1 YOHANES 4:12 - KITTA' MATANGKASA'

¹² Tena manna sitau le'ba' anciniki Allata'ala; mingka punna massing sikamaseangki', asse'remi Allata'ala mae ri katte siagang a'jari sukku'mi pangngamaseanNa lalang ri kalenta.

1 YOHANES 4:12 ပူးပေါင်းရင်းမြစ်များ

PA'JARIANG 32:30

Le'baki anjo nakanamo Yakub, “Le'ba'ma' assibuntulu' rupa siagang Allata'ala kunampa attallasa' ija.” Lanri kammana naaremmi anjo tampaka Pniel.

KALAPPASSANG 33:20

Tena nalaKupappicinikang rupangKu mae ri kau, lanri inai-nai anciniki rupangKu tena olona lakkulle tuli attallasa'.

PAMMILANGNGANG 12:8

Siagang iNakke a'bicarA' sidallekang siagang ia, a'nyatai siagang tena nasangkamma boto-botoang. Ba'lalo manna rupangKu le'ba'mi nacini'! Angngapa nubarani angngewai Musa, anjo atangKu?”

YOHANES 1:18

Tenanniakka le'ba' anciniki Allata'ala, pantaranganna Ana' sitau-tauNa Manggea, sangkammaya siagang Manggea, na majarreka ri KalenNa. Iami ampa'nyatai Manggea ri Katte.

1 KORINTUS 13:13

Jari kamma-kamma anne nia' tallunrupa parallu nigaukang iamintu: matappa', ma'minasa siagang mangngamaseang; na ia Kaminang Lompoa ri anne tallua, iamintu, mangngamaseanga ri tau maraengang.

1 TIMOTIUS 1:17

Siratangi nipakalompo siagang tuli nipuji Allata'ala, Karaenna sikontu jammanga, lanri Iami mannannungang, tenaya nakacinikang siagang tenaya ruanna! Aming.

1 TIMOTIUS 6:16

Iaji bawang takkullea nikoasai ri kamateanga; Iami ammantang lalang ri singara' tenaya nakkulle nireppesi ri manna pole inai. Tena manna sitau le'ba' anciniki, yareka akkulle anciniki. Untu' Iami kala'biranga siagang kakoasanga sa'genna satunggu-tungguna! Aming!

IBRANI 11:27

Lanri tappa'na, natamallakamo Musa ri pangngalarroinna karaenga nanabokoi butta Mesir. A'lampami Musa mange ri tampa' lanatujua sangkamma le'ba' angkanaya le'ba'mi nacini' anjo Allata'ala tenaya nakacinikang.

1 YOHANES 2:5

Mingka inai-nai mappilangngeri ri kananNa Allata'ala, iaminjo taua sukku' batena angkamaseangi Allata'ala. Iaminjo a'jari pammatei angkanaya asse're maki' siagang Allata'ala lalang ri katallassanta.

1 YOHANES 3:24

Sikontu tau mappilangngeria mae ri sikamma parentaNa Allata'ala, asse'rei mae ri Allata'ala lalang ri katallassanna, siagang asse're tongi Allata'ala mae ri katallassanna. Na niasseng angkanaya asse'rei Allata'ala mae ri katallassanta, lanri le'ba'mi Napassareang RohNa mae ri katte.

1 YOHANES 4:16

Niassemmi siagang tappa' maki' mae ri pangngamaseanNa Allata'ala mae ri katte. Anjo Allata'ala Iami mangngamaseang. Inai-nai nikoasai katallassanna ri pangngamaseang, iaminjo taua asse're katallassanna mae ri Allata'ala, siagang asse'remi Allata'ala mae ri katallassanna.

1 YOHANES 4:20

Punna nia' tau angkana, “Kukamaseangi Allata'ala,” mingka nakabirisi paranna tau, paballe-ballei anjo taua. Nasaba' inai-nai tena nakamaseangi paranna tau, iamintu nacinika matanna, tena olona lakkulle nakamaseang Allata'ala, ia tenaya naciniki.

1 YOHANES 4:6

Mingka ikatte anne ana'-ana'Naki' Allata'ala; na inai-nai angngassengi Allata'ala, napilangngeri tommi bicaranta. Inai-nai teai taunNa Allata'ala tena nalaNapilangngeri bicaranta. Kammami anjo carata nakkulle niasseng antekamma sisalana Roh assarea pangngajarang tojeng, siagang roh ampasala oloangai taua.