2 KORINTUS 6:10 - KITTA' MATANGKASA'

¹⁰ Manna nanipakasi'na pa'maitta, mingka tuli rannujaki'. Kasi-asi maki' nicini', mingka jaimi tau nipa'jari kalumanynyang. Tena nicini' apa-apanta, mingka sikontutojenna nia' ngasemmi ri katte sikontu apa-apaya.

2 KORINTUS 6:10 ပူးပေါင်းရင်းမြစ်များ

PAMMUJI 84:11

Bajikangngangi sialloa ri BallatTa nasisa'bu allo ri tampa' maraenga. Kualleangangi a'jaria pajaga ri pakke'bu' lompona Balla'Na Allata'alaku naia ammantanga ri balla' tau ja'dalaka.

PANGNGEBARANG 13:7

Nia' tau a'gau' kalumanynyang, natena apa-apanna; nia' tau a'gau' kasi-asi, nakalumanynyang kalupepeang.

PANGNGEBARANG 16:16

Bella' la'bi baji'na anggappaya kacara'dekang kala anggappaya bulaeng; la'bi lompoangngangi anggaranna anggappaya pangngassengang kala anggappaya pera'.

MATIUS 5:12

Kasukkurangi siagang karannuangi, nasaba' lompoangangi pahala lanutarimaya sallang battu ri Allata'ala. Kamma tomminjo batena nisessa na'bi-na'bi le'baka battu rioloangannu.”

MATIUS 5:4

Mate'nei tau susaya pa'mai'na; nasaba' iami lanisaleori ri Allata'ala!

LUKAS 6:21

Mate'ne ngasengko tau cipuruka ri kamma-kammaya anne; nasaba' lanibassoriko sallang! Mate'ne ngasengko tau angngarruka ri kamma-kammaya anne; nasaba' lammakkalakko sallang!

YOHANES 16:22

Kamma tomminjo ri kau ngaseng: kamma-kamma anne susai nyawanu, mingka lasibuntulu' poleang jaki' sallang, jari la'jari rannumi nyawanu. Na tenanniakka tau lakkulle angngallei anjo karannuanga battu ri nyawanu.

LAMPA-LAMPANA 16:25

Kira-kira tangnga bangngi sitabangi appala' doang siagang akkelong-kelong mammuji ri Allata'ala Paulus siagang Silas.

LAMPA-LAMPANA 3:6

Mingka nakanamo Petrus ri anjo tau pesoka, “Tena sikali doekku. Mingka apa niaka ri nakke, iaminjo lakusareangko: Lanri koasaNa Isa Almasi, battua ri Nazaret, kukana ri kau a'jappa mako!”

LAMPA-LAMPANA 5:41

A'lampami anjo sikamma tunisuroNa Allata'ala ambokoi anjo sidang Pangadelang Agamaya. Sanna' ngaseng rannuna ke'nanga, lanri nipassiratammi ri Allata'ala ke'nanga angkasiaki paccallaya, lanri arenNa Isa.

ROMA 11:12

Lanri salana siagang tenana manannuruki bansa Yahudia mae ri ero'Na Allata'ala, nanibarakkakimo bansa-bansa maraenga ri Allata'ala. Jari la'biangampa pole punna a'jari baji'mo ammotere' passisambunganna bansa Yahudia siagang Allata'ala; tantu lala'bi lompoangangi pole barakka' laNapassareanga Allata'ala!

ROMA 12:15

Amminawangko rannu siagang tau rannua; siagang amminawang tongko angngarru' siagang tau angngarruka.

ROMA 15:13

Allata'alami tampa' panrannuannu. Poro Nabonei pa'mai'nu sikontu karannuang siagang salewangang, lanri tappa'nu mae ri Ia, sollanna lanri koasa RohNa Allata'ala nanupila' manrannuang mae ri Allata'ala.

ROMA 8:32

Manna ana' KalenNa tena todong Nakadarangi, passangalinna Napassareammi untu' kaparalluanta ngaseng; maka talaNasareaki' sikamma kaparalluanta maraenganga?

ROMA 9:2

Sanna' si'nana siagang pa'risi'na atingku,

1 KORINTUS 1:5

Akkalumanynyang mako lalang ri yangasenna apa-apaya ri katallassanga, lanri a'jari taunNa mako Isa Almasi. Jaimi pangngassengannu, siagang cara'de' mako ampangngajarrangi anjo pangngassenganga.

2 KORINTUS 2:4

Sanna' si'nana siagang sanna' battala'na pa'maikku, kammayatompa ammatti'-mattiki je'ne' matangku ri wattunna kutulisi' anne suraka. Mingka teai lanri kukellainu si'na nakupau anne, passangalinna sollanna akkulle nuasseng angkanaya sanna' ngaseng kukarimangnginnu.

2 KORINTUS 4:15

Yangasenna anjo, untu' kaparalluannu ngaseng. Nasaba' punna pila' jai tau angkasiaki pangngamaseanNa Allata'ala, pila' jai tommi pappala' sukkuru' nipanai' ri Allata'ala; jari nipakala'biri'mi Allata'ala.

2 KORINTUS 4:7

Mingka anjo pa'barang-barangang rohani ga'gaya, ikambemi anne angngerangi, iami antu tubu tenaya anggaranna lanri buttaji nipare'. Lanri kammana, ma'nassami angkanaya anjo koasa malompoa niaki ri Allata'ala, jari tena nania' ri kambe.

2 KORINTUS 8:9

Nasaba' baji' ngaseng nuassenna angkanaya teai sipato' nikarimangnginta ri Isa Almasi Batarata: Kalumanynyangi, mingka Napa'jari kasi-asimi KalenNa untu' kaparalluannu ngaseng; sollanna battu ri kakasi-asianNa nukkulle a'jari kalumanynyang.

EFESUS 3:16

Appala' doanga' mae ri Allata'ala kaminang mala'birika naporo Najarreki pa'mai'nu siagang RohNa.

EFESUS 3:8

Ri sikontu umma'Na Allata'ala, inakkemi anne kaminang tuna. Mingka Nasarema' Allata'ala anne pangngamaseanga: Iamintu jama-jamang untu' ambirittakangi mae ri bansa-bansa maraenga Kabara' Bajika, iamintu kakalumanynyanganNa Almasi tenaya la'busu'na;

FILIPI 2:17

Nakulle kapang lanibunoa' siagang latassolongi cerakku anjari sangkamma koro'bang nipatirika irate ri apa nupassareanga mae ri Allata'ala anjari' pammatei angkana tappakko ri Ia. Punna memang musti kammai anjo, appala' sukkuruka', siagang amminawang tonga' rannu siagang ikau ngaseng.

FILIPI 4:4

Poro tuli rannu ngasengi pa'mai'nu, lanri le'ba'numo asse're siagang Batara. Sikalipi pole kukana: rannu mako!

KOLOSE 1:24

Kamma-kamma anne sannammi pa'maikku angkasiaki pa'risika untu' kaparalluannu. Nasaba' lanri kapa'risang nakasiaka tubuku, kupa'ganna'mi kasessang mustia Nakasia' Almasi untu' jama'aNa, iamintu tubuNa.

KOLOSE 3:16

Parallui antama' ri atinnu ajarang-ajaranNa Almasi rassia barakka'. Paralluko massing siajara' siagang sipakainga' baji'-baji'. Kelongangi kelong-kelonga siagang pammuji-mujia kammayatompa lagu-lagu rohania; sukkurukko lalang ri atinnu nukkelong-kelong untu' Allata'ala.

1 TESALONIKA 1:6

Nucontoimi katallassanna ikambe siagang Batara. Manna teai sipato' pa'risi'na katallassannu, mingka nutarima tonji siagang rannu pa'mai'nu anjo kabara' napabattua ikambe mae ri kau ngaseng. Anjo karannuanga RohNa Allata'ala assareko.

1 TESALONIKA 5:16

Paralluko tuli marannu;

1 TIMOTIUS 4:8

Anjo latihang tubua sike'de'ji matu-matunna; mingka latihang rohania a'matu-matui lalang sikontu-kontuna katallassanta, nasaba' akkimbolongi janji untu' katallassanta ri kamma-kammaya anne siagang katallassang labattua.

1 TIMOTIUS 6:18

Pakaingaki ke'nanga nanapa'nyata kabajikanga, namasarro anggaukangi apa-apa bajika, lammoro' pa'maiki siagang nangai assare-sarea apa-apa.

IBRANI 10:34

Siagang amminawang tongko ampisa'ringi si'nana tau nitarungkua. Siagang ri wattunna nialle passa apa-apannu, nupassareangi siagang sannang pa'mai'. Nasaba' nuassengi angkanaya nia' ijapa ri kau apa la'bi bajikanganga, akkullea attahang sa'genna satunggu-tungguna.

YAKOBUS 2:5

U'rangi sikamma sari'battangku, sannaka kukarimangnginna! Ia tau nicini' kasi-asia ri anne linoa, iami nipilei ri Allata'ala untu' a'jari tu kalumanynyang lalang ri katappakkanga. Iaminjo tau kammaya la'jari Umma'Na Allata'ala situru' Napa'janjianga Allata'ala mae ri sikamma tau angkamaseangai.

1 PETRUS 4:13

Ba'lalo, parallui a'jari sannang pakkasia'nu lanri amminawannu todong angkasiaki sessaya siagang Almasi. Jari sallang, punna nipa'nyatamo kala'biranNa Almasi, larannu mako.

PAPPICINI' 2:9

Kuassengi kasusannu ngaseng; Kuassengi angkanaya kasi-asiko, mingka sikontutojenna kalumanynyang ngasengko! Kuassengi sikamma pitina nipamangea ri kau, napare'-pareka sikamma tu nakanaya kalenna tu Yahudi, na sikontutojenna teai; anjo ke'nanga sangnging umma'na Billisika.

PAPPICINI' 21:7

Tau ammetaya lanatarima ngasengi yangasenna anjo battu ri Nakke. INakke la'jari Allata'alana siagang ia la'jari anakKu.