2 KORINTUS 8:9 - KITTA' MATANGKASA'

⁹ Nasaba' baji' ngaseng nuassenna angkanaya teai sipato' nikarimangnginta ri Isa Almasi Batarata: Kalumanynyangi, mingka Napa'jari kasi-asimi KalenNa untu' kaparalluannu ngaseng; sollanna battu ri kakasi-asianNa nukkulle a'jari kalumanynyang.

2 KORINTUS 8:9 ပူးပေါင်းရင်းမြစ်များ

YESAYA 53:2

Nakaerokangi Batara sollanna a'jari rapang cu'la' anjo atanNa attimboa ri butta rosoka. Tena baji'-baji' ri ia lanicini'; tena apa-apa lakkulle ningai ri ia.

YESAYA 62:1

Lanri Yerusalem kula'bicara, lanri Sion kutala'mereki, sa'genna nipasalama' naccaya pammetanna rapang sulo ri wattu bangngi.

YESAYA 65:8

Nakana Batara, “Rappo anggoro' niaka ija je'ne'na tena nanipelaki, mingka nipa'jari je'ne' anggoro'. Kamma tomminjo bansaKu, tena nalanipanraki ngaseng, saba' nia' ija ri ke'nanga anynyomba mae ri Nakke.

MATIUS 17:27

Mingka takkulleaki' ansusai nyawana anjo taua. Jari a'lampamako mange ammekang ri tamparanga. Allei juku' uru nubantunga. Nia' doe' lanugappa lalang ri bawana anjo jukuka, anggannaka lanipa'bayarrang sima sipa'rua! Allei anjo doeka, nampa nubayara' simata mange ri Balla'Na Batara!”

MATIUS 20:28

Sangkamma minjo Ana' Ma'rupataua; niaki battu teai sollanna nanilayani, passangalinna sollanna na'jari palayang. NaNapassareang nyawaNa, sollanna nakkulle Napasalama' tau jaia.”

MATIUS 8:20

Appialimi Isa Nakana, “Kongkong romanga nia' pammantanganna; kammayatompa jangang-janganga nia' ru'munna. Mingka Ana' Ma'rupataua manna laNapappadongkoki ulu tena todong.”

MARKUS 6:3

Sai anne taua tukang kayu, ana'na Maria, sari'battanna Yakobus, Yoses, Yudas, siagang Simon? Ba, manna sari'battanNa bainea anrinni ngasengi ammantang.” Lanri kammana, teami ke'nanga antarimai Isa.

LUKAS 16:11

Jari punna takkulleako nipatappa' ri passala' pa'barang-barangang lalanga ri linoa, inai laero' ampatappakko ri passala' pa'barang-barangang surugaya?

LUKAS 8:3

Yohana, bainenna Khuza, pagawe balla' lompona Herodes; Susana, siagang jai pole bai'-baine maraeng. Ongkoso' kalenna napake ke'nanga ambantui Isa siagang ana'-ana' gurunNa.

LUKAS 9:58

Appialimi Isa Nakana, “Kongkong romanga nia' kali'bonna, siagang jangang-janganga nia' ru'munna, mingka Ana' Ma'rupataua manna tampa' laNapanra'baia tena todong.”

YOHANES 1:10

Niaki Kanaya ri lino, tete ri Ia nipa'jari linoa, mingka taniassengai ri linoa.

YOHANES 1:14

Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte.

YOHANES 1:17

Nitarimai HukkunNa Batara, tete ri Musa. Mingka pangngamaseang siagang pangngatutuiNa Allata'ala nipa'nyatami lalang ri Isa Almasi.

YOHANES 12:30

Nakanamo Isa ri ke'nanga, “Teai untu' kaparalluangKu nakalangngerang anjo sa'raya, mingka untu' kaparalluannu ngaseng.

YOHANES 16:15

Sikontu apa niaka ri Manggea iNakke ngaseng pata. Iaminjo saba'na naKukana ri kau angkanaya anjo apa Napabattua RohNa Allata'ala mae ri kau, apa le'ba' Natarima battu ri Nakke.”

YOHANES 17:19

Kupassareammi KalengKu, iamintu tu nikatutuinTa, untu' kaparalluanna ke'nanga, sollanna akkulle todong ke'nanga a'jari ummatTa Kikatutuia, lanri katojenganga.

ROMA 11:12

Lanri salana siagang tenana manannuruki bansa Yahudia mae ri ero'Na Allata'ala, nanibarakkakimo bansa-bansa maraenga ri Allata'ala. Jari la'biangampa pole punna a'jari baji'mo ammotere' passisambunganna bansa Yahudia siagang Allata'ala; tantu lala'bi lompoangangi pole barakka' laNapassareanga Allata'ala!

ROMA 15:3

Nasaba' manna Almasi teai kasannangang KalenNa Nanawa-nawa. Nia' tattulisi' lalang ri Kittaka angkanaya, “Sikontu paccalla lamangea ri kalennu, tu'guru' mange ngasemmi ri Nakke.”

ROMA 5:8

Mingka Napappicinikammi pangngamaseanNa Allata'ala mae ri katte, iamintu ri wattu ero'Na Isa Almasi angkamateangki' ri wattunta doraka ngasengija!

ROMA 8:32

Manna ana' KalenNa tena todong Nakadarangi, passangalinna Napassareammi untu' kaparalluanta ngaseng; maka talaNasareaki' sikamma kaparalluanta maraenganga?

1 KORINTUS 1:4

Tuli appala' sukkurukka' mae ri Allata'ala saba' ikau ngaseng, nasaba' nutarimami passare malammoro'Na Allata'ala, tete ri Isa Almasi.

1 KORINTUS 15:47

Adam rioloa butta nipa'jari, mingka Adam makaruaya battu ri suruga assala'na.

2 KORINTUS 6:10

Manna nanipakasi'na pa'maitta, mingka tuli rannujaki'. Kasi-asi maki' nicini', mingka jaimi tau nipa'jari kalumanynyang. Tena nicini' apa-apanta, mingka sikontutojenna nia' ngasemmi ri katte sikontu apa-apaya.

EFESUS 2:7

Kammami anjo Nagaukang Allata'ala, sollanna akkulle nacini' rupataua ri jammang labattua, antekamma lompona kabajikang pa'mai'Na Napappicinikanga lalang ri Isa Almasi.

EFESUS 3:19

tenaya nakkulle napahang baji' akkala'na rupataua. Poro nupahang lalo anjo pangngamaseanNa Almasi, sa'genna Napa'jari sukku' Allata'ala batangkalennu.

EFESUS 3:8

Ri sikontu umma'Na Allata'ala, inakkemi anne kaminang tuna. Mingka Nasarema' Allata'ala anne pangngamaseanga: Iamintu jama-jamang untu' ambirittakangi mae ri bansa-bansa maraenga Kabara' Bajika, iamintu kakalumanynyanganNa Almasi tenaya la'busu'na;

KOLOSE 1:24

Kamma-kamma anne sannammi pa'maikku angkasiaki pa'risika untu' kaparalluannu. Nasaba' lanri kapa'risang nakasiaka tubuku, kupa'ganna'mi kasessang mustia Nakasia' Almasi untu' jama'aNa, iamintu tubuNa.

1 TIMOTIUS 6:18

Pakaingaki ke'nanga nanapa'nyata kabajikanga, namasarro anggaukangi apa-apa bajika, lammoro' pa'maiki siagang nangai assare-sarea apa-apa.

IBRANI 1:2

Mingka anne ri kala'busang jammanga, a'bicarami mae ri katte tete ri Ana'Na. Tete ri Iami anne Ana'Na naNapa'nia' sikontu linoa siagang bonena. Siagang Napattantumi Allata'ala angkanaya Ia tommi anne Ana'Na siratang angkammai sikontu apa-apa niaka.

YAKOBUS 2:5

U'rangi sikamma sari'battangku, sannaka kukarimangnginna! Ia tau nicini' kasi-asia ri anne linoa, iami nipilei ri Allata'ala untu' a'jari tu kalumanynyang lalang ri katappakkanga. Iaminjo tau kammaya la'jari Umma'Na Allata'ala situru' Napa'janjianga Allata'ala mae ri sikamma tau angkamaseangai.

PAPPICINI' 2:9

Kuassengi kasusannu ngaseng; Kuassengi angkanaya kasi-asiko, mingka sikontutojenna kalumanynyang ngasengko! Kuassengi sikamma pitina nipamangea ri kau, napare'-pareka sikamma tu nakanaya kalenna tu Yahudi, na sikontutojenna teai; anjo ke'nanga sangnging umma'na Billisika.

PAPPICINI' 21:7

Tau ammetaya lanatarima ngasengi yangasenna anjo battu ri Nakke. INakke la'jari Allata'alana siagang ia la'jari anakKu.

PAPPICINI' 3:18

Lanri kammanami anjo naKupakaingakko sollannu ammalli ngaseng battu ri Nakke bulaeng, iamintu bulaeng ti'no', sollannu a'jari kalumanynyang. Ammalli todong mako battu ri Nakke pakeang kebo' sollannu akkulle ammakeang siagang nutongko' kalennu natena nussolara' siagang natena nuppakasiri'. Siagang ammalli todong mako pa'balle untu' nupasapu mae ri matannu, sollannu akkulle accini'.