1 KORINTUS 3:13 - KITTA' MATANGKASA'

¹³ Sikontu apa-apa le'baka najama taua, massing lakacinikangi sallang punna battu poleang Almasi. Nasaba' pepe' sallang lampa'nassa ngasengi apa-apa massing le'baka nagaukang rupataua. Pepe' lanipake angnguji siagang ampattantui baji'-kodina anjo jama-jamanga.

1 KORINTUS 3:13 ပူးပေါင်းရင်းမြစ်များ

YESAYA 28:17

Kaadelanga laKupa'jari pa'baku', siagang kalambusanga Kupa'jari pangngukkuru'.” Bosi batua lambarrasaki sa'genna tangkasa' sikamma balle-balle nupattoanga. A'baya langnganyukkangi tampa' paccokkoannu.

YESAYA 8:20

Appiali mako kamma anne, “Pilangngeri ajaranNa Batara! Tau tenaya na'bicara situru' anjo pangngajaranga, tena panrannuanna.”

YEREMIA 23:28

Na'bi asso'naya musti angkanai, ‘Anne poro so'naji bawang.’ Mingka na'bi anggappaya pasang battu ri Nakke musti napabattui anjo pasanga siagang sitojennaya. Gandunga takkulleai nipasangkamma rarame.

YEREMIA 23:29

KanangKu rapangi pepe', siagang rapangi palu-palu angngancuruka batu!

ZAKHARIA 13:9

Bage talluna mami lasalama'. Siagang anjo ke'nanga laKupakatangkasaki rapang pera' nipakati'noka siagang pepe'. LaKuuji ke'nanga rapang tau angngujia bulaeng. Nampa lappala' doang ke'nanga mae ri Nakke, siagang laKupiali pappala'na ke'nanga. LaKupauangi ke'nanga angkanaya iami ke'nanga ummakKu, nampa ke'nanga lamangaku tongi angkanaya iNakkemi Karaeng Allata'alana ke'nanga.”

MALEAKHI 3:17

Nakana Batara Kaminang Koasaya, “La'jari ke'nanga ummakKu. Ri wattungKu angngalle tindakang, la'jari ke'nanga umma' nisayangKu. Lakukamaseangi ke'nanga, rapang se'rea mangge ansayangi ana' mappakalompoa ri kalenna.

MALEAKHI 3:2

Mingka inai lakkulle attahang ri allo kabattuanNa Batara ampa'nyatai KalenNa? Nasaba' sanrapangi pepe'na pade'de' bulaeng ti'no', siagang sanrapangi sabung tukang pasassaya.

MATIUS 10:15

U'rangi! Angkanaya ri Allo Kiamaka sallang, lakkulleangangi nipammopporang tau niaka ri kota Sodom siagang Gomora, kala ia anjo tau niaka lalang ri kotaya!”

MATIUS 16:27

Tasalloami Nabattu Ana' Ma'rupataua siagang kakoasanNa ManggeNa, nirurungang ri malaeka'-malaeka'Na. Iaminjo wattua naNabalasa' massing panggaukanna rupataua.

LUKAS 2:35

na lanri kammana nakaassengammo bone atinna ke'nanga. Lasi'na sikali nusa'ring, sanrapang nito'doka atinnu ri pa'dang sannaka cidu'na.”

ROMA 2:16

Kammaminjo lakajarianga sallang ri allo le'bakamo nipattantu. Ri anjo alloa – situru' Kabara' Baji' kubirittakanga – laNaadeli Allata'ala lalang Isa Almasi rahasia atinna siagang rahasia pikkiranna sikontu rupataua.

ROMA 2:5

Mingka kapala batu ngasengko siagang taerokako ampinrai gau'nu. Jari battu ri kau ngaseng tonji napila' battala' hukkungang lanugappaya sallang punna Allo Kiama', iamintu punna Napa'nyata sallang pangngalarroiNa Allata'ala siagang Napabattu hukkunganNa adeleka.

1 KORINTUS 1:8

KalenNa Almasi ampakajarrekko sa'genna kala'busang, sollanna punna battu poleangi sallang, tena callanu narapikang.

1 KORINTUS 3:12

Nia' ammake bulaeng ambangung irateanna anjo pondasia, nia' ammake pera', nia' ammake batu paramata, nia' ammake kayu, nia' todong ammake ruku' yareka batang ase.

1 KORINTUS 4:5

Lanri kammana, nasaba' tenapa narapiki wattunna, teako akkaro-karo dudui ampattantui angkanaya salai yareka tena nasala se'rea tau. Tayangi sa'genna battu sallang Batara. Iami lassungke ngasengi sikontu rahasia taccokkoa lalang ri sassanga. Iami lampakacinikang ngasengi sikontu apa le'baka narancana lalang ri massing atinna taua. Iapi anjo wattua nampa massing lannarima taua pujiang siratannaya battu ri Allata'ala.

2 TIMOTIUS 1:12

Lanri kammanami anjo nakukasia'mo anne kasessang kammaya jaina; mingka tuli jarreki tappakku, nasaba' bajiki kuassenna angkana inai kupatappa'. Tappa' sikalia' angkanaya akkullei Nakatutui anjo apa le'baka Napappirannuang mae ri nakke sa'genna narapi' Allo Kiamaka.

2 TIMOTIUS 1:18

Siagang ri wattungku ri Efesus jai sikalimi natulunganga'. Yangasenna anne nuasseng ngasemmi. Poro Napappicinikang laloi pangngamaseanNa Batara mae ri ia, ri allo niadelina ngaseng sikontu rupataua ri Batara.

2 TIMOTIUS 3:9

Mingka talanggappayai apa-apa ke'nanga, nasaba' niassemmi kadongokanna ke'nanga ri yangasenna taua, sangkamma kajarianga todong ri kalenna Yanes siagang Yambres.

2 TIMOTIUS 4:8

Na kamma-kamma anne sadiami hadia pammetangku. Ri Allo Kiamaka sallang, laNapassareammi Batara, Haking adeleka, anjo hadiaya mae ri nakke, lanri assibajikingku siagang Allata'ala lalang ri katallassangku. Siagang teai inakkeji bawang lannarima hadia kammaya anjo, mingka sikontu pole tau sannaka nakku'na antayangi kabattuanNa Batara.

IBRANI 10:25

Teako takkaluppai tuli a'rappungang, sangkamma tau maraenga. Ikatte paralluki' la'bi tamalanre massing sipakajarre'; nasaba' niassengi angkanaya tasalloami Nabattu poleang Batara.

1 PETRUS 1:7

Matu-matunna ngaseng anjo iamintu sollanna akkulle a'butti katappakkang tojeng-tojennu mae ri Batara yareka tena. Manna bulaeng akkullea panra' niuji tonji siagang pepe'. Jari, anjo katappakkannu la'bi lompoangangi anggaranna na bulaenga; jari musti niuji tongi sollanna a'jari jarre'. Siagang lanri kammana, lanipuji mako siagang lanipakala'biri' mako, kammayatompa lanipakatinggi mako sallang ri allo kabattuanNa ammotere' Isa Almasi.

1 PETRUS 4:12

Sikamma sari'battangku, sannaka kukarimangnginna! Kamma-kamma anne sanna' sessanu lanri niujiko. Mingka teako lannasakki, sangkamma angkana nia' apa sanna' heba'na kajariang mae ri kalennu.

2 PETRUS 3:10

Mingka lasanrapangi palukka' kabattuanna anjo Allo kabattuanNa Batara. Anjo Alloa lassa'ra lompoi gunturuka nalanynya' langika; sikamma apa-apa niaka ri langika lala'busuki nakanre pepe'. Kammayatompa lalanynyaki buttaya siagang sikontu apa-apa niaka lalang.

2 PETRUS 3:7

Mingka anne langika siagang buttaya ri kamma-kammaya anne, niparakaia todong siagang kananNa Allata'ala, laniancuru' tongi sallang siagang pepe'. Kamma-kamma anne niparakai iji langika siagang buttaya sa'genna narapi' allonna lanihukkung siagang niancuru' sikontu tau tenaya natappa' ri Allata'ala.

PAPPICINI' 20:12

Siagang nia'mi kucini' sikamma tau matea, tau lompo yareka tau ca'di, ammenteng ri dallekanna anjo empoang kala'biranga. Nisungkemi kitta'-kittaka. Nampa nia' tommo se're kitta' maraeng nisungke iamintu Kitta'na Tau Attallasaka. Nampa nitappukimi hukkunganna sikamma tau matea situru' panggaukanna ke'nanga, kamma niaka tattulisi' lalang ri anjo kitta'-kittaka.