1 KORINTUS 8:10 - KITTA' MATANGKASA'

¹⁰ Ia kupakkanaya iaminne: Alarapanna ikau, jarreka tappa'nu, sitabangko ammempo angnganre lalang ri balla' barhalaya, nampa nia' tau ancinikko. Punna tena najarre' tappa'na anjo taua, tantu labaranimi anjo taua angkanrei anjo kanre le'baka nipassareang mae ri barhalaya.

1 KORINTUS 8:10 ပူးပေါင်းရင်းမြစ်များ

AMOS 2:8

Ri sikamma tampa' ibadaya, attinroi siagang baju napappita'gallanga na naalle tulusu' battu ri tu kasi-asia. Ri Balla'Na Allata'alana ke'nanga, angnginung anggoro' naallea battu ri tau niaka inranna mae ri ke'nanga.

PAMMILANGNGANG 25:2

Nikio'mi ke'nanga ri anjo tubai'-bainea mange ri passua'-suarrang koro'banga untu' ampakalompoi rewatana ke'nanga. Amminawang tommi tu Israel angkanrei anjo koro'banga siagang anynyomba ri rewatana tu Moab.

LAMPA-LAMPANA 15:20

Mingka musti apparekki' sura' mae ri ke'nanga, na nipakainga' ke'nanga sollanna tena nanakanre ke'nanga kanre ra'masaka, iamintu kanre le'baka nipassareang mae ri barhalaya; kammayatompa ceraka, yareka olo'-olo' mate niaccekanga. Kammayatompa napakabellai kalenna ke'nanga battu ri panggaukang assalimaraka.

ROMA 14:14

Lanri assileo'na katallassangku siagang Batara Isa, tappa' sikalima' angkanaya sikontutojenna tena apa-apa harang ri passala'na sikontu apa-apa nikanrea; mingka harangi anjo apa-apaya mae ri se'reang tau, punna niharangngangi ri anjo taua.

ROMA 14:23

Mingka inai-nai bata-bata angkanrei apa-apaya, nakamma nakanrena tonja anjo apa-apaya, iami lanipasala ri Allata'ala, nasaba' teai lanri tappa'na ri apa annabaya siagang salaya nappanggaukang anjo taua. Na apa-apa mamo nigaukang tena nasiagang tappa', sala ngasengi.

1 KORINTUS 10:32

Bajikimi batenu attallasa', sollanna tena napassabakkang ikau na'gau' dosa tau maraenga; baji' na tu Yahudi yareka bansa maraenga, yareka anggota jama'aNa Allata'ala.

1 KORINTUS 8:4

Ri passala'na nikanaya angnganre kanre le'bakamo nipassareang mae ri barhalaya sikontutojenna anjo barhalaya apa tena nanikana nia'. Iaji niasseng angkanaya se'reji Allata'ala; tena ruanna.

1 KORINTUS 8:7

Mingka manna nakamma, tena nayangaseng taua angngassengi anjo passalaka. Nia' biasai riolo anynyomba mae ri barhalaya. Jari lanri kammanami anjo nasa'genna kamma-kamma anne tuli nakanana ke'nanga angkanaya anjo kanre le'baka nipassareang mae ri barhalaya a'jarimi kanre barhala. Jari punna nakanrei ke'nanga anjo kanrea, nakana dorakai kalenna ke'nanga; nasaba' tenapa najarre' tappa'na ke'nanga.

1 KORINTUS 8:9

Mingka tutuko! Gassingka passabakkang sangka' rupana nugaukang na'jari doraka todong tau maraenga, lanri tenanapa najarre' tappa'na ke'nanga.

HAKING-HAKING 9:27

A'lampami ke'nanga angngalle rappo anggoro', ri koko-koko anggoroka, nampa napare' je'ne' anggoro'. Nampa appare' ke'nanga passua'-suarrang. Angnganre-nganremi ke'nanga ri tampa' panynyombang rewataya, nasumpa-sumpai tojeng Abimelekh.