1 SAMUEL 18:30 - KITTA' MATANGKASA'

³⁰ Punna battui tantara Filistin ambunduki Israel, tuli la'bi a'wasseleki Daud, antumpassangi ke'nanga, na ia perwira maraenganga. Jari pila' masahoro'mi Daud.

1 SAMUEL 18:30 ပူးပေါင်းရင်းမြစ်များ

2 SAMUEL 11:1

Biasana wattu accu'la'na leko'-leko' kayua namaju sikamma karaenga a'bundu'. Na ri wattu accu'la'na leko'-leko' kayua anjo taunga nasuromi Daud anjo Yoab maju a'bundu' siagang ngaseng sikamma perwiraya siagang sikontu tantara Israel; nampa nabetamo ke'nanga tu Amon siagang nakurummi kota Raba. Mingka Daud ammantangi ri Yerusalem.

2 SAMUEL 7:9

Le'ba' mako Kururungang manna pole kemae lampanu, siagang sikontu musunnu le'ba'mi Kutumpasa' ri wattunnu a'bundu'. LaKupa'jariko masahoro' sangkamma pamimping-pamimping kaminang lompoa ri lino.

2 KARAENG-KARAENG 1:13

Sikalipi pole assuro karaenga sitau perwira siagang limampulo ana' buana. Anjo perwiraya naiki ri bontoa siagang ri wattunna battu ri dallekanna Elia akkulantu'mi nampa angkana, “Pammopporanga', o, atanNa Allata'ala! Kikamaseanga' siagang anne limampuloa ana' buaku. Teaki' bunoi ikambe!

PAMMUJI 116:15

Tamaka manynyayanNa Batara ri kamateanna se're tunikamaseanna.

PAMMUJI 119:99

Pammahangku la'biangngangi napammahanna guru-gurungku, lanri inakke kunawa-nawai sikamma parentaTa.

PANGNGEBARANG 12:8

Lanipuji taua situru' kacara'dekanna; nihinai taua situru' kadongokanna.

DANIEL 1:20

Sampang nia' napabattu karaenga passala', iamintu parallua nipakasingara' siagang nitangara', naassemmi karaenga angkanaya panggappana siagang pappitangara'na anjo appaka turungka a'lappi sampuloi baji'na nasikamma panggappana siagang pappitangara'na sikontu pacinika siagang sanro cara'deka ri sikontu kakaraenganna.

LUKAS 21:15

INakke lassareko kacara'dekang siagang kana-kana lanupaua. Sa'genna manna sitau ri musu-musunnu takkulle ambeta kanako yareka ampassalai apa-apa nupaua.

EFESUS 5:15

Lanri kammana, parhatikangi baji'-baji', antekamma katallassannu. Teako attallasaki sangkamma tau dongoka. Attallasakko sangkamma tau cara'de'.

1 PETRUS 2:4

Lanri kammana, battu mako mae ri Batara. Iami sanrapang batu mattallasaka, iamintu batu nipelaka ri rupataua lanri nakana tena matu-matunna; mingka nipilei ri Allata'ala a'jari batu lompoa anggaranna.

1 PETRUS 2:7

Anjo batua sanna' lompona anggaranna untu' ikau tau tappaka. Mingka tau tenaya natappa', kammami anne nakanaya Kittaka mae ri ke'nanga, “Anjo batu tenaya napakei tukang-tukang bangunanga, ma'nassa iami batu majarre'.”

1 SAMUEL 18:29

Jari pila' malla'mi mae ri Daud, na nakabirisi lalang sikontu tallasa'na.

1 SAMUEL 18:5

Nagaukang baji'mi tugasa'na Daud, ia napassareanga Saul mae ri ia. Lanri kammana niangka'mi ri Saul a'jari perwira lalang ri tantarana. Na ningaimo Daud ri sikontu tantaraya siagang sikamma atanna Saul.

1 SAMUEL 19:8

Tena nasallo a'jarimi pole pa'bundukanga siagang tu Filistin. Mangemi Daud ambunduki ke'nanga nampa nabeta ngaseng ke'nanga, sa'genna lari ke'nanga.

1 SAMUEL 2:30

INakke, Karaeng Allata'alana Israel, riolo le'ba'Ma' a'janji angkanaya kaluarganu siagang turungannu la'jari palayang mae ri Nakke, salaku imang sa'genna satunggu-tungguna. Mingka kamma-kamma anne tenamo naKuero' ri anjo kammaya! Nasaba' inai-nai ampakala'biriKa' iami laKupakala'biri', na inai-nai anghina' iami laKuhina.

1 SAMUEL 26:21

Appialimi Saul angkana, “A'gau' dorakama'. Daud, ammotere' mako ana'! Tenamo nakula'gau' ja'dala' mae ri kau, lanri nurellakanga' attallasa' ri bangngia. Tolo sikali panggaukangku. Lingu tojeng-tojemma' nakke!”

1 SAMUEL 26:24

Jari, sangkamma batena atanta, anne alloa narellakammi karaengku attallasa', kamma tomminjo tapporo nikatutui anne atanta ri Batara siagang nilappassang battu ri sikontu bahayaya!”