 PATTOTTORANG 15:14

Jari natangkasimi kalenna sikamma imanga siagang tu Lewia, sollanna akkulle napalette' Patti ParjanjianNa Batara, iamintu Allata'alana Israel.

2 PATTOTTORANG 29:15

Nampa napasse're ke'nanga tu Lewi maraengannaya, nampa natangkasi ngaseng kalenna ke'nanga. Le'baki anjo, situru' parentana karaenga, antama'mi sikamma imanga ri Balla'Na Batara siagang appakkaramula natangkasi situru' hukkung-hukkunNa Batara. Sikontu apa ra'masaka nierangi assulukang ri parang lakkenna Balla'Na Batara. Battu anjoreng naerangi tu Lewi mange ri Ka'bung Lappara' Kidron ri pantaranna kotaya.

2 PATTOTTORANG 29:34

Imang-imang le'baka nitangkasi sike'de'ji tau untu' ampasuluki kukkulu'na sikontu anjo olo'-oloka. Lanri kammana anjo nibantumi ke'nanga ri tu Lewi, iamintu tu Lewi majarreka anna'gala' ri paratorang katangkasanga. Ambantumi ke'nanga sa'genna angganna' narapi' paganna'na imang le'baka antangkasi kalenna.

2 PATTOTTORANG 29:5

nampa a'bicara mae ri ke'nanga anjoreng. Nakana ri ke'nanga, “Ikau ngaseng tu Lewia, musti nutangkasi kalennu untu' Batara, siagang nutangkasi Balla'Na Batara, Allata'alana boe-boenu. Sikontu apa akkullea anra'massi anjo ballaka musti nupakabellai.

2 PATTOTTORANG 30:15

Ri tanggala' 14 anjo bulanga ammolommi ke'nanga gimbala' untu' nipassareang salaku koro'bang Paska. Sikamma imanga siagang tu Lewi ra'masaka ija, a'jari siri'-siri'mi. Jari natangkasimi ke'nanga kalenna, sa'genna akkullemo ke'nanga assare koro'bang nitunu ri Balla'Na Batara.

2 PATTOTTORANG 35:4

Pasadiami kalennu ri Balla'Na Batara situru' massing regunu, siagang situru' pambageang tugasa' le'baka nipattantuangko ri Karaeng Daud siagang Karaeng Salomo ana' bura'nena.

2 PATTOTTORANG 35:6

Musti ammolongko gimbala' untu' Allo Lompo Paskaya. Lanri kammana anjo massing pasadiai kalennu, sollannu siratang anynyomba mae ri Batara; kammayatompa appasadiako koro'bang-koro'bang eroka nipassareang mae ri Batara, sollanna tu Israel maraengannaya akkulle tongi nagaukang apa Naparentakanga Batara tete ri Musa.”

AYUB 1:5

Punna le'ba' anjo massing pa'gaukanga, tuli ambangung bari'basaki Ayub nampa assare koro'bang untu' tungga'-tunggala' ana'na sollanna nipammopporang ke'nanga ri Batara. Saba' nakana pikkiranna Ayub, gassingka dorakami anjo ana'-ana'na siagang nahinai Allata'ala natanaassenga kalenna.

KALAPPASSANG 19:10

Kamma-kamma anne buntulimi ke'nanga, siagang suromi ke'nanga anne alloa siagang ammuko ampasadiai kalenna untu' anggaukangi ibadana. Musti nasassai pakeanna ke'nanga.