1 SAMUEL 29:3 - KITTA' MATANGKASA'

³ Sikamma panglimana tu Filistin naciniki ke'nanga nampa akkuta'nang angkana, “Untu' apa nania' anjo tu Ibrania anrinni?” Appialimi Akhis angkana, “Anne Daud, le'ba' pagawena Karaeng Saul battu ri Israel. Sallo-sallomi ammantang ri nakke. Baku' battuna mae ri nakke sa'genna kamma-kamma anne, tenale'bakapi kugappa a'gau' kasalang.”

1 SAMUEL 29:3 ပူးပေါင်းရင်းမြစ်များ

PA'JARIANG 14:13

Mingka nia'mo sitau ta'lappasa' battu ampabattuangi Abram anjo tu Ibrania, sikamma anjo apa kajarianga. Anjo Abram niaki ammantang ri ampi'na poko'-poko' kayu karama' ri tampa' passambayanganna niarenga Mamre, sitau tu Amori. Na anjo Mamre siagang sikamma sari'battanna, iamintu Eskol siagang Aner, agannai Abram.

1 PATTOTTORANG 12:19

Ri wattunna Daud siagang tu Filistin ambunduki Karaeng Saul, nia' sipa'gang battu ri tantara suku Manasye a'limbang mange a'jari agang ri Daud. Sikontutojenna tena nabantui Daud anjo tu Filistin. Nisuroi ri sikamma pamimpinna tu Filistin ammotere' mange ri Ziklag lanri nakamallakkangi ke'nanga angkana laagang mangei ri Karaeng Saul anjo Daud siagang a'jari bali mae ri ke'nanga.

1 PATTOTTORANG 12:20

Iaminne areng-arenna sikamma pejuang battua ri suku Manasye, a'jari aganga mae ri Daud ri wattunna lalang pa'jappang Daud mange ri Ziklag: Adnah, Yozabad, Yediael, Mikhael, Yozabad, Elihu siagang Ziletai. Massing a'jari pamimpingi ke'nanga ri 1.000 tantara.

DANIEL 6:5

Mingka sikamma guburnurka siagang anjo pangawasaka napa'boyammi kasalang Daniel lalang ri pamarentahanga; mingka takkulleai ke'nanga, lanri majarre'na siagang lambusu'na Daniel, kammayatompa tena kasalang nagaukang siagang tena nabawang-bawangngangi jama-jamanna.

YOHANES 19:6

Ri wattunna nacini' imang-imang kapalaya siagang pangawalaka ngaseng anjo Isa, ammarrang-marrammi ke'nanga, angkana, “Allei salli'! Allei salli'!” Nakanamo Pilatus ri ke'nanga, “Allemi anne Taua nampa ikau tommo ansalliki. Nasaba' inakke tena kugappa kasalanNa manna sirupa.”

ROMA 12:17

Punna nia' tau a'gau' ja'dala' mae ri kalennu, teako balasaki siagang kaja'dallang. Gaukangi apa nakanaya ngaseng taua baji'.

1 PETRUS 3:16

Mingka gaukangi anjo siagang tuna pa'mai'nu yareka siagang baji'. Siagang parallui ci'nong ati mailalannu, sollanna punna nipitinako lanri tappa'nu mae ri Almasi lalang tallasa'nu, lasiri'-siri'mi mae ri kalenna anjo tau ampitinayako.

1 SAMUEL 14:11

Ri wattunna napappicinikang kalenna ke'nanga mae ri tu Filistin ri anjo balla' jagaya, nakanamo anjo tu Filistinga, “Ciniki, nia' tu Ibrani assulu' battu ri kali'bong paccokkoanna!”

1 SAMUEL 25:28

Kipammopporangi kacapakkanna atanta. Mattantu Batara laNaangkakki' siagang turunganta a'jari karaeng mae ri Israel, nasaba' a'bundukki' untu' Batara; siagang tena nalakigaukang kaja'dallanga lalang sikontu tallasatta.

1 SAMUEL 27:1

Appikkiri'mi lalang ri atinna Daud angkana, “Manna pole antekamma, ri se'reang allo lanabuno tonja' Saul. Jari tena oloang maraeng ri nakke, pantaranganna laria mange ri pa'rasangang Filistin. Lanri kammana anjo talanaboyaiyama' Saul ri Israel, siagang laamang tommi kusa'ring.”

1 SAMUEL 27:7

Ammantangi Daud ri pa'rasangang Filistin sitaung annang bulang sallona.

1 SAMUEL 29:6

Jari Akhis nakio'mi Daud nampa nakana ri ia, “Tappaka' lanri Batara mattallasaka, angkanaya tamamminrayako mae ri nakke. Rannua' punna nururunganga' lalang ri anne pa'bundukanga. Nasaba' baku' battunu mae ri nakke sa'genna kamma-kamma anne, tenapa kasalannu kugappa. Mingka sikamma karaeng maraenga tena nangaia'.

1 SAMUEL 4:6

Nalangngere' tommi tu Filistin gora-gora lompona ke'nanga, sa'genna nakanamo ke'nanga, “Angngapai anjo tu Ibrania na'gora-gora lompo kamma?” Mingka ri wattunna naasseng ke'nanga angkanaya battumi Patti ParjanjianNa Batara mae ri kemana tu Ibrani,