1 PETRUS 5:14 - KITTA' MATANGKASA'

¹⁴ Sikamaseang duduko, siagang sisallang-sallangiko salaku tu Karisteng massari'battanga. Poro Nabarakkaki ngasengko Batara, ikau sikontu tau a'jaria taunNa Almasi. Sallangku, Petrus

1 PETRUS 5:14 ပူးပေါင်းရင်းမြစ်များ

MATIUS 5:47

Na punna agannuji bawang nujamakki, apa la'bina kabajikannu? Kamanna tau kapereka nagaukang tonji kammaya.

YOHANES 14:27

Kubolikang mako kasalewangang. Kasalewangang battua ri KalengKu Kupassareang mae ri kau. Na anjo apa Kupassareanga mae ri kau, tasangkammayai apa napassareanga linoa mae ri kau. Teako lussaki pa'mai'nu, siagang teako mallakki.

YOHANES 16:33

Kupau ngasengi anne mae ri kau, sollannu anggappa salewangang lanri asse're ngasengko siagang iNakke. Lasessako lalang ri linoa. Mingka jarreki pa'mai'nu! Le'ba'mi Kubeta anne linoa!”

YOHANES 20:19

Ri ia memang anjo allo Minggua, ri wattunna bangngimo, a'rappungammi ana'-ana' gurunNa Isa ri se'reang balla'. Nijoli ngasengi pakke'buka, lanri mallaki ke'nanga ri pamarentana tu Yahudia. Ti'ring nia'mi Isa ammumba, siagang ammenteng ri tangnga-tangngana ke'nanga, na Nakana, “Salamakko siagang salewangang ngasengko.”

YOHANES 20:26

Sidaminggu ribokoanganna, nia'mi pole a'rappungang anjo ana'-ana' gurunNa Isa ri anjo tampaka. Anjo wattua nia' tommi Tomas. Ta'joli ngasengi pakke'buka. Mingka nia'mi battu ammumba Isa siagang ammenteng ri tangnga-tangngana ke'nanga, na Nakana, “Salamakko siagang salewangang ngasengko.”

ROMA 1:7

Iaminjo saba'na nakutulisi' anne suraka mae ri kau ngaseng. Poro Nabarakkakiko siagang Nasareko katallassang salewangang Allata'ala Manggea siagang Batarata Isa Almasi.

ROMA 16:16

Massing sisareko sallang sikarimangngi salaku tu Karisteng. Sikamma jamaah-jama'aNa Almasi appikatu ngasengi sallang mae ri kau ngaseng.

ROMA 8:1

Kamma-kamma anne tenamo hukkungang lantabai tau assileokamo katallassanna siagang Isa Almasi.

1 KORINTUS 1:30

KalenNa Allata'ala ampasse'rei katallassannu siagang Isa Almasi. Tete ri Isa Almasi nanipa'jariki' cara'de'. Siagang tete ri Iatommi naNapasibajiki maki' Allata'ala mae ri KalenNa, iamintu Napa'jari maki' umma'Na, kammayatompa Napa'jari bebasa' maki'.

1 KORINTUS 16:20

Sikontu sari'battanga anrinni appikatu ngasengi sallang mae ri kau ngaseng. A'le'ba'-le'basakko massing sisare sallang, sikarimangngi salaku tu Karisteng.

2 KORINTUS 13:12

Massing sipasalamakko nusikajarreki salaku tu Karisteng assari'battanga. Appikatui sallang sikontu Umma'Na Allata'ala mae ri kau ngaseng.

2 KORINTUS 5:17

Inai-nai ampakase'remi kalenna mae ri KalenNa Almasi, a'jarimi tau le'ba' niberui taba sikali tallasa'na. Tenami apa-apa salloa ri kalenna, lanri le'ba' ngasemmi niberui.

EFESUS 6:23

Poro Allata'ala Manggea, siagang Batara Isa Almasi ansarei pakkulle sikontu jama'aka untu' assamaturu' siagang assikamaseang kammayatompa tuli tappa' mae ri Almasi.

1 TESALONIKA 5:26

Massing sibarisallangko para ikau ngaseng, assiamakko nusikarimangngi salaku tu Karisteng.

3 YOHANES 1:14

Kuminasai angkanaya tenamo nasallo nakilasibuntulu', naki'bicara kalenta.