1 SAMUEL 28:1 - KITTA' MATANGKASA'

¹ Siapa are wattu ribokoangannaya napagio'mi tu Filistin tantarana untu' mange ambunduki Israel. Nampa nakanamo Akhis ri Daud, “Tantu nupahangi angkanaya ikau siagang ana' buanu laagangko siagang inakke lalang ri pa'bundukanga.”

1 SAMUEL 28:1 ပူးပေါင်းရင်းမြစ်များ

1 SAMUEL 13:5

Na lalanna anjo wattua, a'rappungang tommi tu Filistin untu' ambunduki tu Israel. Nia' 30.000 kareta bundu'na ke'nanga, 6.000 tau a'jarang, siagang tantara sanrapang kassika ri tamparang jaina. Appareki kema ke'nanga ri Mikhmas, ri bageang rayanganna Bet-Awen.

1 SAMUEL 17:1

Ri se'reang wattu napagioki tantarana tu Filistin untu' maju mange a'bundu'. Naatoro'mi barisi'na ke'nanga ri kota Sokho, ri daera Yehuda, nampa appare' kema ri alla'na Sokho siagang Azeka, ri ampi'na Efes-Damim.

1 SAMUEL 27:12

Mingka Akhis napatappaki Daud na napikkiri' lalang ri atinna angkanaya, “Sannaki nikabirisinna ri bansana kalenna, sa'genna tarpassa a'jari atangku lalang sikontu tallasa'na.”

1 SAMUEL 31:1

Lalanna anjo wattua tu Filistin a'bunduki siagang tu Israel ri pa'moncongang Gilboa. Jai tu Israel mate anjoreng, na maraengannaya, kammayatompa Saul siagang ana'-ana' bura'nena larimi.

1 SAMUEL 7:7

Nalangngere'na tu Filistin angkanaya a'rappungammi tu Israel ri Mizpa, a'lampami mange anjoreng anjo limaya karaeng ri Filistin siagang tantarana ke'nanga untu' ambunduki tu Israel. Nalangngere'na tu Israel anjo kabaraka, malla'mi ke'nanga.