1 YOHANES 5:16 - KITTA' MATANGKASA'

¹⁶ Punna nia' nucini' parannu tu Karisteng a'gau' dosa natenaja nangngerang kamateang, paralluko appala' doang ri Allata'ala; nalanisaremo katallassang anjo taua. Anne natabaya iamintu tau a'gau' dosaya, mingka tenaja nangngerang kamateang. Mingka nia' gau' dosa angngerang kamateang; tena nakukana musti appala' doangko mae ri Allata'ala lanri anjo passalaka.

1 YOHANES 5:16 ပူးပေါင်းရင်းမြစ်များ

PA'JARIANG 20:17

Nipa'jari tamanang ngasemmi ri Batara sikontu baine niaka ri balla' kakaraenganna Abimelekh passabakkang Sara, bainenna anjo Abraham. Nampa appala' doammo Abraham ri Allata'ala, sa'genna nipa'jari baji' ammotere' Abimelekh. Bainenna siagang sikamma atanna bainea, nipa'jari baji' ngaseng tommi ammotere' sa'genna akkulle ngasemmi ammana' poleang.

PA'JARIANG 20:7

Mingka kamma-kamma anne poterangi mae ri bura'nenna. Na'bi bura'nenna antu bainea, na lanapappala' doangangko sollanna tena numate. Mingka punna tena nanupoterangi, u'rangi angkanaya ikau siagang sikontu ra'ya'nu lamate ngasengko!”

PAMMUJI 106:23

Jari ero'mi Allata'ala ampossoki umma'Na, mingka nipisangkai ri Musa, tunipileNa. Musa a'jari antangngai ke'nanga, sa'genna naung larroNa Allata'ala.

KALAPPASSANG 34:9

Nakana, “O Batara, punna ma'nassa nia' tojeng pangngellainTa mae ri nakke, kupalaki, poro amminawang laloKi' siagang ikambe. Anne bansaya memang kapala batui, mingka Kipammopporang laloi kaja'dallanna siagang dosana ikambe, siagang poro Kitarima laloi ikambe salaku umma' kalenTa.”

YEREMIA 11:14

Lanri kammana anjo Yeremia, teako appala' doangngi untu' ke'nanga yareka teako appala' tulungi mae ri Nakke untu' ke'nanga. Punna lalang kasukkarang ke'nanga nappala' tulung mae ri Nakke, tena Kuero' ampilangngeri ke'nanga.”

YEREMIA 14:11

Nakana Batara ri nakke, “Teako palakki ri Nakke untu' antulungi anjo tau sikammaya.

YEREMIA 7:16

Nakana Batara, “Yeremia, teako pappala' doangngangi anne sikamma taua. Teako appala' tulungi yareka appala' doangngi untu' ke'nanga; teako passaiA', nasaba' taeroKa' ampilangngeri anjo pappalaka.

YEHEZKIEL 22:30

Ri alla'na anjo tu Israel, a'boyA' tau akkullea ambangung tembo', yareka ammenteng ri tampa'-tampa' runtunga tembo'na untu' ampartahangkangi anjo pa'rasanganga punna erokKa' angngancuruki lalang a'bettese'na larroKu; mingka manna sitau tania' Kubuntulu'.

PAMMILANGNGANG 12:13

Jari ammarrammi Musa mae ri Batara, angkana, “O, Allata'ala, kupalaki, sollanna Kipammollei ammotere' battu ri garrinna!”

PAMMILANGNGANG 15:30

Mingka punna nia' tu Israel yareka bansa maraeng nakunjungi anggaukangi anjo dosaya, nabawang-bawangngangi Batara. Anjo tau kammaya musti nihukkung matei,

LUKAS 12:10

Punna nia' tau antumpaki kananNa Ana' Ma'rupataua akkulleji nipammopporang; mingka punna nahina RohNa Allata'ala, takkulleami nipammopporang.

YOHANES 17:9

Kupappala' doangangi ke'nanga. Teai untu' linoa naKuappala' doang, passangalinna untu' sikamma tau Kipassareanga mae ri Nakke, nasaba' iKatte pata anjo ke'nanga.

2 TIMOTIUS 4:14

Aleksander, anjo tukang tambagaya sanna' ja'dala'na panggaukanna mae ri nakke. Mingka lanibalasaki ri Batara situru' anjo panggaukanna.

1 YOHANES 5:17

Sikamma panggaukang salaya dosa ngaseng, mingka nia' dosa tenayaja nangngerang kamateang.

1 SAMUEL 12:19

Nakanamo ke'nanga mae ri Samuel, “Tulungi ikambe bapa'. Kipappala' doangangi ikambe anne mae ri Karaeng Allata'alanu, sollanna tamatea ikambe. Kamma-kamma anne sadara'mi ikambe angkanaya pantaranganna dosana ikambe riolo, dorakami pole ikambe lanri appala'na ikambe sitau karaeng.”

1 SAMUEL 2:25

Punna kasalang taua mae ri rupataua, akkullei nialleang ri Allata'ala. Mingka punna doraka taua mae ri Batara, inai akkulle antulungi?” Mingka tajampangiai ke'nanga anjo pappakainga'na Eli, manggena ke'nanga, nasaba' le'ba'mi Napattantu Batara untu' ambunoi ke'nanga.