1 TIMOTIUS 6:12 - KITTA' MATANGKASA'

¹² Usaha tojeng-tojengko untu' apa nupatappaka salaku tu Karisteng, kammayatompa parallui nugappa hadia sitojennaya siagang mannannunganga. Nasaba' untu' iaminjo Nanakiokko Allata'ala ri wattunna numangakui ri dallekanna taua angkanaya tappa' mako mae ri Almasi.

1 TIMOTIUS 6:12 ပူးပေါင်းရင်းမြစ်များ

PAMMUJI 63:8

saba' iKattemi le'ba' antulunga'; akkelong rannua' lalang la'lanna ka'nyitTa.

PANGNGEBARANG 3:18

Tau manna'gala' jarreka ri kacara'dekanga lanakasiaki katallassang sitojennaya siagang mate'nea.

KELONG MALA'BIRI' 3:4

Silalonna kubokoi ke'nanga, kugappami tu ta'dongkoka ri atingku. Kuta'gala'mi, taeroka' allappassangi sa'genna kuerang mange ri balla'na ammakku, ri bili'na tungnganakkangku.

YESAYA 44:5

Tasse're-se're tau lamangakui angkana iNakke ampatangi, na battu asse're siagang turunganna Yakub. Massing natulisiki ri limanna angkana: Batara Ampatangi, na naareng kalenna anggotana umma'Na Allata'ala.”

ZAKHARIA 10:5

Lammetai pandudu'na Yehuda sangkamma pejuang-pejuang angngonjo'-ngonjokangi musunna rapang butta peo' ri aganga. Labarjuangi ke'nanga lanri iNakke, Batara ambantuai ke'nanga; siagang lanabetai ke'nanga sikamma musu a'dongko' jaranga.

2 KORINTUS 6:7

lalang koasaNa Allata'ala nanibirittakang kabara' battua ri Allata'ala; na lanri kammanami anjo nanapappicinikammo ikambe angkanaya ikambe anne ma'nassa atanNaki' Allata'ala. Anna'gala' jarre' maki' mae ri ero'Na Allata'ala. Iaminjo a'jari kagassinganna ikambe untu' langngewa yareka lanjagai kalenta punna battu mae musu lammanrakia.

2 KORINTUS 9:13

Na battu ri iami anjo kabajikang nupappicinikanga, najaimo tu Karisteng ri Yudea lamammuji mae ri Allata'ala. Lanri nacini'na ke'nanga antekamma jarre'nu mae ri Kabara' Baji' nupinawanga, iamintu ri sesena Almasi. Kammayatompa mammujimi ke'nanga ri Allata'ala lanri lammoro'na pa'mai'nu ambage-bagei ke'nanga siagang tau maraenga, apa-apa niaka ri kau.

PAOLE 26:3

A'lampamako mange ri imang tugasaka anjo wattua, siagang paui mae ri ia angkana, ‘Kupaumi mae ri Karaeng Allata'alanu angkanaya antamama' ri pa'rasangang Napa'janjianga Batara mae ri boe-boena ikambe untu' laNapassareang mae ri katte.’

FILIPI 1:30

Kamma-kamma anne amminawang ngaseng tongko siagang inakke lalang anne se'rea jama-jamang; iamintu jama-jamang le'baka nucini' kugaukang riolo, siagang kugaukanga ija sa'genna ri kamma-kammaya anne, kamma nulangngereka kamma-kamma anne.

KOLOSE 3:15

Parallui passiamakkang Napassareanga Almasi lalang ri atinnu ampattantui apa-apa eroka nutappuki. Nasaba' Nakiokko Allata'ala untu' a'jari anggota ri se'rea tubu, sollannu akkulle attallasa' lalang passiamakkang lanri anjo Almasi. Paralluko appala' sukkuru'.

1 TESALONIKA 2:12

Kipakainga' mako, kipamajuko, siagang kikellai tojengko attallasa' situru' ero'Na Allata'ala, sa'genna nupakasannang atinNa. Nasaba' le'ba' mako Nakio' Allata'ala untu' a'jari umma'Na lalang ri Lino BeruNa siagang lalang ri kalompoanNa.

2 TESALONIKA 2:14

Tete ri Kabara' Baji' napabattua ikambe mae ri kau ngaseng naNakiokko Allata'ala. Nakiokko Allata'ala, lanri eroki Allata'ala sollanna nunggappa todong pammantangang lalang ri kalompoanNa Batarata Isa Almasi.

1 TIMOTIUS 1:18

Anakku, Timotius! Kupappirannuangi anne jama-jamanga mae ri kau, lanri kuu'ranginna pappasanNa Allata'ala, napabattua na'bi-na'bia ri tangnga-tangngana jama'aka ri passala'na kalennu. Parallui nupa'jari sanrapang bokong anjo pappasanga, lalang jama-jamang bajika.

1 TIMOTIUS 1:19

Appattujuang mako na nuanna'gala' majarre' ri katappakkang tojenga siagang ati mailalang. Nia' tau tanajampangiai sa'ra ati mailalanna, sa'genna ancuru'mo tappa'na ke'nanga.

1 TIMOTIUS 4:14

Teako takkaluppai ampakei passareNa RohNa Allata'ala ri wattunna napatompang limanna pamimping-pamimping jama'aka irate ri ulunnu, kammayatompa ri wattunna napabattu na'bi-na'bia pappasanNa Allata'ala ri passala'na kalennu.

1 TIMOTIUS 6:13

Na kamma-kamma anne, ri dallekanNa Allata'ala assarea nyawa sikontu apa-apa attallasaka kammayatompa ri dallekanNa Isa Almasi assarea kasa'biang tojeng mae ri Pontius Pilatus, iaminne kuparentakanga mae ri kau:

1 TIMOTIUS 6:19

Lalang kammana anjo, napasse'remi ke'nanga pa'barang-barangang akkullea a'jari modala' baji' untu' jammang labattua sallang. Siagang lanri kammanami anjo nalanagappamo ke'nanga katallassang mannannunganga, iamintu katallassang sitojennaya.

2 TIMOTIUS 1:9

Napasalamakki' siagang Nakiokki' Allata'ala untu' a'jari umma' KalenNa. Iaji naNagaukang Allata'ala anjo kammaya teai lanri apa-apa le'baka nigaukang nabilang ri kalenta, passangalinna lanri ero' KalenNa siagang lanri pangngamaseang malammoro'Na tete ri Isa Almasi, ri wattu tenanapa nanipa'jari anne linoa.

2 TIMOTIUS 2:2

Anjo pangngajarang le'bakamo nulangngere' battu ri nakke ri dallekanna tau jaia, parallui nupappirannuang mae ri sikamma tau akkullea nipatappa' siagang cara'deka angngajaraki tau maraenga.

2 TIMOTIUS 4:7

Le'ba'ma' sanrapang amminawang appa'lumba sibaji'-baji'na, siagang anrapi'ma' battu mae ri bassika. Tuli anna'gala' majarreka' lalang tappakku mae ri Isa sanggenna kale'bakkanna.

IBRANI 13:23

Parallui nuasseng angkanaya nilappassammi sari'battanta Timotius battu ri tarungkua. Punna battu sallang anrinni ri tampakku, kuerang tonji antu sallang battu angkunjungiko.

IBRANI 3:14

Ikatte anne bela sipanjama-jamanna ngasengki' Almasi, assala' tuli nita'gala' jarreki katappakkang niaka ri katte battu ri uru-uruna sa'genna kala'busang.

IBRANI 6:18

Anjo ruaya passala' takkulleai lamminra; tena olona la'balle-balle Allata'ala ri janjinNa siagang sumpaNa! Lanri kammana, ikatte tau a'la'langamo irawanganNa Allata'ala, nikellaiki' anna'gala' jarre' mae ri panrannuang niaka ri dallekanta.

1 PETRUS 3:9

Teako pasibalasaki kaja'dallanga siagang kaja'dallang, yareka kana-kana pali'bo siagang kana-kana pali'bo; mingka pappalakkangi barakka' mae ri Allata'ala; iaminjo nupa'balassang. Nasaba' iaji naNakiokko Allata'ala kaNakellaiko sollannu akkulle annarima barakka' battu ri Ia.

1 PETRUS 5:10

Mingka punna le'ba' mako sessa sinampe', KalenNa Allata'ala lampa'jari sukkukko. LaNapaentengko, siagang laNasareko kagassingang kammayatompa laNapakajarrekko. Nasaba' Iami Allata'ala sannaka baji'na pa'mai'Na; Iami le'baka angkiokko untu' angkasia' tongi kala'birang mannannunganga tete ri Almasi.

1 YOHANES 2:25

Na iaminne Napa'janjianga KalenNa Almasi mae ri katte: Katallassang sitojennaya siagang mannannunganga.

YUDAS 1:3

Sikamma sari'battangku sannaka kukarimangnginna! Sanna' dudu erokku annulisi' sura' mae ri kau ngaseng ri passala'na kasalamakkang nitarimayamo. Mingka kamma-kamma anne erokka' kusa'ring ampakaingakko lalang ri anne suraka, sollannu barjuang turus untu' katappakkanta; anjo katappakkanga sikaliji Napassareang Allata'ala sa'genna satunggu-tungguna mae ri Umma'Na.

PAPPICINI' 3:3

Jari, u'rangi ammotere' apa le'baka nipangngajarrang mae ri kau riolo siagang apa le'bakamo nulangngere'. Gaukangi anjo sikammaya, siagang toba' ngaseng mako battu ri dosa-dosanu. Punna tambangungako, labattuA' mae ri kau sanrapang palukkaka; natanuassenga angkanaya ringngapanna wattua naKulabattu.

HAKING-HAKING 3:2

NaNagaukang Batara kammaya, lanri ero'Naji bawang Naajara' a'bundu' sikontu turunganna bansa Israel, la'bipa mae ri ia ke'nanga, tenayapa nale'ba' amminawang a'bundu'.