2 KARAENG-KARAENG 21:5 - KITTA' MATANGKASA'

⁵ Ri anjo ruaya paranglakkenna Balla'Na Batara nabangungi Manasye tampa'-tampa' pakkoro'bangngang untu' anynyomba mae ri bintoeng-bintoenga.

2 KARAENG-KARAENG 21:5 ပူးပေါင်းရင်းမြစ်များ

1 KARAENG-KARAENG 6:36

Ri dallekanna anjo Balla'Na Batara, niparekimi paranglakkeng bageang lalang. Anjo paranglakkenga nikulilingi ri tembo' a'lapisi'-lapisika: irateanna tattallung lapisika batu, nia' silapisi' kayu camara Libanon.

1 KARAENG-KARAENG 7:12

Tembo' parang lakkenna balla' kakaraenganga siagang tembo' parang lakkenna Balla'Na Batara kammayatompa kamara' lompo ri bageang dallekanna Balla'Na Batara, massing-massingi battu ri silapisi' kayu camara Libanon siagang irateang tallung lapisi' batu.

2 KARAENG-KARAENG 23:12

Sikamma tampa' pakkoro'bangngang nibangunga ri Karaeng-karaeng Yehuda ri pattongko' rateanna kamara'-kamara'na Karaeng Ahas, naputta tongi. Kammayatompa tampa'-tampa' pakkoro'bangngang nibangunga ri karaeng Manasye ri ruaya paranglakkenna Balla'Na Batara, naputta kabusu' tongi Yosia, nampa napela' antama ri Ka'bung Lappara' Kidron.

2 KARAENG-KARAENG 23:4

Le'baki anjo naparentakammi karaenga mae ri Imang Lompo Hilkia, sikamma imang pambantua siagang sikamma pangawala' tugasaka ri pakke'bu' Balla'Na Batara, sollanna napasulu' battu ri anjo Ballaka sikontu pakkakasa' le'baka nipake untu' anynyomba ri Baal, Dewi Asyera, siagang bintoeng-bintoenga. Sikontu anjo barang kammaya natunui Karaeng Yosia ri pantaranna kotaya ri ampi'na Ka'bung Lappara' Kidron, nampa nierang auna mange ri Betel.

2 KARAENG-KARAENG 23:5

Napasuluki sikamma imang le'baka niangka' ri karaeng-karaeng Yehuda untu' anjamaya ri tampa' panynyombanga mae ri rewata-rewataya ri kota-kota Yehuda siagang ri tammulilina Yerusalem; kammayatompa imang assarea koro'bang mae ri Baal, mataalloa, bulanga, kammayatompa bintoeng-bintoenga na maraengannaya.

2 KARAENG-KARAENG 23:6

Patunna Dewi Asyera napasuluki battu ri Balla'Na Batara, nampa naerang assulu' ri pantaranna kotaya, mange ri Ka'bung Lappara' Kidron. Anjoreng nitunumi anjo patunga, nampa nidengka sa'genna alusu' cumi'na, siagang nipakioro' auna irate ri pa'jerakkang tujaia.

2 PATTOTTORANG 33:15

Napakabellai sikamma patung-patung rewata bansa maraenga siagang sikamma barhala le'baka niboli' lalang ri Balla'Na Batara. Nabongkaraki tampa'-tampa' pakkoro'bangngang mae ri barhalaya niaka ri bontona Balla'Na Batara, siagang ri tampa'-tampa' maraengannaya ri Yerusalem. Kabusu'na anjo naerangi assulu' nampa napela'.

2 PATTOTTORANG 33:5

Anjoreng ri ruaya paranglakkeng Balla'Na Batara ambangungi tampa'-tampa' pakkoro'bangngang untu' anynyomba mae ri bintoeng-bintoenga.

2 PATTOTTORANG 4:9

Appare' tongi Salomo se're paranglakkeng bageang lalang untu' sikamma imanga, siagang se're paranglakkeng bageang pantarang. Sikamma pakke'bu' lompoa ri alla'na anjo ruaya paranglakkeng nilapisi kabusuki tambaga.

YEHEZKIEL 40:28

Nampa anjo tu bura'nea naeranga' allalo ri pakke'bu' lompo bageang timboro' antama' ri paranglakkeng bageang lalang. Naukkuruki anjo pakke'bu' lompo bageang timboroka, nampa ukkuranna sangkammai siagang sikamma pakke'bu' lompo bageang pantaraka.

YEHEZKIEL 40:32

Le'baki anjo naeramma' anjo tu bura'nea allalo ri pakke'bu' lompo bageang rayaya antama' ri paranglakkeng bageang lalang. Naukkuruki anjo pakke'bu' lompoa, nampa ukkuranna sangkammai siagang sikamma pakke'bu' lompo maraenga.

YEHEZKIEL 40:37

Kamara' ri dallekanna a'dalle' mange tongi ri paranglakkeng bageang pantaranga. Tembo'-tembo' bageang lalang a'dalle' mangea ri loronga, nibelo-beloi siagang ukirang-ukirang poko' palem. Sagantuju baringang tuka'na a'lampa mangei ri anjo pakke'bu' lompoa.

YEHEZKIEL 40:47

Anjo tu bura'nea naukkuruki paranglakkeng bageang lalanga. Tanja'na iamintu appa' pasagi: la'buna siagang sangkara'na massing 50 metere'. Anjo Balla'Na Batara niaki ri bageang ilau', na ri dallekanna nia' tampa' pakkoro'bangngang.

YEHEZKIEL 42:3

Se're sa'rinna anjo bangunanga a'dalle' mangei ri baruga sampuloa metere' sangkara'na, nampa sa'ri maraenna a'dalle' mangei ri dapara' batu ri paranglakkeng bageang pantaraka. Anjo bangunanga attingka' tallui: tunggala' tingkaka antamakkangi sike'de' na tingka' bageang irawanganna.

YEHEZKIEL 43:5

Naangkakka' RohNa Batara nampa naeranga' mange ri paranglakkeng bageang lalang; anjoreng kucini' nitongkoki Balla'Na Batara ri caya kahaderanNa Batara.

YEHEZKIEL 44:19

Punna a'lampai ke'nanga assulu' ri paranglakkeng pantaranga, iamintu tampa' pa'rappunganna ummaka, anjo imang-imanga musti nasungkei pakeang dinasa'na ke'nanga ilalang ri kamara'-kamara' matangkasaka ri BallakKu, nampa ammake pakeang maraeng, sollanna anjo pakeang matangkasaka tena nabalai ummaka.

YEHEZKIEL 8:16

Nieramma' mange ri paranglakkeng bageang lalangnganna Balla'Na Batara. Ri ampi'na pakke'bu' antamaya ri kamara' matangkasaka, ri alla'na tampa' pakkoro'bangnganga siagang loronga, nia' tau ruampulo allima jaina. Nabokoi ke'nanga kamara' matangkasaka, siagang su'juki ke'nanga a'dalle' anrai' anynyomba mae ri mataallo ammumbaya.