2 KARAENG-KARAENG 23:14 - KITTA' MATANGKASA'

¹⁴ Tembo'-tembo' rewata siagang patung Dewi Asyera niruntungi, nampa anjo butta le'ba' pammantanganna nibangung anjo tembo'-temboka siagang patung-patunga natambungi Yosia siagang buku-buku tau.

2 KARAENG-KARAENG 23:14 ပူးပေါင်းရင်းမြစ်များ

2 KARAENG-KARAENG 18:4

Naputtai tampa'-tampa' panynyombanga mae ri rewataya, siagang naruntungi tembo'-tembo' siagang patung-patung Dewi Asyera. Naancuru' tongi ulara' tambagaya bate pare'na Musa niarenga Nehustan. Nasaba', sa'genna anjo wattua tuli attunu iji dupa tu Israel untu' ampakalompoi anjo ulara' tambagaya.

2 KARAENG-KARAENG 23:16

Nampa assaile Yosia, nania' nacini' siapa are jera' irate ri monconga. Jari nasuromi taua ambongkaraki anjo jeraka, siagang napasulu' buku-bukunna nampa natunu ri tampa' pakkoro'bangngang sitabanga nitunu anjo wattua. Kammami anjo batena ampanraki anjo tampa' pakkoro'bangnganga. Jari a'rupami apa le'baka natappu na'biNa Batara, ri wattunna sitabang ammenteng Karaeng Yerobeam ri ampi'na anjo tampa' pakkoro'bangnganga ri se'reang allo lompo. Le'baki anjo nia' nacini' Karaeng Yosia se're jera' maraengang.

KALAPPASSANG 23:24

Teako anynyombai ri sikamma patung-patung pa'la'langanna ke'nanga siagang teako palembai carana ke'nanga anggaukangi ibadana. Ancuru' ngasengi anjo sikamma patung-patung pa'la'langanna ke'nanga, siagang tepoki sikamma benteng-bentenna batu napakea ke'nanga untu' anggaukangi ibadana.

KALAPPASSANG 34:13

Jari, tea' laloko gaukangi kammaya; mingka rumbangi sikamma tampa' pakkoro'bangnganna ke'nanga, ancuruki sikamma batu-batu karama'na ke'nanga, kammayatompa ta'bang ngasengi sikamma benteng-bentenna Asyera, iamintu barhalana ke'nanga.

YESAYA 27:9

Mingka iapa nakkulle nipammopporang dosa-dosana Israel punna nigiling sikamma tampa' pakkoro'bangnganga mae ri rewata-rewataya sa'genna a'jari alusu' rapang pa'leo'. Sikamma pa'dupanga siagang pannanraina rewata baine niarenga Asyera musti niancuru' tongi.

YESAYA 44:19

Tanarapikai napikkiri' anjo papare' patunga angkanaya, “Anjo kayua kutunui sipa'gang, siagang cumi'na kupakei untu' attunu roti siagang allangga dageng untu' kukanre. Nampa sesanna anjo kayua kupa'jari patung. Jari kamma-kamma anne anynyomba' sipolong kayu!”

YEHEZKIEL 6:5

Lakupatassiaraki maya'-maya'na tu Israel; siagang buku-bukunna ke'nanga laKupabene-benei ri tammulilina anjo tampa'-tampa' pakkoro'bangnganga.

MIKHA 1:7

Patung-patunna ka'jalaka ballinna laniancuruki, siagang sikamma apa-apa nipassareanga mae ri bai'-baine tugasaka ri balla' rewataya lanitunui, kammayatompa sikontu barhalana lanipanraki. Anjo barang-barang kammaya wassele' ibadana ke'nanga mae ri rewata kacopponganga. Kamma-kamma anne kabusu'na anjo laniengkaki ri musu-musunna untu' napassareang mae ri rewata-rewatana ke'nanga.”

PAMMILANGNGANG 19:16

Sikamma tau niseroa ri maya'na tau mate nibunoa, yareka mate kalenna ri kokoa, a'jari ra'masaki lalang tuju allo. Kamma tomminjo tau anseroai jera'na yareka bukunna tau matea.

PAMMILANGNGANG 19:18

Lalang ri anjo passala' makase'rea, iamintu punna nia' tau mate lalang ri kemaya, tau tenaya nara'masa' musti angngallei sitangke hisop, nampa najallakkang antama' ri anjo je'neka, nampa napiracciki anjo kemaya siagang sikontu apa-apa niaka lalang, kammayatompa sikamma tau niaka anjoreng. Lalang ri passala' makaruaya, iamintu punna nia' tau nisero ri maya', jera' yareka buku tumate, tau tenaya nara'masa' musti napiracciki anjo tau ra'masaka kamma sumpaeng.

PAMMILANGNGANG 33:52

musti nubongkai sikontu pandudu'na anjo pa'rasanganga. Ancuru' ngasengi sikontu barhalana ke'nanga battua ri batu siagang bassi-bassiang kammayatompa tampa'-tampa' ibadana ke'nanga.

PAOLE 7:5

Lanri kammana anjo, rumbangi tampa'-tampa' pakkoro'bangnganna anjo bansa-bansaya, ancuru' ngasengi benteng-benteng batu nakanaya ke'nanga karamaki, ra'bai gamba'-gambara'na barhala Asyera, siagang tunui sikamma patung-patung barhala nasombaya ke'nanga.