1 SAMUEL 13:3 - KITTA' MATANGKASA'

³ Nampa Yonatan nabunomi panglimana tu Filistin niaka ri Geba, na nalangngere'mo bansa Filistin kabara'na anjo. Nasuro pasa'rami Saul tarompeka ri sikontu pa'rasangang untu' angkioki tu Ibrania sollanna maju mange a'bundu'.

1 SAMUEL 13:3 ပူးပေါင်းရင်းမြစ်များ

2 SAMUEL 2:28

Nampa attui'mo tarompe' Yoab salaku pammatei mae ri ana' buana sollanna ammari angngondangi tu Israel. Jari ammarimi anjo pa'bundukanga.

2 SAMUEL 20:1

Ri kota Gilgal nia' sitau apparicu niareng Seba. Anjo taua ana'na Bikri, battu ri suku Benyamin. Ri wattunna battu Daud siagang sikamma tau naaganga a'rurung, appasa'rami tarompe' Seba nampa ammarrang angkana, “Tena passisambunganta siagang Daud. Apa saba'na kilamminawang mae ri ia? He tu Israel, umba kimmotere' ngaseng!”

YESAYA 10:29

Allalomi ke'nanga ri pa'limbangnganga siagang a'bangngi ke'nanga ri Geba! Annekkere'mi pandudu'na kota Rama, siagang larimi pandudu'na Gibea, kotana Saul.

ZAKHARIA 14:10

Sikontu pa'rasanganga appakkaramula battu ri Geba bageang wara' sa'genna Rimon ri bageang timboro', la'jari lappara' ngasengi. Mingka Yerusalem lammenteng tinggi nai', la'bi tinggiangngang nabutta niaka ri tammulilina; anjo kotaya la'la'baki appakkaramula battu ri Pakke'bu' Lompo Benyamin sa'genna mange ri Pakke'bu' Lompo Panyingkulu', iamintu tampa'na pakke'bu' lompo Makase'rea siagang battu ri Menara Hananel sa'genna mange ri tampa' pammaccokang anggoro'na karaenga.

HAKING-HAKING 3:27

Battuna mange ri daera monconga ri Efraim, akkaro-karomi angngalle tarompe' nampa napasa'ra untu' angkioki tu Israelka mange a'bundu'. Nabattumo ke'nanga nampa napimping anjo ke'nanga naung battu ri daera monconga.

HAKING-HAKING 6:34

Mingka nipimpingi Gideon ri RohNa Batara. Na natui'mo tarompeka angkioki tu Abiezer sollanna battu a'rappungang siagang ia.

1 SAMUEL 10:5

Le'baki anjo musti a'lampamako mange ri bontoNa Allata'ala ri Gibea, tampa' kemana tu Filistin. Ri pakke'bu' antamaya ri kotaya, lasibuntulukko siagang sipa'rappungang na'bi sitabanga naung battu ri bonto pakkoro'bangnganga. A'joge'-jogeki siagang akkiok-kioki ke'nanga, akkarena gambusu', rabana, suling siagang kacapi.

1 SAMUEL 13:16

Kammaminjo, Saul siagang ana' bura'nena Yonatan, kammayatompa sikamma ana' buana, akkemami ri Geba, ri daera Benyamin. Nampa tu Filistin akkemai ri Mikhmas.