1 PETRUS 5:3 - KITTA' MATANGKASA'

³ Teako a'jari kammai tau koasa mae ri ke'nanga, nipappirannuanga mae ri kau. Mingka a'jariko conto baji' mae ri ke'nanga.

1 PETRUS 5:3 ပူးပေါင်းရင်းမြစ်များ

PAMMUJI 33:12

Mate'nei bansa mangakua ri Batara salaku Allata'alana, mate'nei umma' Napilea a'jari umma' Napatanga!

PAMMUJI 74:2

Kiu'rangi ummatTa le'baka Kipile battu riolo, bansa Kipakabebasaka sollanna a'jari Kipatang. Kiu'rangi Bulu' Sion, Kipareka a'jari pammantangnganTa.

YEHEZKIEL 34:4

Gimbala'nu dodonga tena nuparakai, ia garringa tena nuballei, ia bokkaka tena nurokoki loko'na, ia sala oloanga siagang tappelaka tena nuboyai nampa nuerang ammotere'. Ba'lalo sikamma anjo gimbalaka nukapallakki.

MIKHA 7:14

O Batara, Kikalawaki laloi ummatTa, iamintu umma' nipileTa. Ammantangi ke'nanga bella ri parang lompoa, ri tangnga-tangngana butta copponga. Lappassammi ke'nanga anggappa kanre ri parang ruku'na Basan siagang ri Gilead sangkamma jammang riolo.

PAMMILANGNGANG 18:7

Mingka ikauji bawang siagang sikamma ana'nu akkulle anggaukangi tugasa' imanga, lalang sikontu jama-jamang niaka passisambunganna siagang tampa' pakkoro'bangnganga kammayatompa apa-apa niaka lalang ri Kamara' Kaminang Matangkasaka. Iaminjo tanggong jawa'nu, lanri le'ba' mako Kusare empoang salaku imang. Sikamma tau tenaya ha'na lanihukkungi punna nareppesi anjo barang-barang matangkasaka.”

YOHANES 13:15

Kusare ngaseng mako conto, sollanna nanugaukang todong anjo apa Kugaukanga ri kau.

LAMPA-LAMPANA 20:28

Paralluko anjagai kalennu. Kammayatompa paralluko anjagai sikontu jamaah le'baka Napassareang RohNa Allata'ala mae ri kau untu' lanujagai; nasaba' le'ba' mako niangka' a'jari tummarakai ri anjo jama'aka. Parallui nujagai anjo jama'aNa Allata'ala, sanrapang pakalawaki anjagai gimbala'na; nasaba' le'ba'mi Napa'jari Allata'ala anjo jama'aka a'jari pisakaNa lanri kamateanNa Ana' KalenNa.

1 KORINTUS 11:11

Mingka manna nakamma ilalang katallassanta, ikatte tu Karistenga, tena nammenteng kale-kale bai'-bainea, ta'lappasa' battu ri tu bura'-bura'nena; kammayatompa tena nammenteng kale-kale bura'-bura'nea, ta'lappasa' battu ri tu bai'-bainena.

1 KORINTUS 3:5

Sikontutojenna inai anjo Apolos? Siagang inai anjo Paulus? Ikambe anne poro palayanNa jaki' bawang Allata'ala, ia le'baka ampimpingko sollannu tappa' mae ri Almasi. Ikambe poro nigaukannaji bawang jama-jamang Napassuroanga Batara mae ri kambe.

1 KORINTUS 3:9

Ikambe sangkamma jaki' para tau anjama ri Allata'ala; na ikau sanrapangko kokonNa Allata'ala. Yareka sanrapang tongko balla' bangunanNa Allata'ala.

2 KORINTUS 1:24

Tena nakuero' ampassako ri passala' apa siratanga nupatappa', lanri jarre'namo tappa'nu mae ri Isa. Erokkuji bawang angngagangko sipanjamang, sollannu pila' mate'ne ri tallasa'nu.

2 KORINTUS 4:5

Anjo biritta napabattua ikambe teai biritta ri sesena ikambe. Anjo birittaya, biritta ri sesena Isa Almasi, angkanaya Iami Batara; na ikambemi anne a'jari atannu ngaseng lanri Isa.

PAOLE 32:9

Mingka anne jari-jarina Yakub Napilei Batara untu' KalenNa.

FILIPI 3:17

Sikamma sari'battangku! Turukimi conto niaka ri kalengku. Le'ba' mako nasare ikambe conto annabaya; lanri kammana, parhatikangi baji'-baji' katallassanna sikamma tau anturukiai anjo conto napassareanga ikambe.

FILIPI 4:9

Gaukammi anjo apa-apa le'baka nupappilajari siagang nutarima battu ri nakke; baji' nakana-kanangku, yareka apa-apa kugaukanga. Naporo Allata'ala, kabattuanna salewanganga, anrurungang ngasengko ri katallassannu.

1 TESALONIKA 1:7

Lalang kammana minjo nu'jari contomo mae ri sikontu Umma' Karisteng niaka ri Makedonia siagang Akhaya.

2 TESALONIKA 3:9

teai lanri tenana nakkulle ikambe appala' tulung mae ri kau ngaseng, passangalinna sollanna akkulle ikambe a'jari conto mae ri kau ngaseng.

1 TIMOTIUS 4:12

Teako pa'biangi kalennu nicini' tuna lanri rungkanu ija. Mingka paralluko a'jari conto mae ri sikontu tau tappaka ilalang ri pau-paunu, panggaukannu, katappakkannu, pangngamaseannu, kammayatompa katangkassanna katallassannu.

TITUS 2:7

Siagang paralluko ikau kalennu, lalang ri apa-apa mamo, ampappicinikangi conto bajika lalang ri panggaukannu. Punna angngajarakko, musti lambusukko siagang attojeng-tojengko.

1 PETRUS 2:9

Mingka ikaumi bansa le'baka nipile, imang-imang allayania karaeng, bansa matangkasaka, untu' KalenNa Allata'ala, siagang umma' KalenNa Allata'ala. Napileko siagang Nakiokko Allata'ala assulu' battu lalang ri sassanga untu' antama' ri singara' kalompoanNa, sollanna nupa'la'bang biritta ri sesena sikontu panggaukang malompoNa.