2 KORINTUS 11:22 - KITTA' MATANGKASA'

²² Maka tu Ibrani anjo ke'nanga? Inakke tu Ibrani tonja'. Tu Israel ke'nanga? Inakke tu Israel tonja'. Turungannai Abraham ke'nanga? Inakke pole kamma tonja'!

2 KORINTUS 11:22 ပူးပေါင်းရင်းမြစ်များ

2 PATTOTTORANG 20:7

IKattemi Allata'alana ikambe. Ri wattunna battu ummatTa Israel mae anrinni ri pa'rasanganga, Kibongkai sikamma tau niaka ammantang anrinni anjo wattua. Nampa Kipassareang anne pa'rasanganga mae ri jari-jarina Abraham, belata, untu' a'jari butta napatang ke'nanga satunggu-tungguna.

KALAPPASSANG 10:3

Nampa a'lampami Musa siagang Harun mange andallekang ri karaenga na nakana ri ia, “Batara, Allata'alana bansa Ibrani, appasangi angkana, ‘Siapapi sallonu taeroka tundu' mae ri Nakke? Lappassammi ummakKu a'lampa, sollanna akkulle ke'nanga nagaukang ibadana mae ri Nakke.

KALAPPASSANG 3:18

Lanapilangngeri ummakKu kana-kanannu. Nampa musti siagangko sikamma pamimpinna tu Israel a'lampa mange andallekang ri Karaeng Mesir siagang angkana ri ia, ‘Batara, Allata'alana tu Ibrani, nia'mi battu ampappicinikangi KalenNa mae ri kambe. Kamma-kamma anne kisaremi ising ikambe a'lampa kira-kira tallungallo sallona nijappai battu anrinni, mange ri parang lompoa untu' assare koro'bang mae ri Batara, Allata'alana ikambe.’ ”

KALAPPASSANG 5:3

Nakanamo Musa siagang Harun, “Le'ba'mi Napappicinikang KalenNa Allata'alana tu Ibrani mae ri kambe. Kisaremi ising ikambe a'lampa mange ri parang lompoa, kira-kira bellana battu anrinni tallungalloi nijappai. Eroki kambe mange assare koro'bang mae ri Batara, Allata'alana ikambe. Punna tanagaukangnga ikambe anjo kammaya, lanibunoi ikambe passala' garring yareka pa'bundukang.”

KALAPPASSANG 7:16

Pauangi anjo karaenga angkana: Batara, Allata'alana tu Ibrania, Nasuroa' ampabattui mae ri katte, sollanna kilappassang a'lampa umma'Na mange untu' anggaukangi ibadana mae ri Ia ri parang lompoa. Mingka sa'genna kamma-kamma anne tena kiero' appilangngeri.

KALAPPASSANG 9:1

Nakanamo Batara mae ri Musa, “A'lampako mange andallekang ri karaenga nampa nupau mae ri ia angkanaya Batara, Allata'alana tu Ibrania, angkanai: Lappassangi ummakKu a'lampa sollanna akkulle ke'nanga anggaukangi ibadana mae ri Nakke.

KALAPPASSANG 9:13

Nakanamo Batara ri Musa, “A'lampako ammuko bari'basa' dudu mange andallekang ri karaenga, nampa nupabattuang angkanaya Batara, Allata'alana tu Ibrani Nakana: Lappassangi ummakKu sollanna akkulle ke'nanga a'lampa mange anggaukangi ibadana mae ri Nakke.

MATIUS 3:9

Teako akkapangi angkanaya lakkullei nuliliang hukkunganNa Allata'ala lanri nukanana kalennu sossorannako Abraham. U'rangi angkanaya, manna anne batu-batua, akkulle tongi Napa'jari Allata'ala sossoranna Abraham!

LAMPA-LAMPANA 22:3

“Inakke tu Yahudia'. Anjorenga' ri kota Tarsus, ri pa'rasangang Kilikia nilassukang. Mingka anrinnia' ri Yerusalem nipakalompo. Siagang anrinnia' niajara' baji' ri guru lompoa Gamaliel ri passala' atorang-atorang le'baka napassareang Musa ri boe-boeta. Sangkamma ikau ngaseng niaka anne alloa anrinni, sanna' todong rajengku anynyomba mae ri Allata'ala.

LAMPA-LAMPANA 6:1

Pila' sallo, pila' jaimi tau tappa' ri Isa. Anjo wattua a'jari tenamo nasannang nyawana tau tappa' bansa Yahudi a'bicara Yunania mae ri tau tappa' bansa Yahudi totoka. Nakanamo a'bicara Yunania, “Sikamma bai'-baine janda niaka ri kambe tanibageiyai ongkoso' kaparalluang allo-allo nipa'bage-bageanga mae ri taua.”

ROMA 11:1

Erokka' akkuta'nang: Maka Napela'mi Allata'ala umma' KalenNa? Tantu tena! Inakke kalengku bansa Israelka', sossoranna Abraham, siagang battu ri suku Benyamin.

ROMA 9:4

Ike'nammi umma' nipilea siagang nipa'jaria ana'-ana' KalenNa ri Allata'ala, kammayatompa le'baka angkasiaki kakoasanNa Allata'ala. A'janjimi Allata'ala mae ri ke'nanga, siagang nisaremi ke'nanga hukkung-hukkung agama. Nipauammi ri Allata'ala ke'nanga angkanaya antekamma batena ke'nanga musti anynyomba ri Allata'ala; kammayatompa natarimami ke'nanga janji-janjinNa Allata'ala.

GALATIA 3:16

Anjo janji-janjinNa Allata'ala, KalenNa ampareki untu' Abraham siagang untu' sossoranna Abraham. Tena nanakana lalang ri Kittaka, “siagang untu' sikamma tau sossoranna Abraham,” battuanna jai tau. Ia niaka tattulisi' iamintu, “siagang untu' sossorannu,” battuanna sitauji bawang, iamintu Almasi.

FILIPI 3:5

Inakke, sagantuju allo umurukku nanisunnaka', salaku tu Israel, battu ri suku bansa Benyamin. Inakke Ibrani totoka'. Ri passala' mannurukia mae ri hukkung agama Yahudia, inakke anne anggotana' golongang Farisia.