2 KARAENG-KARAENG 23:19 - KITTA' MATANGKASA'

¹⁹ Ri tunggala' kotaya ri Israel, naruntung kabusuki Yosia sikontu tampa' panynyombanga mae ri rewataya, iamintu nabangunga karaeng-karaeng Israel, ampakalarroai Batara. Anjo apa nagaukanga Yosia ri Betel, sangkamma tommi anjo nagaukang mae ri sikontu tampa'-tampa' pakkoro'bangngang niaka ri sikontu Israel.

2 KARAENG-KARAENG 23:19 ပူးပေါင်းရင်းမြစ်များ

1 KARAENG-KARAENG 12:31

Appaenteng tommi Yerobeam tampa'-tampa' passambayangang maraeng ri coppo'-coppo' monconga, siagang angngangka'mi imang-imang battu ri pantaranganna kaluarga Lewi.

1 KARAENG-KARAENG 13:32

Anjo apa le'baka napau lanri parentaNa Batara ri anjo tampa' pakkoro'bangnganga ri Betel siagang ri sikontu tampa' passambayanganga ri kota-kota Samaria, mattantu lakajariangi.”

1 KARAENG-KARAENG 16:33

Appare' tongi patung rewata baine niarenga Asyera. Jaiangngangi dosa nagaukanga na dosa le'baka nagaukang sikontu karaeng Israel ammarentaya rioloangannaya. Lanri kammana anjo napakabattumi larroNa Batara, Allata'ala Ia mustia nisomba ri tu Israel.

2 KARAENG-KARAENG 17:9

siagang nagaukangi apa-apa tenaya Napa'biangi Batara, Allata'alana ke'nanga. Ambangungi ke'nanga tampa'-tampa' panynyombang rewata ri sikontu kotana ke'nanga, baji' ri kota ca'dia kammayatompa ri kota lompoa.

2 KARAENG-KARAENG 21:6

Ana' kalenna napassareang a'jari koro'bang nitunu. Nagaukang tongi Manasye gau'-gau' sanroa, a'jari paciniki, ammakei pangngissengang, siagang appalaki pangngunju' mae ri roh-roh tanicinika. Sanna' dorakana mae ri Batara sa'genna napanai'mo larroNa Batara.

2 KARAENG-KARAENG 8:18

A'buntingi siagang ana'na Ahab, na kamma panggaukanna kaluargana Ahab, ia doraka tongi mae ri Batara sangkamma sikamma karaeng Israel.

2 PATTOTTORANG 31:1

Le'baki nagaukang ke'nanga anjo passua'-suarranga, a'lampami sikontu ra'yaka mange ri sikontu kota Yehuda, nampa naancuru' patung-patunna barhalaya, naruntung sikontu patung-patung le'baka nibangung untu' Dewi Asyera, siagang naputta tampa'-tampa' pakkoro'bangnganga siagang tampa'-tampa' panynyombanga mae ri barhalaya. Kamma tomminjo nagaukang ke'nanga ri tampa'-tampa' maraenga ri Yehuda siagang ri daera-daera Benyamin, Efraim, siagang Manasye. Le'baki anjo massing ammotere' ngasemmi ke'nanga mange ri massing kamponna.

PAMMUJI 78:58

Napa'ngarai ke'nanga Allata'ala ri tampa' panynyombang barhalaya, napassereati Allata'ala siagang patung-patunna ke'nanga.

MIKHA 6:16

Yangasenna anjo kammaya kajariangi lanri nuturukinna panggaukang-panggaukang ja'dala'na Karaeng Omri siagang ana'na, iamintu Karaeng Ahab. Nupinawangi cara-carana ke'nanga. Lanri kammana anjo laKuancuru' ngasengko, siagang lanicau-cauko kammayatompa lanihinako ri sikontu bansaya.”