1 YOHANES 4:4 - KITTA' MATANGKASA'

⁴ Mingka sikamma ana'-anakku, ikau tau battu ngasengko ri Allata'ala assala'nu. Le'ba'mi nubeta na'bi-na'bi balle-ballea, nasaba' Roh niaka ri kau la'bi makoasangangi na roh niaka ri taunna ngaseng anne linoa.

1 YOHANES 4:4 ပူးပေါင်းရင်းမြစ်များ

YOHANES 12:31

Kamma-kamma anne wattunnami niadeli linoa; lanitu'gurammi kakoasanna pamarentana anne linoa.

YOHANES 14:30

Tenamo nalajai dudu Kubicara mae ri kau ngaseng, nasaba' narapi'mi wattunna labattu pamarentana anne linoa. Mingka tena koasana mae ri KalengKu.

YOHANES 16:11

kammayatompa appakkaramulami Allata'ala angngadeli, nasaba' Nahukkummi tau anna'galaka koasa ri anne linoa.

YOHANES 17:23

asse'reA' siagang ke'nanga, na iKatte siagang iNakke, sollanna a'jari se're tojeng-tojeng ke'nanga. Jari lanaassemmi linoa angkana iKatte assuroA', siagang Kikamaseangi ke'nanga, sangkamma KikamaseangKu.

ROMA 8:31

Apamo lanikana kamma-kamma anne ri passala' kammaya ngaseng anjo? Punna Narurungangki' Allata'ala, maka inai akkulle angngewaki'?

ROMA 8:37

Tena! Ba'lalo lalang ri sikammaya ngaseng anjo anggappa maki' pammetang tojeng-tojenga lanri Ia mangngamaseanga mae ri katte ngaseng!

1 KORINTUS 2:12

Na ikatte anne teai roh battu ri anne linoa nisareangki', passangalinna Roh battu ri Allata'ala; sollanna niasseng ngaseng apa le'baka Napassareang Allata'ala mae ri katte ngaseng.

1 KORINTUS 6:13

Nia' todong angkana, anjo kanrea untu' battang, siagang anjo battanga nipasadiai untu' napantamai kanre. Mingka anjo ruaya, iamintu kanrea siagang battanga lanipattaena ngasengi ri Allata'ala. Anjo batangkalea takkulleai nipake untu' a'gau' bawang, mingka untu' poro nipake allayani mae ri Batara. Na Batarami lamparakai anjo batangkalea.

2 KORINTUS 4:4

Barhala ja'dala' niaka ri lino antongkoki pikkiranna tau tenaya natappa' ri anjo Kabara' Bajika. Iaminjo barhalaya anrompa-rompai ke'nanga sollanna tanacinika singara' battua ri anjo Kabara' Bajika, ri sese kalompoanNa Almasi, a'jaria pammatei rupanNa Allata'ala.

2 KORINTUS 6:16

Apa passisambunganna Balla'Na Batara siagang balla'na barhalaya? Ikattemi anne sanrapang Balla'Na Batara, iamintu Allata'ala attallasaka. KalenNa Allata'ala angkana, “LammantangA' ri tangnga-tangngana ke'nanga, na Kusikatallassang siagang ke'nanga. La'jariMa' Allata'ala mae ri ke'nanga, na la'jarimo ke'nanga ummakKu.

EFESUS 2:2

Anjo wattua nupinawangi kabiasanna ngaseng anne linoa; battuanna nuturuki ero' kakoasanna linoa; iamintu roh niaka angkoasai atinna sikontu tau tenaya namminawang turu' mae ri Allata'ala.

EFESUS 3:17

Naporo lanri tappa'nu mae ri Almasi, nammantammo Almasi lalang ri atinnu; siagang na'jari jarre'mo katallassannu lanri tatta'gala' jarre'namo pangngamaseanga lalang ri kalennu.

EFESUS 6:10

Kala'busanna, paralluko magassing, lanri kagassingang nugappaya battu ri kakoasanNa Batara, lanri asse'renu siagang Batara.

1 YOHANES 2:1

Sikamma ana'-anakku! Iaji nakutulisi' anne suraka kakukellaiko sollanna tena nugaukangi dosaya. Mingka punna nia' a'gau' dosa, nia' akkulle angngalleiki' iamintu Isa Almasi, Ia adeleka; laNapappala' tulungangki' mae ri dallekanNa Manggea.

1 YOHANES 2:13

Kutulisiki mae ri kau ngaseng sikamma bapa'-bapakku, nasaba' nuassemmi anjo Ia niaka memammo battu ri pakkaramulanna. Kutulisiki mae ri kau ngaseng, sikamma ana'-ana' rungkaya, nasaba' le'ba'mi nubeta anjo I Ja'dala'.

1 YOHANES 3:20

Punna nibilang salaki' ri ati mailalanta, niassengi angkanaya lompoangangi pangngassenNa Allata'ala na pangngassengang niaka ri atinta siagang Naasseng ngasengi sikontu apa-apaya.

1 YOHANES 3:24

Sikontu tau mappilangngeria mae ri sikamma parentaNa Allata'ala, asse'rei mae ri Allata'ala lalang ri katallassanna, siagang asse're tongi Allata'ala mae ri katallassanna. Na niasseng angkanaya asse'rei Allata'ala mae ri katallassanta, lanri le'ba'mi Napassareang RohNa mae ri katte.

1 YOHANES 4:13

Lanri le'ba'mi Napassareang RohNa Allata'ala mae ri katte, jari niassemmi angkanaya asse're maki' lalang katallassanta mae ri Allata'ala, siagang asse'remi Allata'ala mae ri katallassanta.

1 YOHANES 4:16

Niassemmi siagang tappa' maki' mae ri pangngamaseanNa Allata'ala mae ri katte. Anjo Allata'ala Iami mangngamaseang. Inai-nai nikoasai katallassanna ri pangngamaseang, iaminjo taua asse're katallassanna mae ri Allata'ala, siagang asse'remi Allata'ala mae ri katallassanna.

1 YOHANES 4:6

Mingka ikatte anne ana'-ana'Naki' Allata'ala; na inai-nai angngassengi Allata'ala, napilangngeri tommi bicaranta. Inai-nai teai taunNa Allata'ala tena nalaNapilangngeri bicaranta. Kammami anjo carata nakkulle niasseng antekamma sisalana Roh assarea pangngajarang tojeng, siagang roh ampasala oloangai taua.

1 YOHANES 5:19

Niassemmi angkanaya ikatte anne tau battuki' ri Allata'ala, manna pole nanikoasaimo sikontu linoa ri I Ja'dala'.

1 YOHANES 5:4

nasaba' sikamma ana'Na Allata'ala akkulle ngasengi nabeta anne lino ja'dalaka. Na anne linoa akkullei nibeta siagang katappakkanta.

PAPPICINI' 12:11

Le'ba'mi nibeta ri sari'battanta tete ri cera'Na anjo Ana' Gimbalaka, siagang tete ri katojenganna anjo biritta battua ri Allata'ala, ia le'baka napa'la'bang ke'nanga. Rellai ke'nanga angkoro'bangkangi kalenna sa'genna mate.