1 SAMUEL 18:10 - KITTA' MATANGKASA'

¹⁰ Ammukona niaki Saul lalang ri balla'na, sitabang nata'galaki pokena. Nati'ring nibattuimo ri roh ja'dala' nisuroa ri Allata'ala, sa'genna a'jallo'mo sangkamma tupongoro'. Anjo wattua sitabangi Daud akkarena kacapi sangkamma biasa.

1 SAMUEL 18:10 ပူးပေါင်းရင်းမြစ်များ

1 KARAENG-KARAENG 18:29

Kammaminjo situlusu'na nagaukang ke'nanga sa'genna karueng, sangkamma nicini' tunisoso' ri setang. Mingka tena appiali ri ke'nanga, tena amparhatikangi.

1 KARAENG-KARAENG 22:12

Situjumi sikontu na'bi maraenga na nakana ngaseng, “Bundukimi Ramot, lammetaki'. LaNasareki' pammetang Batara.”

YEREMIA 28:11

Ri dallekanna sikontu ra'ya' niaka hadere' anjoreng, nakanamo, “Nakana Batara, kammaminne carana laNatepo' lembarang napatabaya Nebukadnezar mae ri salangganna sikontu bansaya; laNagaukangi Batara anjo kammaya lalang ruan taung anne labattua.” Le'baki anjo a'lampami Hananya.

LAMPA-LAMPANA 16:16

Ri se'reang allo a'lampa maki' mange ri tampa' passambayanganga. Ri tangngana aganga assibuntulu' maki' sitau baine ata. Anjo bainea nisosoki ri setang, sa'genna akkullei natappu la'bi riolo apa lakajarianga sallang. Lanri akkullena natappu dalle'na taua, jai sikalimi doe' napanggappangi pingga'-pinggawana anjo bainea.

2 TESALONIKA 2:11

Iaminjo saba'na naNapabattu Allata'ala mae ri ke'nanga koasa appakalingu-lingua, sa'genna napatappa' ke'nanga apa tenaya natojeng.

HAKING-HAKING 16:20

Nampa ammarrang angkana, “Simson! Niaki battu tu Filistin!” Ambangummi Simson nanapikkiri' kapang angkana akkullei tallappasa' sangkamma allalo-lalloa. Tanaassengai angkanaya nibokoimi ri Batara.

1 SAMUEL 16:23

Appakkaramula anjo wattua, punna nibattui Saul ri roh ja'dala', naallemi kacapinna Daud nampa napasa'ra. Nampa sannammo siagang nyamammi ammotere' pakkasia'na, lanri nibokoi ri anjo roh ja'dalaka.

1 SAMUEL 18:9

Appakkaramula anjo alloa assereatimi ri Daud.

1 SAMUEL 19:10

Nampa nausahakammo Saul ampatintingi pokena ri kalenna Daud ia niaka ri ampi'na rinringa. Mingka a'lili Daud, sa'genna tattinting anjo pokea ri rinringa. Larimi Daud untu' ampasalamaki kalenna.

1 SAMUEL 19:7

Le'baki anjo nakio'mi Yonatan anjo Daud, nampa nacarita ngaseng sikamma pambicaranga sumpaeng. Nampa nierang Daud ri Yonatan mange ri Saul, siagang nalayanimi Saul ammotere' kamma riolo.

1 SAMUEL 19:9

Ri se'reang allo sitabangi Saul ammempo ri balla'na, na anna'gala' poke. Ti'ring nibattuimi pole Saul ri roh ja'dala' Nasuroa Batara. Anjo wattua sitabangi napasa'ra Daud kacapinna.

1 SAMUEL 26:19

O, karaeng, kipilangngeri sai sombanna anne atanta. Ebara' angkana Batara assuroi karaengku angngewai atanta, akkullei passare koro'banga ampanaungi pangngalarroinNa mae ri atanta. Mingka ebara' angkana rupatau ansuroi karaengku, tapporo nihukkung laloi ke'nanga ri Batara! Nasaba' lanri panggaukanna anjo ke'nanga nanibongkamo atanta battu ri buttaNa Batara, siagang tarpassa musti a'lampai mange ri pa'rasangang maraeng namusti anynyomba anjoreng atanta mae ri rewata-rewata tenaya niassengi.