1 YOHANES 2:29 - KITTA' MATANGKASA'

²⁹ Nuassemmi angkanaya mappilangngeri Almasi mae ri ero'Na Allata'ala lalang ri katallassanNa. Lanri kammana, musti nuasseng tongi angkanaya inai-nai mappilangngeri mae ri ero'Na Allata'ala lalang ri katallassanna, iami ana'Na Allata'ala.

1 YOHANES 2:29 ပူးပေါင်းရင်းမြစ်များ

YEREMIA 13:23

Maka akkullei tau le'lenga ampinrai kalenna, yareka macanga ampelaki ballanna? Tantu tena! Kammatommi anjo ikau biasaya a'gau' ja'dala', tena olonu lakkulle anggaukangi bajika.

ZAKHARIA 9:9

He pandudu'na Sion, rannu mako! He pandudu'na Yerusalem, makkio' rannuko! Ciniki! Battui Karaennu angngerang pammetang! Ia Karaeng adele' angngeranga kasalamakkang. Mingka tuna pa'maiki lalang kabattuanna A'dongko' keledai, sikayu keledai rungka.

YOHANES 1:13

teai lanri ri rupataua nanilassukang, nasaba' Allata'ala nakabattui anjo katallassang berua.

YOHANES 7:18

Inai-nai assare pangngajarang battu ri kalenna, anjo tau kammaya kala'birang untu' kalenna naboya. Mingka inai a'boya kala'birang untu' Ia anjo assuroai, anjo tau kammaya tau lambusu', tena balle-balle lalang ri kalenna.

LAMPA-LAMPANA 10:35

Inai-nai malla' ri Allata'ala siagang anggaukangi kabajikanga, iami nitarima ri Allata'ala, manna pole bansa apa.

LAMPA-LAMPANA 22:14

Nampa nakanamo pole Ananias mae ri nakke, ‘Napile mako Allata'alana boe-boeta, sollanna nuasseng ero'Na. Kammayatompa sollanna nucini' Isa, AtanNa Allata'ala anggaukangai ero'Na Allata'ala, kammayatompa nulangngere' kalennu sa'ranNa Isa.

LAMPA-LAMPANA 3:14

Ia tau matangkasa' siagang tau baji', mingka nukabirisi siagang nupassai Pilatus allappassangi tu pabunoa untu' ikau sollanna nihukkung anjo Isa.

2 KORINTUS 5:21

Tena dosaNa Almasi, mingka nipipisangiangi ri Allata'ala sikontu dosata mae ri Ia, sollanta akkulle assibajiki siagang KalenNa, lanri asse'retamo mae ri KalenNa Almasi.

IBRANI 7:2

Jari napassareammi Abraham mae ri Melkisedek bage sampulona battu ri sikontu barang-barang naallea battu ri balinna. (Battuanna anne areng Melkisedek uru-uruna iamintu, “Karaeng Kaadelang”; siagang pole lanri ia karaeng battui ri Salem, jari battuanna pole anne arenna iamintu “Karaeng Kasalewangang”.)

IBRANI 7:26

Jari, Ia minjo Isa Imang Malompo niparalluanga. Iami Imang matangkasa'; tena sikali kasalang yareka dosa ri KalenNa. Nisa'la'mi battu ri tau dorakaya, na nipanai' ri tampa' tinggianganga na sikontu langika.

YAKOBUS 1:18

Lanri ero' KalenNa na Napa'jariki' ana'-ana'na tete ri kana matojenNa. Nagaukammi anjo kammaya sollanta anggappa tampa' lomoro' se're ri tangnga-tangngana sikontu apa-apa attallasa' le'baka Napa'jari.

1 PETRUS 1:23

nasaba' tete ri Iami anjo kana mattallasa'Na siagang kana mannannunganNa Allata'ala nanunipa'jari tau beru; teai lanri nilassukannu ri rupataua, passangalinna battu ri Mangge mannannunganga.

1 PETRUS 1:3

Maeko nakiappala' sukkuru' mae ri Allata'ala, ManggeNa Batarata Isa Almasi! Sanna' mangngamaseanNa mae ri katte; lanri kammanami anjo naNasare maki' katallassang beru. Carana iamintu, Napattallasa' poleangi ammotere' Isa Almasi battu ri kamateanga. Iaminne assareki' panrannuang attantua.

1 PETRUS 3:18

Nasaba' le'ba'mi sikali mate Almasi untu' satunggu-tungguna passabakkang dosana rupataua; Ia tena salanna mingka matemi untu' tau salaya. Nagaukammi Almasi kammaya anjo sollannu akkulle Narurungang ngaseng mae ri Allata'ala. Nibunomi tubuNa, mingka nipattallasa' poleammi ammotere' katallassang rohaniNa.

2 PETRUS 1:4

Kammami anjo caraNa Allata'ala ampa'lammorangi barakka'-barakka' sannaka heba'na siagang sannaka lompona anggaranna mae ri katte, ia le'baka Napa'janjiang. Lanri iami anjo barakka'-barakkaka nakiakkullemo ta'lappasa' battu ri sikamma kaerokang ja'dalaka, akkullea angngerangi anne linoa mae ri possoka; sollanna nukkulle todong anggappa bageang lalang ri sipa' kakaraenganna.

1 YOHANES 2:1

Sikamma ana'-anakku! Iaji nakutulisi' anne suraka kakukellaiko sollanna tena nugaukangi dosaya. Mingka punna nia' a'gau' dosa, nia' akkulle angngalleiki' iamintu Isa Almasi, Ia adeleka; laNapappala' tulungangki' mae ri dallekanNa Manggea.

1 YOHANES 3:5

Nuassengi angkanaya battui Almasi untu' antangkasi dosa-dosana rupataua, siagang angkanaya tena dosa lalang ri KalenNa.

1 YOHANES 3:7

Sikamma ana'-anakku, teako passareangi kalennu nipasala oloang ri tau maraenga. Inai-nai anggaukangi ero'Na Allata'ala, iami ana'Na Allata'ala sangkamma todong Almasi Ana'Na Allata'ala.

1 YOHANES 4:7

Sikamma sari'battang sannaka kukarimangnginna! Mae mako kimassing sikamaseang; nasaba' Allata'ala assala'na anjo pangngamaseanga. Inai-nai mangngamaseang, iami ana'Na Allata'ala siagang iami angngassengi Allata'ala.

1 YOHANES 5:1

Inai-nai tappa' angkanaya iaminjo Isa, Karaeng Mappasalama' Napa'janjianga Allata'ala, iami Ana'Na Allata'ala. Na inai-nai mangngamaseang ri Manggea, nakamaseang tongi Anaka.

1 YOHANES 5:18

Niassengi angkanaya sikontu tau a'jariamo ana'-ana'Na Allata'ala, tenamo natuli a'gau' dosa ija; nasaba' nijagai ri Ana'Na Allata'ala siagang takkulleami I Ja'dala' a'gau' apa-apa mae ri ia.

1 YOHANES 5:4

nasaba' sikamma ana'Na Allata'ala akkulle ngasengi nabeta anne lino ja'dalaka. Na anne linoa akkullei nibeta siagang katappakkanta.

3 YOHANES 1:11

Sari'battangku, sannaka kukarimangnginna; teako turuki apa-apa kodia. Iamo apa-apa bajika nuturuki. Inai-nai a'gau' baji', iami anjo taua tau battu ri Allata'ala. Na inai-nai a'gau' ja'dala', ma'nassa tenapa nale'ba' sibuntulu' siagang Allata'ala.