1 SAMUEL 15:12 - KITTA' MATANGKASA'

¹² Ammukona bari'basa', a'lampami Samuel ero' mange angngagangi sibuntulu' Saul. Nipauammi angkanaya a'lampami Saul mange ri kota Karmel untu' ambangung batu pappakainga' untu' kalenna anjoreng, nampa tulusu' mange ri Gilgal.

1 SAMUEL 15:12 ပူးပေါင်းရင်းမြစ်များ

PA'JARIANG 21:14

Ammukona bari'basa', nasaremi Abraham kanre Hagar siagang se're pammoneang je'ne' untu' a'jari bokong ri lampana. Napadenge'mi anjo anaka ri dongko'na Hagar, nampa nasuro anjo bainea a'lampa. A'lampami Hagar mange ri parang lompona Bersyeba.

2 SAMUEL 18:18

Lalang attallasa'na Absalom le'ba'mi napambangungang kalenna se're tugu ri Ka'bung Karaeng, nasaba' tena ana' bura'nena untu' ampatulusuki jari-jarina. Anjo tugua niarengi situru' areng kalenna, na sa'genna anne alloa anjo tugua niassengi salaku Tugu Absalom.

1 KARAENG-KARAENG 18:42

A'lampami Ahab mange angnganre, nampa Elia nai'mi ri Moncong Karmel. Anjoreng su'ju'mi sa'genna rapa' rupanna naung ri buttaya ri alla'na ruaya kulantu'na.

2 PATTOTTORANG 26:10

Kammayatompa ambangungi menara-menara niaka pattahanganna ri daera paranga, siagang angngekei jai bungung, baji' ri tampa' tinggia kammayatompa ri tampa' rawaya ri bageang ilau'. Lanri naparhatikanna jama-jamang pamarria, jaimi tau napajama untu' appare' koko-koko anggoro' ri daera monconga, siagang najama buttaya ri daera-daera copponga.

YOSUA 15:55

Kammayatompa anne sampuloa kota siagang desa-desa niaka ri tammulilina: Maon, Karmel, Zif, Yuta, Yizreel, Yokdeam, Zanoah, Kain, Gibea siagang Timna.

1 SAMUEL 13:12

Nampa kupikkiriki angkanaya gassingka tasalloami nabattu tantara Filistin ambundukia' anrinni ri Gilgal, na nampa tenapa kule'ba' appala' tulung ri Batara. Lanri kammana minjo nakuangngallemo kaputusang untu' ampassareangi anjo koro'banga.”

1 SAMUEL 13:15

Nampa a'lampa Samuel ambokoi Gilgal, na napatulusu' lampana mange ri Gibea, ri daera Benyamin. Lalanna anjo wattua naparessami Saul pasukanna, nia' kira-kira 600 tau jaina.

1 SAMUEL 17:20

Ammukona bari'basa', ambangummi Daud nampa apparuru. Gimbala'na nasuro jagai ri se'reang pakalawaki, nampa naalle apa-apa lanaeranga na'lampa situru' naparentakanga manggena. Battui mange ri kemana tu Israel sitabanna ero' a'lampa tu Israel mange a'bundu' ri tampa' pa'bundukanga, a'gora-gora ampakalompoi sumanga'na ke'nanga.

1 SAMUEL 25:2

Ri kota Maon nia' sitau bura'ne battu ri passibijanna Kaleb, niarenga Nabal. Nia' parang pangnganreang olo'-olo' katuona ri ampi'na kota Karmel. Sanna' kalumanynyanna siagang nia' 3.000 kayu gimbala'na, siagang 1.000 kayu bembena. Bainenna niarenga Abigail sanna' cara'de'na siagang sanna' ga'gana. Mingka Nabal kasara' sikali sipa'na siagang kodi panggaukanna. Ri se'reang allo sitabangi Nabal nacukkuru' bulu gimbala'na ri Karmel.

1 SAMUEL 7:12

Le'baki anjo appaentemmi Samuel se're batu, ri pa'baeng-baenna Mizpa siagang Sen. Nakanamo, “Natulung maki' Batara siganna'na.” Nampa naareng anjo batua “Batu Pannulungang”.