1 YOHANES 2:12 - KITTA' MATANGKASA'

¹² Kutulisiki anne suraka mae ri kau ngaseng ana'-anakku, nasaba' le'ba'mi nipammopporang dosa-dosanu lanri Almasi.

1 YOHANES 2:12 ပူးပေါင်းရင်းမြစ်များ

PAMMUJI 106:8

Mingka Batara Napasalamaki ke'nanga lanri kalenna tonji, sollanna a'jari a'nyata kaporeanNa.

PAMMUJI 25:11

O, Batara, Kipammopporanga' situru' janjinTa, saba' lompoi kasalangku.

YEREMIA 14:7

Akkioki ummakKu angkana, ‘Batara manna pole naniutung ikambe ri dosana mingka Kitulungi ikambe situru' janjinTa. A'mole-mole maKi' nibokoi ri kambe; tojeng, dorakami ikambe ri Katte.

LUKAS 24:47

Kammayatompa, lalang arenNa anjo Karaeng Mappasalamaka, musti nibirittakangi mae ri sikontu bansaya angkanaya musti tobaki sikontu rupataua, kammayatompa Napammopporangi Allata'ala dosa-dosaya. Na anjo birittaya, musti nipabattui appakkaramula battu ri Yerusalem.

LUKAS 5:20

Ri wattunna Nacini' Isa antekamma tappa'na ke'nanga, Nakanamo ri anjo tau pesoka, “Sari'battang, nipammopporammi dosanu.”

LAMPA-LAMPANA 10:43

Sikontu na'bi-na'bia, le'ba' ngasemmi nabicara riolo anjo passalaka. Nakana ke'nanga, sikamma tau tappaka ri Isa lanipammopporangi dosa-dosana, lanri kakoasanNa Isa.”

LAMPA-LAMPANA 13:38

Lanri kammana minjo sari'battangku ngaseng, musti nuasseng ngasengi angkanaya ilalang arenNa minjo Isa nanipabattumo anjo kabara' nipammopporanna dosaya mae ri kau ngaseng; musti nuassengi angkanaya inai-nai tappa' ri Ia, lanipata'lappasaki battu ri sikontu dosaya, tenaya nakkulle nipata'lappasa' lanri sikamma parentaNa Allata'ala napassareanga Musa.

LAMPA-LAMPANA 4:12

Lalang bawang ri Isa nakkulle nipasalama' rupataua. Nasaba' ri sikontu anne linoa, tenanniakka se're tau le'ba' nisare koasa ri Allata'ala untu' ampasalamakki', pantaranganna Isa Almasi.”

1 KORINTUS 6:11

Nia' siapa are jainu appanggaukang kamma anjo riolo. Mingka kamma-kamma anne le'ba' mako nitangkasi battu ri dosa-dosaya, sollannu a'jari umma' matangkasa'Na Allata'ala. Le'ba' mako assibajiki ammotere' siagang Allata'ala lanri tappa'nu mae ri Batara Isa Almasi siagang lanri koasa Roh battu ri Allata'alata.

EFESUS 1:7

Nasaba', nilappassang maki' ri Allata'ala, lanri kamateanNa Almasi; battuanna le'ba'mi nipammopporang dosa-dosata.

EFESUS 4:32

Paralluko baji' ati siagang tuna pa'mai' mae ri massing para ikau; kammayatompa massing sipammopporangko, sangkamma todong Napammopporangko Allata'ala tete ri Almasi.

KOLOSE 1:14

Lanri Iaminjo Ana'Na nakinilappassang; battuanna le'ba'mi nipammopporang dosa-dosata.

1 YOHANES 1:4

Natulisi'mi ikambe anne suraka sollanna rannu tojeng-tojeng pa'maitta.

1 YOHANES 1:7

Mingka punna attallasakki' lalang ri singaraka, sangkamma Allata'ala niaki lalang ri singaraka, assiama' maki' massing para ikatte lalang ri katallassanta; kammayatompa nitangkasimi sikontu dosa-dosata lalang ri cera'Na Isa, Ana'Na Allata'ala.

1 YOHANES 1:9

Mingka punna nimangakui dosa-dosata mae ri Allata'ala, laNarupaimi janjinNa siagang laNagaukammi apa-apa adeleka mae ri katte. LaNapammopporangi dosa-dosata siagang laNatangkasiki' battu ri sikontu kaja'dallanga.

1 YOHANES 2:1

Sikamma ana'-anakku! Iaji nakutulisi' anne suraka kakukellaiko sollanna tena nugaukangi dosaya. Mingka punna nia' a'gau' dosa, nia' akkulle angngalleiki' iamintu Isa Almasi, Ia adeleka; laNapappala' tulungangki' mae ri dallekanNa Manggea.

1 YOHANES 2:21

Jari kutulisiki anne suraka mae ri kau ngaseng teai lanri tenanapa nanuassengi pangngajarang tojenga, mingka ba'lalo lanri nuassennamo; siagang nuassenna tommo angkanaya anjo pangngajarang tojenga tale'bakai a'balle-balle.

1 YOHANES 2:7

Sikamma sari'battang sannaka kukarimangnginna! Anne apa kutulisika teai parenta beru. Anne parenta sallomo, le'bakamo nipabattu mae ri kau ngaseng battu ri uru-uruna tappa'nu mae ri Almasi; iamintu biritta battu ri Allata'ala le'bakamo nulangngere' ri pirangalloang.