1 YOHANES 3:12 - KITTA' MATANGKASA'

¹² Teako sangkammai Kain, ia battua ri I Ja'dala' assala'na, siagang ambunoai sari'battang kalenna. Apa saba'na nanabuno Kain sari'battanna? Nasaba' salai anjo apa-apa nagaukanga mingka annabai anjo apa-apa nagaukanga sari'battanna.

1 YOHANES 3:12 ပူးပေါင်းရင်းမြစ်များ

PA'JARIANG 4:25

Anggappami pole Adam siagang bainenna sitau ana' bura'ne. Nakanamo Hawa, “Nasarema' Allata'ala ana' bura'ne a'jari sambenna Habel, le'baka nabuno Kain.” Lanri kammana minjo nanaaremmo Hawa anjo anaka Set.

2 SAMUEL 13:22

Naboli'-boli'mi larro duduna Absalom mae ri Amnon siagang taerokami angngagangi akkana lanri le'ba'na nagau' sala andi'na iamintu Tamar.

PAMMUJI 37:12

Tu ja'dalaka a'rancanai kaja'dallang mae ri tu bajika, na birisi' ke'nanga anciniki.

PAMMUJI 38:20

Jai siagang kassaki sikamma tau ambalianga', birisiki ke'nanga anciniki bateku attallasa'.

PANGNGEBARANG 27:4

Anjo larroa pallaki siagang ammanraki, mingka inai akkulle attahang andallekangi akkimburua?

PANGNGEBARANG 29:10

Tau lambusu' pa'maika lanikabirisi ri tau pabuno-bunoa, mingka nijagai ri tau bajika.

PANGNGEBARANG 29:27

Tau bajika tena nasannang mae ri ja'dalaka; tau ja'dalaka nakabirisi tau bajika.

MATIUS 13:19

Anjo bine takkioroka ri aganga, iaminjo a'jari pangngebarang mae ri tau allangngerekami ri passala' antekamma bateNa Allata'ala ammarenta, mingka tanapahangai anjo kabaraka. Battui kaja'dallanga angngalleangi anjo apa le'baka nipakioro' ri atinna ke'nanga.

MATIUS 13:38

Anjo tanaya, iaminne linoa nataba. Na anjo lamungang bajika, iamintu tau a'jariamo umma'Na Allata'ala. Na anjo reaya, iamintu tau mannurukia ri Billisika.

MATIUS 23:35

Jari lanihukkung ngasengko sallang, lanri nubunona tau tenaya salana: Appakkaramula ri nibunona Habel tenaya salana, sa'genna nubunona Zakharia ana'na Berekia lalang ri alla'na Balla'Na Batara siagang tampa' pakkoro'bangnganga.

MATIUS 27:23

Akkuta'nammi Pilatus nakana, “Mingka apa kaja'dallanNa?” Pila' akkio' lompomi pole ke'nanga angkana, “Allei Salli'!”

MATIUS 5:37

Jari angkana mako bawang ‘Iyo’ punna iyo, yareka ‘Tena’ punna tena. La'biangang na anjo, pangngajara'na mami billisika.”

LUKAS 11:51

Iamintu pammunoang appakkaramulaya battu ri Habel sa'genna Zakharia, le'baka kajariang ri ampi'na pakkoro'bangnganga siagang Balla'Na Batara. Patappa'mi angkanaya: Passabakkang yangaseng minjo namattantumo lanihukkunna ngaseng anne taua ri anne jammanga.

YOHANES 10:32

Mingka Nakanamo Isa ri ke'nanga, “Nucini' ngasemmi panggaukang baji' le'baka Kugaukang, situru' tugasa' Napassareanga Manggea ri Nakke. Battu ri yangasenna anjo panggaukanga, kereanga a'jari saba' nanusiratang ansambilA' batu?”

YOHANES 8:40

Kupabattuang mako katojengang Kulangngereka battu ri Allata'ala, mingka ero' ngasengko ambunoA'. Na Abraham tena nakamma anjo panggaukanna!

YOHANES 8:41

Panggaukanna ngaseng manggenu antu nugaukanga ngaseng todong.” Appialimi ke'nanga angkana, “Ikambe anne teaiki' ana'-ana' harang. Se'reji manggena ikambe, iamintu KalenNa Allata'ala.”

LAMPA-LAMPANA 7:52

Maka nia' na'bi tanisessaya ri boe-boenu? Nabunoi ke'nanga tunisuroNa Allata'ala, le'baka ampabattui riolo dudu angkanaya labattui anjo Ata matojenNa Allata'ala. Na kamma-kamma anne le'ba'mi nupasikongkolang siagang nubuno anjo Ana'Na Allata'ala.

1 TESALONIKA 2:14

Sikamma sari'battangku, apa nukasiaka ri tallasa'nu, le'ba' tommi nakasia' sikamma jama'aNa Allata'ala ri butta Yudea, a'jaria taunNa Isa Almasi. Nukasiaki passessaya battu ri julu bansanu tonji, sangkamma nakasiaka sikamma Jama'aNa Allata'ala ri butta Yudea battu ri tu Yahudia.

IBRANI 11:4

Lanri tappa'na, nanapassareang Habel koro'banga mae ri Allata'ala, iamintu koro'bang bajikanganga na koro'bang napassareanga Kain. Lanri ia anjo tappa'na, nanitarimamo Habel ri Allata'ala a'jari tau baji'; nasaba' ma'nassami angkana nitarimai ri Allata'ala koro'banna. Matemi Habel, mingka lanri anjo tappa'na, tuli a'bicarana ija sa'genna kamma-kamma anne.

IBRANI 12:24

Isa nudallekang patteteang amparekai anjo parjanjiang berua; cera' nipa'ba'basaka nudallekang, iamintu cera' ampattantui la'bi baji'na apa-apaya, naia napattantua cera'na Habel.

1 PETRUS 4:4

Kamma-kamma anne lannasa'mi tau tenaya natappa' ri Batara, lanri tenamo nuturuki ke'nanga angkasiaki panggaukang dosaya lalang kara'massanga. Iaminjo saba'na nanahina mako ke'nanga.

1 YOHANES 3:8

Mingka inai-nai tuli a'gau' dosa, iami ana'na Billisika, nasaba' anjo Billisika doraka memammi battu ri pakkaramulanna. Untu' iaminne Nabattu Ana'Na Allata'ala, iamintu untu' angngancuruki jama-jamanna Billisika.

YUDAS 1:11

Cilaka ngasengi ke'nanga! Amminawammi ke'nanga rioloang le'baka naolo Kain. Napanaummi kalenna ke'nanga ri kalo'bang kalinguanga sangkamma Bileam, sollanna akkulle ke'nanga anggappa doe'. Na niancuru' tommo ke'nanga lanri angngewana sangkamma Korah.

PAPPICINI' 17:6

Nampa nasa'ring kucini' anjo bainea napakamma cera'na Umma'Na Allata'ala siagang cera'na tau nibunoa lanri tamamminrana mae ri Isa. Teai sipato' lannasakku ri wattunna kucini' anjo bainea.