1 TIMOTIUS 4:12 - KITTA' MATANGKASA'

¹² Teako pa'biangi kalennu nicini' tuna lanri rungkanu ija. Mingka paralluko a'jari conto mae ri sikontu tau tappaka ilalang ri pau-paunu, panggaukannu, katappakkannu, pangngamaseannu, kammayatompa katangkassanna katallassannu.

1 TIMOTIUS 4:12 ပူးပေါင်းရင်းမြစ်များ

ZAKHARIA 2:4

Nakana malaeka' makase'rea mae ri malaeka' makaruaya, “A'lampako linta' mange ri anjo tau rungkaya, siagang pauangi angkanaya lateai sipato' rassina kota Yerusalem napakamma tau siagang olo'-olo' niparakai, sa'genna tena olona lakkulle nibangung tembo' pakkallika ri tammulilina.

MATIUS 18:10

“Tutuko! Tea' laloko hinai kalase'renna anne tau ca'di kammaya. Nasaba' u'rangi angkanaya, tuli niaki malaeka'na ke'nanga ri dallekanNa ManggeKu ri suruga. [

1 KORINTUS 11:1

Iaminjo conto battu ri nakke mae ri kau. Mingka inakke conto battu tonji ri Almasi kupinawang.

FILIPI 4:8

Na kala'busanna, sari'battangku ngaseng, parallui nubonei pikkirannu siagang apa-apa niaka anggaranna, siratanga nipuji, iamintu: apa-apa annabaya, mala'birika, adeleka, matangkasaka, mate'nea, siagang bajika.

1 TESALONIKA 1:6

Nucontoimi katallassanna ikambe siagang Batara. Manna teai sipato' pa'risi'na katallassannu, mingka nutarima tonji siagang rannu pa'mai'nu anjo kabara' napabattua ikambe mae ri kau ngaseng. Anjo karannuanga RohNa Allata'ala assareko.

1 TESALONIKA 2:10

Matangkasaki, tojengi, siagang tena callanna katallassanna ikambe mae ri kau ngaseng, ikau matappakamo mae ri Almasi. Ikau ngasemmi siagang Allata'ala, a'jari sa'bina ikambe.

1 TIMOTIUS 1:14

Mingka ba'lalo nipila'bi-la'bianga' kalammorang pangngamaseang ri Batarata. Nasarea' pakkulle untu' tappa' ri Ia, siagang pangngamaseang akkullea nipatang punna asse'reki' siagang Isa Almasi lalang ri katallassanta.

2 TIMOTIUS 2:15

Paralluko attojeng-tojeng appattujuang sollanna Naakuiko Allata'ala angkanaya ma'nassa tau siratang memang tongko anjama untu' Allata'ala. Usahako sollanna tena nu'jari siri'-siri' passabakkang jama-jamannu; passangalinna pangngajarrangi baji'-baji' sikamma pangngajarang tojeng battua ri Allata'ala.

2 TIMOTIUS 2:22

Pakabellai kalennu battu ri kasannang-sannanganna tau rungkaya. Usahako untu' attallasa' situru' ero'Na Allata'ala, untu' majarre' tappa'nu mae ri Ia, mangngamaseang ri parannu tau siagang nia' kasannangang ri atinnu. Kammami anjo batenu attallasa' siagang sikamma tau akkioka appala' tulung mae ri Batara situlusu' atinna.

2 TIMOTIUS 2:7

Nawa-nawa bajiki anne kupaua, nasaba' laNasareko pakkulle Batara untu' ampahang ngasengi anne passalaka.

TITUS 2:15

Pangngajarrangi yangasenna anjo, siagang pakaingaki kammayatompa piu'rangi sikamma tau mallangngereka; usahakangi nangngali' ke'nanga mae ri kau. Teako pa'biangi kalennu nicini' tuna ri taua.

TITUS 2:7

Siagang paralluko ikau kalennu, lalang ri apa-apa mamo, ampappicinikangi conto bajika lalang ri panggaukannu. Punna angngajarakko, musti lambusukko siagang attojeng-tojengko.

YAKOBUS 3:13

Punna nia' tau cara'de' siagang baji' ateka' ri tangnga-tangnganu, parallui napappicinikang katallassang bajika, nagaukangi apa-apa bajika, kammayatompa cara'deki na tuna pa'mai' ri katallassanna.

YAKOBUS 3:17

Mingka inai ampatangi kacara'dekang battu ratea ri suruga, iami maci'nong, nangai assiamaka, sombereki, siagang mappilangngeri. Iami sanna' jaina pangngamaseanna siagang a'nyatami panggaukang-panggaukang baji'na. Tena nabattala' siali, siagang tena nangai assara-sarai.

1 PETRUS 5:3

Teako a'jari kammai tau koasa mae ri ke'nanga, nipappirannuanga mae ri kau. Mingka a'jariko conto baji' mae ri ke'nanga.