1 SAMUEL 7:6 - KITTA' MATANGKASA'

⁶ A'rappungang ngasemmi ke'nanga ri Mizpa. Anynye'ro'mi ke'nanga je'ne' nampa napatiri' salaku passare mae ri Batara, nampa appuasa ke'nanga siallo kabusu', anjo alloa. Nakanamo ke'nanga, “Dorakami ikambe mae ri Batara.” (Anjoremmi ri anjo Mizpa napakaramulai Samuel ampakabajiki sikamma parkara passisala-pasalanga ri tu Israel.)

1 SAMUEL 7:6 ပူးပေါင်းရင်းမြစ်များ

PA'JARIANG 31:49

Nakanamo pole Laban, “Poro Batara anjannangngiki' ilalang tallasa' sikabellainta.” Lanri kammana anjo tampaka niareng tommi Mizpa.

2 SAMUEL 14:14

Ikatte lamate ngasengki'; ikatte anne rapangki' je'ne' tattumpaya naung ri buttaya siagang tenaya nakkulle nipasse're ammotere'. Manna Allata'ala tena todong nalaNapattallasa' ammotere' tau mateamo; lanri kammana anjo poro kiusahai laloi karaeng sollanna akkulle ammotere' poleang tau nipelaka.

1 KARAENG-KARAENG 8:47

poro Kipilangngeri pappala' doanna ke'nanga. Punna anjoreng ri pa'rasanganga nabokoi dosa-dosana ke'nanga, nappala' doang mae ri Katte namangaku angkana dorakami siagang a'gau' ja'dala'mi ke'nanga, Kipilangngerimi pappala' doanna ke'nanga, o Batara.

1 PATTOTTORANG 11:18

Nalangngere'na akkana kamma Daud, a'lampa cokko'-cokkomi anjo tallua perwira angngolo ri tampa' kemana tu Filistin, nampa anynye'ro' je'ne' battu ri anjo bungunga, nampa naerang mange ri Daud. Mingka taerokai Daud angnginungi, ba'lalo natumpai anjo je'neka salaku napassareang mae ri Batara.

2 PATTOTTORANG 20:3

A'jari malla'mi Yosafat nampa appala' doang untu' appala' pangngunju' battu ri Batara. Nampa naparentakang sollanna appuasa kabusu' sikontu ra'yaka.

NEHEMIA 9:27

Jari Kipassareammi ke'nanga mae ri musunna sekkeka angkoasai siagang anjallakkangi ke'nanga. Mingka lalang nijallakkanna lalang kasusaang, akkio'mi ke'nanga appala' bantuang. Mappilangngeri maKi' battu ri suruga; sanna' mangngamaseanTa nakipiali. Kipabattui pamimping siagang pahlawang allappassangai ke'nanga battu ri musu.

AYUB 16:20

Kunicau-cau siagang nikakkali ri bela-belaku; angngarruka' andallekang ri Allata'ala appala' bantuang.

AYUB 3:24

Sambenna angnganrea, akkunrarenga', tena ammariku a'rikong.

AYUB 33:27

Na lanakanamo ri dallekanna tau jaia, ‘Lompoi dosaku, lanri ja'dalaka kukana baji', mingka tena Nahukkunga' Allata'ala.’

AYUB 42:6

Lanri kammana anjo, tu'guru' siri'-sirika' punna kuu'rangi sikamma kana-kanangku na kusassala' kalengku ammempoma' lalang ri limbu'buka siagang aua.”

PAMMUJI 106:6

Dorakami ikambe sangkamma boe-boena ikambe; a'gau' ja'dala'mi siagang dorakami ikambe.

PAMMUJI 119:136

Assolongi je'ne' matangku sanrapang binanga, lanri tenana nituruki hukkunTa.

PAMMUJI 42:3

Nakkuka' ri Allata'ala mattallasaka, angngapapi kunampa akkulle mange assambayang ri Balla'Na?

PAMMUJI 6:6

Saba' lalang ri lino kamateang taniu'rangia maKi'; tenamo tau mammuji ri Katte lalang linona tu matea.

PAMMUJI 62:8

Iami Allata'ala assarea' kasalamakkang siagang kalompoang, Iami pa'la'langangku siagang angngagangnganga' makassaka.

YEREMIA 31:19

Le'baki ma'boko ikambe mae ri Katte, mingka assesse'lalammi ikambe ri gau' kammana anjo. Ri le'ba'namo Kihukkung ikambe, ta'dundumi ulunna ikambe napakamma si'na. Siri'-siriki ikambe siagang a'jari tunai lanri dorakanamo ikambe ri wattu rungkana.’

YEREMIA 36:9

Ri bulang salapang taung makalima pamarentahanna Yoyakim karaeng Yehuda, appuasai ra'yaka untu' ampalaki pangngamaseanNa Batara. Pandudu'na Yerusalem siagang sikamma tau battua ri kota-kota Yehuda, appuasa ngasengi.

YEREMIA 9:1

Tamaka baji'na ka'de' ulungku rapangi bungung rassia je'ne', na matangku rapangi salu' je'ne' tulusu' assolonga je'ne'na! Nakuakkulle angngarru' allo bangngi, angkarruki julu bansaku nibuno ri musu.

PIRAUNG 2:11

Akkambammi matangku lanri tenammariku angngarruka tojeng, pa'risi' nyawaku tena rapanna. Pacce nyawaku anciniki runtung bansaya; anciniki ana'-anaka siagang ana' loloa sessa ri tangngana aganga ri kota-kotaya.

PIRAUNG 3:49

Tena kulammari angngarru',

PIRAUNG 5:16

Tenami kalompoanna ikambe cilakami ikambe napakamma doraka.

YEHEZKIEL 20:4

He tau, sadia mako untu' angngadeli ke'nanga? Gaukammi! Pakaingaki ke'nanga sikontu kakodiang le'baka nagaukang boe-boena ke'nanga.

HOSEA 5:1

Nakanana Batara, “Pilangngeri, he sikamma imanga! Parhatikangi, he tu Israel! Pilangngeri, he jari-jarina karaenga! Le'ba'mi nipattantu hukkunganga mae ri kau. Nasaba', mustina adelekko angngadeli, mingka kabalekanna a'jari mako rapang tado' ri Mizpa, rapang sikko' nitannanga ri Bulu' Tabor,

YO"EL 2:12

Nakana Batara, “Mingka kamma-kamma anne, pakkalepumi atinnu ammotere' mae ri Nakke, nuppuasa, appiraung siagang angngarru'.

KAIMANGNGANG 16:29

Anne paratorang-paratoranga musti nituruki sa'genna satunggu-tungguna. Ri tanggala' sampulo bulang tuju, tu Israel siagang bansa maraeng ammantang tulia ri alla'na ke'nanga musti appuasai siagang tanipa'biangai anjama, nasaba' anjo alloa iamintu allo teai sipato' matangkasa'na. Anjo alloa musti nigaukangi upacaraya untu' antangkasi bansa Israel battu ri sikontu dosana ke'nanga sollanna a'jari matangkasa'.

KAIMANGNGANG 26:40

Mingka lanaakui jari-jarinu dosana ke'nanga siagang dosana boe-boena ke'nanga, ia tamannurukia siagang angngewaya mae ri Nakke,

LUKAS 15:18

Erokka' a'lampa, ammotere' mae ri manggeku, nampa kukana ri ia: O, Bapa', dorakama' mae ri Allata'ala siagang mae ri katte.

HAKING-HAKING 10:10

Jari akkio'mi umma' Israel appala' tulung ri Batara, angkana, “Dorakami ikambe mae ri Katte; tenamo namangngu'rangi ikambe mae ri Katte, o Allata'ala! Anynyombami ikambe mae ri rewata-rewata Baalka.”

HAKING-HAKING 10:15

Mingka nakanamo umma' Israel mae ri Batara, “Dorakami ikambe, Batara. Kigaukammi manna apa erotTa, assala' Kitulungi ikambe anne alloa.”

HAKING-HAKING 2:4

Le'baki napabattu malaekaka anjo birittaya, angngarru' lompo ngasemmi bansa Israelka.

HAKING-HAKING 20:26

Jari a'lampami pole umma' Israel mange ri Betel nampa angngarru' mae ri Batara. Anjoreng appuasai ke'nanga sa'genna bangngi siagang assarei koro'bang passiamakkang na koro'bang nitunu mae ri Batara.

HAKING-HAKING 3:10

Anjo Otniel nipimpingi ri RohNa Batara sa'genna a'jarimo pamimping mae ri umma' Israel. A'lampami mange a'bundu'. Na nisaremo pakkulle sa'genna nabeta anjo karaeng battua ri Mesopotamia.

1 SAMUEL 1:15

Mingka appialimi Hana angkana, “Tena nakunasa'ring, bapa', siagang tena sikali nakuangnginung anggoro'! Nakke tappu' panrannuanga', siagang sitabanga' appala' doang ancarita ngasengi kapa'risangku mae ri Batara.

1 SAMUEL 10:17

Nakio'mi Samuel sikontu ra'ya' Israel sollanna a'rappungang ri Mizpa.

1 SAMUEL 12:10

Nampa appala' doang ke'nanga mae ri Batara siagang namangakuimi dosa-dosana ke'nanga, angkana, ‘Dorakami ikambe lanri nabokoinTa, o Batara, siagang anynyombami ikambe mae ri patung-patunna Rewata Asytoret siagang Baal. Mingka kamma-kamma anne, Kipasalamaki ikambe battu ri musunna ikambe, nampa anynyomba ikambe mae ri Katte!’

1 SAMUEL 7:15

Ammarentai Samuel lalang sikontu tallasa'na.