1 KORINTUS 16:6 - KITTA' MATANGKASA'

⁶ Kira-kira lammantanga' sinampekang ri tangnga-tangnganu, kira-kira punna battu wattu dinginga sallang. Punna le'baki anjo kuminasai nakkullea' nubantu ampannarrusuki pa'lampangku mange ri tampa' maraenganga.

1 KORINTUS 16:6 ပူးပေါင်းရင်းမြစ်များ

LAMPA-LAMPANA 15:3

Nirurungammi ke'nanga ri anggota-anggota jama'aka sa'genna assulukang kota. Nampa a'lampa ke'nanga allalo ri Fenisia siagang Samaria. Anjoreng, nacaritami ke'nanga antekamma batena bansa-bansa maraenga ampassareang tommi kalenna mae ri Allata'ala. Sanna'mi rannuna ngaseng tau tappaka anjoreng allangngereki anjo kabaraka.

LAMPA-LAMPANA 17:15

Le'baki naantara' Paulus sa'genna ri Atena, ammotere'mi anjo sikamma tau tappaka mange ri Berea. Angngerammi pasang ke'nanga battu ri Paulus, sollanna linta' amminawang Silas siagang Timotius.

LAMPA-LAMPANA 20:38

Sanna' ngaseng si'nana atinna ke'nanga, la'biangampa lanri nakanana Paulus angkanaya talasicinikami ke'nanga. Naantara'mi ke'nanga Paulus sa'genna nai' ri kappalaka.

LAMPA-LAMPANA 21:5

Mingka ri wattunna lala'busu'mo wattunta lammantang anjoreng, a'lampa maki' ambokoi ke'nanga, nanipannarrusu' lampata. Amminawang ngasemmi ke'nanga massing sipammanakang angngantarakki' sa'genna assulu' ri pantaranganna kotaya. Anjoreng ri biring tamparanga, akkulantu' ngaseng maki' appala' doang.

LAMPA-LAMPANA 27:12

Tena memang nabaji' napammantangi kappala' anjo palabuhanga punna wattu dinging. Iaminjo saba'na najaiangang ana'-ana' kappalaka erokangang a'lampaya pole assombala' ambokoi anjo palabuhanga. Eroki nausahai ke'nanga anrapi' mange ri Feniks nampa ammantang anjoreng sa'genna allalo wattu dinginga. Feniks, iamintu palabuhang ri Pulo Kreta a'dalle' mangei ri warakkanna sike'de' ri tampa' labuna alloa.

LAMPA-LAMPANA 28:11

Tallum bulangki' ammantang anjoreng, nampa a'lampa maki' ambokoi anjo puloa. Nai' maki' ri se'reang kappala' battu ri Aleksandria, niaka ammantang anjoreng ri palabuhanna anjo puloa lalanna wattu dinginga. Anjo kappalaka ammakei gambara' “Rewata Kambara'na Kastor siagang Poluks.”

ROMA 15:24

Sallang punna a'lampa' mange ri pa'rasangang Spanyol, erokka' assengka ri kota nupammantangia; nakuma'minasa sollanna akkulleki' assibuntulu', nakukkulle a'rannu-rannu sinampe' siagang ikau ngaseng. Napunna le'baki anjo, kuminasai sollanna akkulle ngasengko ambantua' untu' anjo pa'lampangku mange ri Spanyol.

1 KORINTUS 16:11

Gassingka nia' tau tanjampangiai. Bantui sollanna akkulle napannarrusu' pa'lampanna ammotere' mae ri nakke siagang salama'; nasaba' kutayangi kabattuanna siagang sari'battang maraenganga.

2 KORINTUS 1:16

Erokka' battu angkunjungiko punna a'lampa' mange ri butta Makedonia, siagang nakuassengka pole punna ammoterekka'; sollangku akkulle nubantu punna kupannarrusu' lampaku mange ri pa'rasangang Yudea.

TITUS 3:12

Punna battumo Artemas yareka Tikhikus kusuro mae ri kau, akkaro-karo mako battu mae ri nakke ri Nikopolis, nasaba' erokka' ammantang anjoreng sa'genna le'ba' wattu dinginga.