2 KARAENG-KARAENG 23:2 - KITTA' MATANGKASA'

^2-3 Nampa a'lampa siagang ke'nanga mange ri Balla'Na Batara, nipinawang ri sikamma imanga, sikamma na'bia siagang sikontu ra'yaka, baji' tu kasi-asia kammayatompa tukalumanynyanga. Ri dallekanna ngaseng ke'nanga, ri ampi'na benteng untu' karaenga, ammentemmi karaenga nampa nabacakang ke'nanga siagang sa'ra lompo sikontu bonena anjo kitta' parjanjiang beru nigappaya lalang ri Balla'Na Batara. Nampa appare' karaenga parjanjiang siagang Batara untu' lamannuruki mae ri Ia, siagang lanagaukangi sikontu parentaNa siagang hukkung-hukkunNa, attojeng-tojengi anggaukangi ri pa'mai'na siagang nyawana. A'janji tongi karaenga lanarupai apa Napattantua Batara lalang ri parjanjianNa siagang Umma'Na sangkamma niaka tattulisi' lalang ri anjo kittaka. Sikontu ra'yaka amminawang turu' tommi a'janji untu' lanaturuki anjo parjanjianga.

2 KARAENG-KARAENG 23:2 ပူးပေါင်းရင်းမြစ်များ

PA'JARIANG 19:11

Napa'jari buta ngasemmi anjo tau niaka ri pantaranganna anjo ballaka, sa'genna takkulleamo ke'nanga ambuntuluki pakke'bu'na anjo ballaka.

1 KARAENG-KARAENG 8:9

Tena sikali apa-apa bonena lalang anjo Patti Parjanjianga pantaranganna ruaya batu. Anjo batu-batua napantamaki anjoreng Musa ri Moncong Sinai, ri wattunna appare' parjanjiang Batara siagang bansa Israel, ri wattunna lalang pa'jappang ke'nanga battu ri Mesir mange ri pa'rasangang Kanaan.

2 KARAENG-KARAENG 22:8

Napabattui Safan parentana karaenga ri Hilkia, nampa nacarita Hilkia mae ri Safan angkanaya le'baki nagappa ammotere' kitta' hukkung-hukkunNa Batara ri Balla'Na Batara. Napassareangi Hilkia anjo kittaka mae ri Safan, nampa nabaca Safan.

2 PATTOTTORANG 15:13

Manna inai, tau toa yareka tau rungka, bura'ne yareka baine, tenaya nattallasa' situru' ero'Na Batara mattantui nihukkung mate.

2 PATTOTTORANG 17:9

Angngerangi ke'nanga Kitta' “Hukkung-hukkunNa Batara” nampa a'lampa mange-mange ri sikontu kota niaka ri Yehuda nampa naajara' ke'nanga ra'ya' niaka anjoreng.

NEHEMIA 13:1

Ri wattunna nibaca ri dallekanna ra'yaka hukkung Musa, nigappami kasingarang angkanaya: ‘Tu Amon siagang tu Moab, tena sikali nakkulle sicampuru' siagang umma'Na Allata'ala;

NEHEMIA 9:3

Nia' kutadeng tallunjang sallona nibaca anjo Kitta' HukkunNa Batara, Allata'alana ke'nanga mae ri ke'nanga. Nampa nia' todong tallunjang ri bokona namangakui dosa-dosana ke'nanga. Le'baki anjo su'ju'mi ke'nanga anynyomba ri Batara, Allata'alana ke'nanga.

ESTER 1:5

Le'baki anjo, appare'mi pole acara passua'-suarrang anjo karaenga untu' sikontu ra'yaka ri kota Susan, baji' ra'ya' kalumanynyanga, kammayatompa ra'ya' kasi-asia. Sidaminggui nigaukang anjo passua'-suarranga, anjoreng ri parang lakkenna balla' karaenga.

AYUB 3:19

Anjoreng sangkamma ngasengi taua: tau masahoro' siagang tau tenaya niassengi arenna. Siagang bebasa'mi kale'bakkanna sikamma ataya.

PAMMUJI 115:13

LaNabarakkaki sikamma tau mappilangngeria, baji' tau ca'di kammayatompa lompoa.

YEREMIA 34:8

Karaeng Zedekia siagang pandudu'na Yerusalem appareki parjanjiang untu' ampakabebasaki

LAMPA-LAMPANA 26:22

Mingka sa'genna kamma-kamma anne tuli nijagaia' ri Allata'ala, sa'gengku akkulle ammenteng anrinni, a'jari sa'bi mae ri sikamma taua – baji' natau lompo kammayatompa tau ca'dia. Anne apa kupaua tena le'ba' sisalana siagang apa-apa le'baka nasero kana na'bi-na'bia siagang Musa;

PAOLE 31:26

“Allei anne kitta' HukkunNa Allata'ala, siagang boliki ri sa'rinna Patti ParjanjianNa Karaeng Allata'alanu, sollanna tuli nia'na anjoreng salaku sa'bi mae ri anjo bansaya.

PAPPICINI' 20:12

Siagang nia'mi kucini' sikamma tau matea, tau lompo yareka tau ca'di, ammenteng ri dallekanna anjo empoang kala'biranga. Nisungkemi kitta'-kittaka. Nampa nia' tommo se're kitta' maraeng nisungke iamintu Kitta'na Tau Attallasaka. Nampa nitappukimi hukkunganna sikamma tau matea situru' panggaukanna ke'nanga, kamma niaka tattulisi' lalang ri anjo kitta'-kittaka.

1 SAMUEL 5:9

Mingka battuna mange anjoreng anjo pattia, nihukkung tommi ri Batara anjo kotaya, sa'genna gegere' lompo taua anjoreng. Nihukkummi pandudu'na anjo kotaya, tau rungka yareka tau toa. Akkambu'-kambussuluki kalenna ke'nanga.