1 SAMUEL 20:6 - KITTA' MATANGKASA'

⁶ Punna akkuta'nang manggenu angkanaya angngapa nakutena hadere', pauammi angkana, le'ba'ma' appala' ising battu ri kau untu' ammotere' linta' mange ri Betlehem, lanri anjoreng nia' pa'gaukang koro'bang taung-taung nagaukanga sikontu kaluargaku.

1 SAMUEL 20:6 ပူးပေါင်းရင်းမြစ်များ

YOHANES 7:42

Kania' tattulisi' lalang ri Kittaka angkanaya anjo Karaeng Mappasalamaka sossoranna Daud siagang labattu anjorengi mae ri Betlehem, iamintu kamponna Daud.”

PAOLE 12:5

Ri sikontu daerana suku-suku Israel, ammilei Karaeng Allata'alanu se're tampa' sollanna akkulle bansata battu mange ri dallekanNa siagang anynyomba ri Ia.

1 SAMUEL 17:58

Akkuta'nammi Saul ri ia angkana, “E turungka, inaiko antu?” Appialimi Daud angkana, “Anne atanta ana'nai Isai battu ri Betlehem.”

1 SAMUEL 20:28

Appialimi Yonatan angkana, “Le'baki appala' ising ri nakke untu' a'lampa mange ri Betlehem.

1 SAMUEL 9:12

Appialimi anjo sikamma tuloloa angkana, “Iye', nia', silalonna nia' a'jappa allaloi ikambe. Punna akkaro-karoki', nakulle akkullei kirapi'. Silalonna battu ri kotaya, nasaba' anne alloa irate ri tampa' pakkoro'bangnganga ri buluka, nia' passare koro'banna ra'yaka. Tena nalangnganre tau jaia punna tenapa nabattu, lanri musti nabarakkaki rolong anjo koro'banga. Punna a'lampaki' kamma-kamma anne, lakirapi'mi ri tenanapa nangngambi' ri bontoa untu' mange angnganre.”