2 KARAENG-KARAENG 17:23 - KITTA' MATANGKASA'

²³ sa'genna kale'bakkanna tenamo naniparhatikang ke'nanga ri Batara, passangalinna nipela'mi ke'nanga battu ri butta nipassareanga mae ri ke'nanga. A'rupami anjo kajariang kammaya situru' pappakainga' le'baka Napassareang Batara mae ri ke'nanga tete ri ata-atanNa iamintu na'bi-na'bia. Kammami anjo nanierammo tu Israel mange ri butta pammelakkanga ri Asyur, siagang anjoremmi ammantang ke'nanga sa'genna anne alloa.

2 KARAENG-KARAENG 17:23 ပူးပေါင်းရင်းမြစ်များ

1 KARAENG-KARAENG 13:2

Lanri parentaNa Batara, akkio'mi anjo na'bia mae ri anjo tampa' pakkoro'bangnganga angkana, “He tampa' pakkoro'bangngang, he tampa' pakkoro'bangngang! Kammai anne kananNa Batara, ‘Nia' sitau ana' laniareng Yosia lanilassukang lalang ri kaluargana Daud. Irateannu, he kau tampa' pakkoro'bangnganga, lanabuno sikontu imang-imang niaka tugasa' ri tampa'-tampa' passambayangang mae ri rewataya, siagang pole tau le'baka assare koro'bang irateannu. Na irateannu tommi lanitunu buku-bukunna rupataua.’ ”

1 KARAENG-KARAENG 14:16

Lanibokoi Israel ri Batara lanri dorakanamo Yerobeam siagang a'jaria passabakkang nadoraka todong tu Israel.”

1 KARAENG-KARAENG 9:7

laKubongkai ummakKu Israel battu ri pa'rasangang le'baka Kupassareang mae ri ke'nanga. LaKubokoi tongi anne balla' le'baka Kupattantu untu' a'jari tampa' passambayangannu mae ri Nakke. Kemae-kemae bansa Israel lanihina siagang lanikakkali.

2 KARAENG-KARAENG 13:23

Mingka Nakamaseangi Batara umma'Na siagang Napammopporangi ke'nanga. Tena Nabalang parekangi ke'nanga niancuru' passangalinna Natulungi ke'nanga, lanri parjanjianNa siagang Abraham, Ishak siagang Yakub. Sa'genna kamma-kamma anne tale'bakai Nakaluppai umma'Na.

2 KARAENG-KARAENG 17:13

Akkiringi Batara siapa are tunisuro siagang na'bi-na'biNa mae ri umma' Israel siagang Yehuda untu' ampabattui anne pappakainga' kammaya: “Ammarimako a'gau' ja'dala' siagang turukimi parenta siagang hukkung le'baka Kupassareang mae ri boe-boenu siagang mae ri kau tete ri sikamma anjo atangKu, na'bi-na'bia.”

2 KARAENG-KARAENG 17:18

sa'genna larro sikalimo mae ri ke'nanga siagang tenamo Naparhatikangi ke'nanga. Napelaki ke'nanga battu ri butta le'baka Napassareang mae ri ke'nanga. Ia ammantanga tassesa iamintu kakaraengang Yehuda mami.

2 KARAENG-KARAENG 17:20

jari tenamo Naani Batara sikontu umma' Israel. Nahukkungi siagang Napassareangi ke'nanga mae ri musu-musunna ke'nanga sannaka palla'na. Tenamo naNaparhatikangi ke'nanga, passangalinna Napelaki ke'nanga battu ri butta Napassareanga mae ri ke'nanga.

2 KARAENG-KARAENG 17:22

Naturuki ke'nanga panggaukanna Yerobeam siagang tuli nagaukangi sikontu dosa nagaukanga Yerobeam,

2 KARAENG-KARAENG 17:6

iamintu ri makasalapannamo taung ammarenta Hosea, naempoimi Salmaneser Samaria. Nampa naengka' tu Israel salaku tunitahang mange ri Asyur. Sipa'gang battu ri ke'nanga nitampakkangi ri kota Halah, sipa'gang maraengannaya ri ampi'na Binanga Habor ri daera Gozan, nampa sipa'gang pole ri kota-kota niaka ri pa'rasangang Madai.

2 KARAENG-KARAENG 21:14

Pandudu'na nia' tassesa laKubalang parekangi nibeta ri musunna ia langngalleai siagang langngellakai pa'rasanganna ke'nanga.

2 KARAENG-KARAENG 23:27

Nakana Batara, “Apa le'baka Kugaukang mae ri tu Israel, laKugaukang tongi mae ri tu Yehuda. LaKupelaki tu Yehuda battu ri pa'rasangang le'baka Kupassareang mae ri ke'nanga. LaKutollaki Yerusalem, iamintu kotaKu le'baka Kupilei, kammayatompa anne BallakKu, le'baka Kupau angkanaya la'jari tampa' panynyombangi mae ri KalengKu.”

2 KARAENG-KARAENG 24:3

Anjo kajariang kammaya memang musti kajariangi, lanri le'ba'mi Napau riolo Batara angkanaya lanipelaki bansa Yehuda battu ri pa'rasangang le'baka Napassareang Batara mae ri ke'nanga. Nipelaki ke'nanga lanri sikontu dosa nagaukanga Karaeng Manasye;

2 KARAENG-KARAENG 25:21

ri daera Hamat. Anjorengi ke'nanga nisessa nampa nibuno. Kammami anjo batena tu Yehuda niengka' battu ri pa'rasanganna ke'nanga nampa nierang mange ri butta pammelakkanga.

2 KARAENG-KARAENG 3:3

Mingka, sangkamma Yerobeam ana'na Nebat ammarentaya rioloannaya, naerang tongi tu Israel mae ri dosaya siagang tena nammari anggaukangi anjo passalaka.

NEHEMIA 9:32

O, Allata'ala, Allata'alana ikambe magassinga! Allata'ala malompoa siagang hebaka! MajarrekKi' anta'galaki sikontu parjanjianTa; Kirupai siagang Kigaukangi janji-janjinTa. Battu ri jammang sikamma karaeng Asyur anjallakkangi ikambe sa'genna kamma-kamma anne jaimi pa'risi' nakasia' ikambe. Sikamma karaenna ikambe, imang, na'bi siagang tutoa-toaya, kammayatompa boena ikambe siagang ra'yaka pa'risi' ngaseng. Teaki' kaluppai anjo pa'risika! Teaki' pelakki ri pangngu'ranginTa!

PAMMUJI 51:13

TeaKi' pelakkia' battu ri dallekanTa, teaKi' allei roh matangkasatTa battu ri nakke.

YESAYA 7:8

lanri anjo Siria tena nakassakkangngang na ibukotana iamintu Damsyik, kammayatompa anjo Damsyik tena nakassakkangngang na Karaeng Rezin. Nampa lalanna annampulo allima taung, lata'bage-bagei Israel sa'genna takkulleami attahang a'jari se're bansa.

YEREMIA 52:3

Teai sipato' larroNa Batara mae ri pandudu'na Yerusalem siagang tu Yehuda, sa'genna Nabongka ke'nanga siagang tenamo Nala'langngi pole ke'nanga. Angngewai Zedekia mae ri Nebukadnezar karaeng Babel;

YEREMIA 7:15

LaKubongkako battu ri dallekangKu sangkamma le'ba'na Kubongka bija-bijannu, umma' Israel.”

HOSEA 12:3

Nia' parkaraNa Batara siagang bansa Yehuda; kammayatompa laNahukkung tongi tu Israel lanri gau'-gau'na ke'nanga. LaNabalasaki panggaukanna ke'nanga.

AMOS 5:27

Punna Kupelakko mange ri se'reang pa'rasangang la'bi bellaya battu ri Damsyik. INakke Batara niarenga Allata'ala Kaminang Koasaya, anne akkana.”

MIKHA 1:5

Yangasenna anjo lakajariangi lanri dorakai tu Israel siagang angngewai ri Allata'ala. Inai passabakkang nadoraka tu Israel? Sai Samaria ibukotana tonji? Inai passabakkang nanynyomba tu Yehuda ri barhalaya? Sai Yerusalem tonji?

MIKHA 1:6

Lanri kammanami anjo na Nakana Batara, “LaKupa'jari Samaria tambungang loro ri paranga, siagang tampa'na taua a'lamung poko' anggoro'. Rumbanganna anjo kotaya laKubuangi antama ri ka'bunga, siagang laKubongkara' kabusuki pondasina.

MIKHA 2:5

Lanri kammana anjo, punna narapi' wattunna anjo pa'rasanganga nipoterang mae ri umma'Na Batara, tena manna sitau battu ri kau lantarimai bageanna.

PAOLE 32:20

Nakana, ‘Tena naKujampangi; ciniki mami apa lakajarianga. Nasaba' anjo bansaya kapala batui, tena sikali namajarre' pa'mai'na ke'nanga.

YOSUA 23:13

u'rangi, angkanaya mattantu tenamo nalaNabongkai Karaeng Allata'alanu anjo bansa-bansaya untu' ikau ngaseng. Kabalekanna, la'jari bahaya lompoi anjo ke'nanga mae ri kau, nasaba' anjo ke'nanga la'jari sanrapang sikko' yareka tado' tattannanga untu' ikau. Nampa lanapa'jari sessa tongko ke'nanga; nasaba' anjo ke'nanga la'jari sanrapang paccambo' mae ri dongko'nu yareka sanrapang katinting lalang ri matannu. Tulusu' lasessako sa'genna manna sitau battu ri kau tania' lammantang tassesa ri anne pa'rasangang baji' Napassareanga Karaeng Allata'alanu mae ri kau.

HAKING-HAKING 18:30

Anjo patung barhala naeranga ke'nanga, napaentengi anjoreng ri kotaya, nampa naangka' Yonatan, ana'na Gersom, cucunna Musa, a'jari imang mae ri ke'nanga. Iaminne jari-jarina Gersom tuli a'jari imang ri suku Dan sa'genna narapi' jammang nieranna nipela' umma' Israel mange ri pa'rasangang maraeng.