1 KORINTUS 5:10 - KITTA' MATANGKASA'

¹⁰ Naia kupakkanaya tau a'gau' bawang teai tau tenayapa nanaassengi Allata'ala, yareka tau angngoa, yareka paballe-balle, yareka tau anynyomba ri barhala, tena sikaliapa naassengi Allata'ala! Teai ke'nanga kupakkanai! Nasaba' punna musti nupakabellai kalennu battu ri ke'nanga, tantu assulu' taba sikali mako battu ri anne linoa.

1 KORINTUS 5:10 ပူးပေါင်းရင်းမြစ်များ

LUKAS 18:11

Anjo tu Farisia akkale-kalemi ammenteng nampa appala' doang lalang ri atinna nakana, ‘O, Allata'ala, appala' sukkurukka' mae ri Katte, lanri tena kusangkamma tau maraenga; tena kusangkamma tau angngoaya, tau jekkonga, yareka tau a'gau' bawanga. Appala' sukkurukka', lanri tena kusangkamma anjo pasingara' simaya.

YOHANES 15:19

Ebara' angkana napatangko anne linoa, lanakamaseangko anne linoa salaku apa-apanna. Mingka le'ba' mako Kupile battu ri anne linoa, jari teai mako patanna linoa. Iaminjo saba'na nanakabirisiko linoa.

YOHANES 17:6

Le'ba' maKi' Kupappiassengang mae ri sikamma tau battua ri anne lino le'baka Kipassareang ri Nakke. IKatte ngaseng pata anjo ke'nanga, na le'ba' ngasemmo Kipassareang ke'nanga mae ri Nakke. Naturukimi ke'nanga kananTa.

YOHANES 17:9

Kupappala' doangangi ke'nanga. Teai untu' linoa naKuappala' doang, passangalinna untu' sikamma tau Kipassareanga mae ri Nakke, nasaba' iKatte pata anjo ke'nanga.

YOHANES 8:23

Nakanamo Isa ri ke'nanga, “Ikau ngaseng battu rawako; mingka iNakke battu rateA'. Ikau ngaseng tau battuko ri linoa; iNakke teaiA' tau battu ri linoa.

1 KORINTUS 1:20

Jari, apa matu-matunna anjo tau niaka pangngassenganna? Apa matu-matunna sikamma anjo tau cara'deka? Apa matu-matunna tu panritaya ri anne linoa? Le'ba'mi Napakasingara' Allata'ala angkanaya kaporeanna anne linoa poro balle-balle lompo bawang!

1 KORINTUS 10:27

Punna nia' tau tenaya na Karisteng angkiokko mange angnganre ri balla'na, nanutarima anjo pakkio'na, kanremi sikamma apa-apa napattoananga ri kau. Tea' mako paressai rolong angkana battu kemae assala'na anjo kanrea, sollanna tena nabata-bata lalang nyawanu.

1 KORINTUS 5:11

Mingka ia kupakkanaya iamintu, angkanaya teako asse'rei siagang tau nakanaya kalenna Karisteng, mingka a'gau' bawangi, yareka angngoai, yareka anynyombai barhala, yareka nangai napau kodi paranna tau, yareka painungi, yareka palukkaki. Manna ammempoa sipangnganreang siagang ke'nanga tea' laloko!

1 KORINTUS 5:9

Kupaumi lalang ri surakku allaloa, sollanna tena nanuassileo' siagang tau nangaia a'gau' bawang.

2 KORINTUS 4:4

Barhala ja'dala' niaka ri lino antongkoki pikkiranna tau tenaya natappa' ri anjo Kabara' Bajika. Iaminjo barhalaya anrompa-rompai ke'nanga sollanna tanacinika singara' battua ri anjo Kabara' Bajika, ri sese kalompoanNa Almasi, a'jaria pammatei rupanNa Allata'ala.

EFESUS 2:2

Anjo wattua nupinawangi kabiasanna ngaseng anne linoa; battuanna nuturuki ero' kakoasanna linoa; iamintu roh niaka angkoasai atinna sikontu tau tenaya namminawang turu' mae ri Allata'ala.

FILIPI 2:15

Lanri kammanami anjo nanupappicinikammo angkanaya ma'nassa ana'-ana'Nako Allata'ala tenaya callanna, lambusuka siagang annabaya batena attallasa' ri tangnga-tangngana tau ja'dalaka siagang dorakaya. Siagang ri wattunna nupabattu mae ri ke'nanga anjo biritta katallassanga, paralluko a'jari sanrapang singara' mae ri ke'nanga, ansioriai linoa. Punna kamma anjo batenu attallasa', nia'mo sallang alasangku langkalompoang pa'maikko, ri wattunna battu poleang ammotere' Isa Almasi. Iaminjo buttina angkanaya tena nasia-sia usahaku, passangalinna nia'ja wassele'na.

1 YOHANES 4:5

Anjo na'bi-na'bi balle-ballea sangnging passala' linoa nabicara; nipilangngerimi bicaranna ke'nanga ri anne linoa, nasaba' anjo ke'nanga tau battu ri linoa assala'na.

1 YOHANES 4:7

Sikamma sari'battang sannaka kukarimangnginna! Mae mako kimassing sikamaseang; nasaba' Allata'ala assala'na anjo pangngamaseanga. Inai-nai mangngamaseang, iami ana'Na Allata'ala siagang iami angngassengi Allata'ala.

1 YOHANES 5:19

Niassemmi angkanaya ikatte anne tau battuki' ri Allata'ala, manna pole nanikoasaimo sikontu linoa ri I Ja'dala'.

PAPPICINI' 12:9

Nipela'mi anjo naga lompoa assulukang! Iami anjo ulara' toaya niarenga Billisi' yareka Roh Ja'dalaka, antipuai sikontu linoa. Nipela'mi naung ri linoa siagang sikontu malaeka'na.