1 KORINTUS 9:10 - KITTA' MATANGKASA'

¹⁰ Yareka ikatte nataba? Memang untu' ikatte anjo niaka tattulisi'. Nasaba' inai-nai anjama koko siagang antangkasi anjo kokoa, siratang memang tongi anjo taua ma'minasa langgappa bageang battu ri wassele' jama-jamanna ri anjo kokoa.

1 KORINTUS 9:10 ပူးပေါင်းရင်းမြစ်များ

PAMMILANGNGANG 18:31

Anjo tassesaya akkullei nukanre ri kere-keremae siagang kaluarganu, salaku sawala'nu ri jama-jamanga lalang ri KemaNa Batara.

MATIUS 24:22

Na ka'de' tena Napa'jari sinampeki Allata'ala anjo wattu kasusaang lompo dudua, ma'nassa manna sitau tenamo lakkulle salama'. Mingka lanri Nau'ranginna umma'Na, Napa'jari sinampe'mi Allata'ala anjo wattu kasusaang lompo dudua.

ROMA 15:4

Sikontu anjo apa-apa niaka tattulisi' lalang ri Kittaka, lanipake ngasengi untu' angngajarakki'. Nasaba' anjo pappilajarang nitarimaya battu ri Kittaka naajarakki' a'jari sa'bara' siagang a'jari majarre' sanggenta akkulle manrannuang mae ri Allata'ala.

1 KORINTUS 3:9

Ikambe sangkamma jaki' para tau anjama ri Allata'ala; na ikau sanrapangko kokonNa Allata'ala. Yareka sanrapang tongko balla' bangunanNa Allata'ala.

2 KORINTUS 4:15

Yangasenna anjo, untu' kaparalluannu ngaseng. Nasaba' punna pila' jai tau angkasiaki pangngamaseanNa Allata'ala, pila' jai tommi pappala' sukkuru' nipanai' ri Allata'ala; jari nipakala'biri'mi Allata'ala.

2 TIMOTIUS 2:6

Pamarri attojeng-tojenga anjama terasa', iami kaminang siratang anggappai wassele' lamung-lamunna.