1 PETRUS 2:24 - KITTA' MATANGKASA'

²⁴ KalenNa Almasi ampisangi sikontu dosa-dosata irate ri kayu sallika, sollanta akkulle bebasa' battu ri kakoasanna dosaya, siagang nakiattallasa' situru' ero'Na Allata'ala. Loko'-loko'Nami Almasi ampamolleko ri garrinnu.

1 PETRUS 2:24 ပူးပေါင်းရင်းမြစ်များ

PA'JARIANG 22:6

Napapisangiammi Abraham ri salangganna Ishak anjo kayu untu' tunuang koro'banga. Na kalenna angngerammi lading siagang bara pepe' untu' kayu tunuanga. Ri wattu a'jappanamo ke'nanga sipa'rua,

PAMMUJI 147:3

Napammollei tau la'baya pa'mai'na, siagang Naballei loko'na ke'nanga.

PAMMUJI 38:4

Garring lompoa' lanri kalarroanTa; tenamo baji' ri tubuku lanri dosaku.

KALAPPASSANG 28:38

Anjo belo-belo bulaenga musti napatabai Harun ri abanna, sollanna iNakke, Batara, eroKa' antarimai sikontu passare naeranga tu Israel mae ri Nakke, manna pole nania' kasalanna ke'nanga lalang naeranna anjo passarea.

PANGNGEBARANG 20:30

Nia' wattunna na pangalamang paika allu'luki kaja'dallanga, siagang natangkasi atinna rupataua.

YESAYA 53:11

Lanri kammana anjo Nakana Batara, “Punna le'baki sessa napakamma nipa'risi, lamate'nei siagang lasukku' baji'mi pakkasia'na. Anjo atangKu, napakasannangi atingKu, le'ba'mi natanggongi hukkunganna tau jaia; lanri ia naKupammopporang ke'nanga.

KAIMANGNGANG 16:22

Anjo bembea naerang ngasemmi sikontu dosana bansa Israel mange ri daera kalotoroka, ia tenaya napammantangangi tau siagang musti nalappassangi anjoreng ri parang lompoa.

KAIMANGNGANG 22:9

Sikontu imanga musti naturuki paratorang-paratorang Kupassareanga. Punna tena, salai ke'nanga siagang tena tamatena, lanri nadakkai ke'nanga anjo paratorang-paratorang matangkasaka. INakke Batara, siagang iNakke ansa'laki ke'nanga untu' KalengKu.

MALEAKHI 4:2

Mingka ikau tau mannurukia ri Nakke, lammumbai koasangKu mappasalamaka rapang mataallo, nasioro'na angngerangi pappakamolle ri garring. Lata'lappasakko siagang larannuko rapang ana' sapi beru assuluka battu ri barana.

PAMMILANGNGANG 18:22

Tu Israel maraengannaya takkulleai a'reppese' mae ri KemaKu, sollanna tena nanitujui ke'nanga hukkungang mate.

MATIUS 27:26

Nalappassammi Pilatus anjo Barabas. Nampa nasuro taua ancamboki Isa; nampa napassareang nierang mange nisalli'.

MATIUS 5:20

Jari u'rangi anne: Takkulleako a'jari umma'Na Allata'ala, punna tena nabajikangang batenu anggaukangi ero'Na Allata'ala naanjo guru-guru agamaya siagang tu Farisia!”

MATIUS 8:17

Lanri Nagaukanna ngasemmo Isa anjo sikammaya, a'rupami apa le'baka napau Na'bi Yesaya angkanaya, “Natanggongi sikontu pa'risitta siagang Napammolei sikontu garrinta.”

MARKUS 15:15

Lanri eroki napakasannang Pilatus nyawana anjo tau jaia, nalappassammi Barabas. Nampa nasuro taua ancamboki Isa, nampa napassareang nasuro salli'.

LUKAS 4:18

“Niaki RohNa Batara ri KalengKu, Nasaba' le'ba'Ma' Nalanti' untu' ambirittakangi Kabara' Bajika mae ri tu kasi-asia. NasuroA' battu untu' ampa'la'bangi biritta kalappassanna tu nitarungkua siagang lamaccini'na tu butaya; untu' allappassangi tu nijallakkanga

YOHANES 1:29

Ammukona, nia'mi Isa nacini' Yohanes battu mae ri ia. Nakanamo Yohanes, “Cini'mi, Iaminjo Ana' Gimbala'Na Allata'ala, antangkasiai dosana bonena linoa.

YOHANES 19:1

Le'baki anjo antama'mi Pilatus nampa nasuro taua ancamboki Isa.

LAMPA-LAMPANA 10:35

Inai-nai malla' ri Allata'ala siagang anggaukangi kabajikanga, iami nitarima ri Allata'ala, manna pole bansa apa.

LAMPA-LAMPANA 10:39

Ikambemi anne le'baka anciniki sikontu apa le'baka Nagaukang ri pa'rasanganna tu Yahudia siagang ri Yerusalem. Mingka manna nakamma, nisalli'mi siagang nibunomi ri tu Yahudia.

LAMPA-LAMPANA 13:29

Na le'ba'namo nabuno Isa, situru' apa le'baka tattulisi' lalang ri Kittaka, napanaummi ke'nanga maya'Na battu ri kayu sallika nampa napantama' ri jeraka.

LAMPA-LAMPANA 5:30

Anjo Isa, le'baka nusalli', nipattallasa' poleammi ammotere' battu ri kamateanga, lanri koasaNa Allata'alana boe-boeta.

ROMA 6:11

Ikau ngaseng pole, musti nupasangkamma tongi angkanaya matemi kalennu lalang ri dosa-dosaya, mingka attallasa' poleang mako ammotere' nusijarreki siagang Allata'ala tete ri Isa Almasi.

ROMA 6:13

Tea tongko passareangi tubunu mae ri kakoasanna dosaya nanipake anggaukangi kaja'dallanga. Passangalinna passareangi kalennu mae ri Allata'ala, a'jari tau le'bakamo nipalette' battu ri kamateanga mae ri katallassanga. Passareangi sikontu batangkalennu mae ri Allata'ala, sollanna nipakei anggaukangi ero'Na Allata'ala.

ROMA 6:16

Maka nuassenji angkanaya punna nupassareang kalennu mae ri se'reang tau nanugaukang apa ero'na, sikontutojenna napa'jari ata mako anjo tau nuturukia ero'na? Akkulleko a'jari ata mae ri apa langngeranga mae ri kamateanga, yareka a'jari ata mannurukia mae ri Allata'ala nalanri kammana assibajiki mako ammotere' siagang Allata'ala.

ROMA 6:2

Tantu tena! Nasaba' tenamo nanakoasaiki' dosaya. Jari apa saba'na natuli lanigaukang dosaya lalang ri tallasatta?

ROMA 6:22

Mingka kamma-kamma anne nilappassang mako battu ri dosa-dosaya, siagang a'jari mako atanNa Allata'ala. Naia passawallang nugappaya iamintu angkanaya nupassareammi tallasa'nu mae ri Allata'ala, siagang iaminjo langngerang wassele' katallassang sitojennaya siagang katallassang satunggu-tunggua.

ROMA 6:7

Nasaba' punna matemo taua, nilappassammi battu ri koasana dosaya.

ROMA 7:6

Mingka kamma-kamma anne ta'lappasa' maki' battu ri hukkung-hukkung agama Yahudia. Sanrapang mate maki' mae ri hukkung-hukkung makoasaya riolo mae ri batangkalenta. Tenamo nasangkamma riolo bateta anynyomba mae ri hukkunga, iamintu anynyomba situru' hukkung-hukkung tattulisika. Passangalinna kamma-kamma anne niberuimi bateta anynyomba, iamintu situru' apa Napangngajarranga RohNa Allata'ala mae ri katte.

1 KORINTUS 15:3

Anjo apa kupabattua mae ri kau, apa le'baka tonji kutarima. Ia kaminang parallua, kamma tattulisika lalang ri Kittaka, iamintu kupabattumi mae ri kau ngaseng angkanaya matemi Almasi lanri dosa-dosata ngaseng;

2 KORINTUS 6:17

Lanri kammana, bokoimi anjo tau tenaya namangngasseng ri Allata'ala, siagang pakabellami kalennu battu ri ke'nanga. Tea' laloko sikarapiki siagang apa-apa ra'masaka, nampa Kutarimako mae ri KalengKu.

GALATIA 3:13

Mingka le'ba' maki' Napakabella Almasi battu ri pangngalarroiNa Allata'ala lanri hukkung-hukkung agamaya. Napassareammi KalenNa nituju ri pangngalarroia passabakkang ikatte. Nasaba' nia' tattulisi' lalang ri Kittaka angkanaya, “Cilakami tau mate nigentunga irate ri kayu sallika.”

EFESUS 5:9

Nasaba' battu ri iaminjo singaraka ammumba sikontu gau' bajika siagang gau' annabaya ri dallekanNa Allata'ala.

FILIPI 1:11

Lakala'biang mako ri sikamma panggaukang bajika; iamintu jama-jamang KalenNaya bawang Isa akkulle anggaukangi; naporo nipakala'biri'mo siagang nipuji-pujimo Allata'ala.

KOLOSE 2:14

siagang tanjaria maki' natuntu' ri sura' pangnginranganta, sannaka battala'na mae ri katte. Lanri nasalli'namo anjo sura' pangnginranganga mae ri kayu sallika, taNarekenga ngasemmi Allata'ala anjo laNatuntuka mae ri katte.

KOLOSE 2:20

Le'ba' mako mate siagang Almasi, siagang nilappassang battu ri roh-roh makoasaya ri anne linoa. Jari, angngapa nuttallasa' sangkamma ija tau nikoasaia ri anne linoa? Angngapa nutundu' mae ri paratorang-paratorang angkanaya,

KOLOSE 3:3

Nasaba' le'ba' mako mate, nataccokko tallasa'nu siagang Almasi lalang ri Allata'ala.

IBRANI 10:10

Le'ba'mi Nagaukang Isa Almasi apa Nakaerokia Allata'ala, na Napassareang KalenNa a'jari koro'bang. Poro sikaliji bawang Nagaukang untu' satunggu-tungguna, na nitangkasimo dosa-dosata ngaseng.

IBRANI 10:5

Iaminjo saba'na na ri wattunna antama' Almasi ri linoa, Nakana mae ri Allata'ala, “TaerokaKi' ri koro'banga siagang passarea; mingka appasadia maKi' tubu untu' iNakke.

IBRANI 12:13

Oloang lapparaka tuli nuolo a'jappa, sollanna tena natassala ura'na anjo bangkeng lammanu, mingka a'jari bajiki ammotere' ba'lalo.

IBRANI 7:26

Jari, Ia minjo Isa Imang Malompo niparalluanga. Iami Imang matangkasa'; tena sikali kasalang yareka dosa ri KalenNa. Nisa'la'mi battu ri tau dorakaya, na nipanai' ri tampa' tinggianganga na sikontu langika.

IBRANI 9:28

Kammatommi anjo Almasi. Sikaliji bawang nipassareang a'jari koro'bang, najai tau Natangkasi dosana. Labattu poleangi makapinruanna. Mingka teaimi untu' antanggongi dosaya; passangalinna untu' ampasalamaki sikamma tau antayangai kabattuanNa.

YAKOBUS 5:16

Lanri kammana, paralluko massing ammangakui kasalannu mae ri parannu tau, siagang sipappala' doangangko, sollannu nipammolle. Pappala' doangang situruka ero'Na Allata'ala, lompo sikali kakoasanna.

1 YOHANES 2:29

Nuassemmi angkanaya mappilangngeri Almasi mae ri ero'Na Allata'ala lalang ri katallassanNa. Lanri kammana, musti nuasseng tongi angkanaya inai-nai mappilangngeri mae ri ero'Na Allata'ala lalang ri katallassanna, iami ana'Na Allata'ala.

1 YOHANES 3:7

Sikamma ana'-anakku, teako passareangi kalennu nipasala oloang ri tau maraenga. Inai-nai anggaukangi ero'Na Allata'ala, iami ana'Na Allata'ala sangkamma todong Almasi Ana'Na Allata'ala.

PAPPICINI' 22:2

angngoloa ri tangnga-tangngana agang lompona anjo kotaya. Ri biring pimbali-baliNa anjo binangaya, nia' poko' katallassang, pissampuloa anrua a'rappo lalanna sitaung, iamintu sikali sibulang. Leko'na nipakei untu' amballei bansa-bansaya.