1 YOHANES 2:15 - KITTA' MATANGKASA'

¹⁵ Teako karimangngi dudui anne linoa, yareka apa-apa mamo niaka ilalang ri anne linoa. Punna nukarimangngi dudui linoa, tenamo nalanukarimangngi Manggea.

1 YOHANES 2:15 ပူးပေါင်းရင်းမြစ်များ

MATIUS 4:8

Nampa nierang pole Isa ri billisika nai' ri moncong tinggi dudua, nampa nipicinikiang sikontu kakaraenganna siagang kakalumanynyanganna linoa mae ri Ia.

MATIUS 6:24

“Takkulleai se'rea tau ampa'jari atai kalenna mae ri ruaya karaeng. Nasaba' nia' lanangai, nania' latanajampangia kananna. Yareka la'bi a'dakkikangngangi mae ri se'reanga na maraengannaya. Ikau kamma tommako anjo. Takkulleako lampa'jari atai kalennu mae ri Allata'ala, punna nupa'jari ata todong kalennu mae ri pa'barang-baranganga.

LUKAS 16:13

Tenanniakka se're tau akkulle anjama mae ri ruaya pinggawa; nasaba' nia' lala'bi nakamaseangngang na maraengannaya, yareka la'bi jarrekangngangi pa'mai'na ri se'reanga na maraengannaya. Na nia' tanakamaseang. Kamma ngaseng tommako anjo. Takkulleako anjama-jama untu' Allata'ala nuanjama-jama todong untu' pa'barang-baranganga.”

YOHANES 15:19

Ebara' angkana napatangko anne linoa, lanakamaseangko anne linoa salaku apa-apanna. Mingka le'ba' mako Kupile battu ri anne linoa, jari teai mako patanna linoa. Iaminjo saba'na nanakabirisiko linoa.

ROMA 12:2

Teako amminawangngi ri atorang-atoranna anne linoa. Boli'mi kamma na Allata'ala ampa'jari berui sipa'-sipa' niaka ri kalennu, sollannu akkulle tappinra. Lanri kammanapi anjo nampa akkulle nuasseng apa Nakaerokanga Allata'ala – iamintu apa nikanaya baji', siagang sukkuka ganna'na, kammayatompa nikarannuanga ri atinNa Allata'ala.

GALATIA 1:10

Punna kamma, gassingka nukana kuminasai sollangku niakui ri rupataua? Tena sikali! Allata'ala bawang kuminasai angngakuia'. Maka erokkuji ningai ri rupataua nakualle pa'mai'na? Punna kamma anjo bateku, teaiya' tunisuroNa Almasi.

EFESUS 2:2

Anjo wattua nupinawangi kabiasanna ngaseng anne linoa; battuanna nuturuki ero' kakoasanna linoa; iamintu roh niaka angkoasai atinna sikontu tau tenaya namminawang turu' mae ri Allata'ala.

1 TIMOTIUS 6:10

Nasaba' battu ri sipa' cinnayami ri doe' ammumba a'rupa-rupaya kaja'dallang. Nia' sipa'gang tau angngondang dudu doe' siagang tenamo naturuki pangngajarang Karistenga, sa'genna nituju ke'nanga ri jai kasessang angngancurukai atinna ke'nanga.

YAKOBUS 1:27

Tutu situlusu'na siagang sitojennaya ri agamaya situru' paccini'Na Allata'ala, iamintu annulunga ana'-ana' kukang siagang janda-janda kasi-asi, kammayatompa mangngatutui ri kale sollanna tena nanipanraki ri anne linoa.

YAKOBUS 4:4

Teai ngasengko tau majarre'! Maka nuassengi angkanaya punna agangko mae ri linoa, a'jari musuko mae ri Allata'ala? Jari inai-nai ero' a'jari agang mae ri anne linoa, napa'jarimi kalenna musu mae ri Allata'ala.

1 YOHANES 3:17

Punna nia' tau angkammai pa'barang-baranganna linoa, nampa nacini' paranna tau kakurangang, mingka taerokai antulungi anjo paranna tau, antekamma lakkulle nikana nakamaseangi Allata'ala?

1 YOHANES 4:5

Anjo na'bi-na'bi balle-ballea sangnging passala' linoa nabicara; nipilangngerimi bicaranna ke'nanga ri anne linoa, nasaba' anjo ke'nanga tau battu ri linoa assala'na.

1 YOHANES 5:10

Lanri kammana, inai-nai tappa' ri Ana'Na Allata'ala, natarimami anjo kasa'bianga lalang ri atinna; mingka inai-nai tena natappa' mae ri Allata'ala, nacini' paballe-ballemi Allata'ala, nasaba' tena napatappaki bicaranNa Allata'ala ri passala'na anjo Ana'Na.