1 KORINTUS 15:2 - KITTA' MATANGKASA'

² Punna anna'gala' majarrekko mae ri anjo kupabattua mae ri kau, lanipasalama' mako ri anjo Kabara' Bajika; passangalinna bawang punna tappakko natena pammahannu.

1 KORINTUS 15:2 ပူးပေါင်းရင်းမြစ်များ

PANGNGEBARANG 23:23

Ajarang annabaya, kacara'dekang, pangngajara', siagang pammahang, yangasenna anjo siratangi niballi, mingka tena nasiapa anggaranna lanibalukang.

PANGNGEBARANG 3:1

Teako takkaluppai ri apa le'baka kuajarrangko, ana'. Tuli u'rangi parentaku,

PANGNGEBARANG 4:13

Tuli u'rangi ajarang le'baka nutarima battu ri nakke. Jagai anjo baji'-baji', saba' lanri anjo pangngajaraka nalangngerang wassele' tallasa'nu.

LUKAS 8:13

Anjo bine takkioroka ri tampa' a'batu-batua, iaminjo pangngebaranna tau sannanga nyawana ri wattu nalangngere'na anjo kabaraka; mingka tena najarre' anna'gala' aka'na anjo kabaraka lalang ri atinna ke'nanga. Sinampe'ji tappa' ke'nanga; punna battumo paccobaya, ammono'bokomi ke'nanga.

LAMPA-LAMPANA 2:47

Siagang tuli mammuji-muji ke'nanga ri Allata'ala, na ningai ngaseng ri tau jaia. Pila' mange allo pila' katambangi jaina ke'nanga, lanri pila' Natambai Allata'ala tau nipasalamaka mae ri ke'nanga.

LAMPA-LAMPANA 8:13

Manna Simon tappa' tommi. Na ri wattunna le'ba'mo nije'ne', amminawang tulimi ri Filipus. A'jari takkalanna'-lannasa'mi Simon napakamma anjo gau'-gau' appakalannasa' kajarianga.

ROMA 1:16

Inakke tappa' sikalia' mae ri anjo Kabara' Bajika, lanri iaminjo kabara' kakoasanNa Allata'ala eroka ampasalamaki sikontu tau tappaka; uru-uruna iamintu bansa Yahudia, nampa bansa maraenga pole.

ROMA 11:22

Jari anrinni akkullei nicini' antekamma baji'Na Allata'ala, mingka akkulle tongi nicini' antekamma terasa'Na. Sanna' terasa'Na mae ri tau dorakaya, mingka sanna' baji'Na mae ri kau ngaseng – assala' tuli tutuko attallasa' battu ri kabajikanNa. Nasaba' punna tena, ma'nassa lanipela' tongko.

1 KORINTUS 1:18

Nasaba' anjo kabara' kamateanNa Isa Almasi a'jari kabara' balle-ballei mae ri tau lamangea ri kapanrakanga. Mingka untu' ikatte tu nipasalamaka ri Allata'ala, anjo kabaraka iami a'jari pammatei ri Napa'nyatana kakoasanNa Allata'ala.

1 KORINTUS 1:21

Nasaba' manna pole antekamma cara'de'na rupataua, mingka takkulleai mangngasseng ri Allata'ala punna lanri kacara'dekanna bawang. Mingka lanri mangngamaseanNa Allata'ala, Naero'mo ampasalamaki sikamma tau tappaka ri Ia, tete ri anjo biritta napabattua ikambe, nicini' a'balle-ballea ri anne linoa.

1 KORINTUS 11:2

Siratangko kupuji nasaba' tuli nuu'rangia' siagang tuli nuta'gala' jarreki pappilajarang le'baka kupassareang mae ri kau.

1 KORINTUS 15:14

Siagang ebara' angkana tena nanipattallasa' poleang ammotere' Almasi battu ri kamateanga, tenamo matu-matunna anjo apa le'baka nabirittakang ikambe; kammayatompa tena tommo matu-matunnu a'jari tappa', nasaba' tena panna'galanna anjo katappakkannu.

2 KORINTUS 2:15

Nasaba' ikambemi sanrapang kamanynyang mabauka rasanna, nitunua ri Almasi untu' mae ri Allata'ala. Ri tau a'jappa mangea ri possoka, ikambe anne sanrapangki' a'rasa botto' angngeranga kamateang; mingka ri tau nieranga mange ri kasalamakkanga, sanrapangki' rasa mabau' angngeranga katallassang. Jari, maka inai akkulle anggaukangi anne jamanga?

2 KORINTUS 6:1

Lanri assiaganNa Allata'ala ikambe anggaukangi anjo jama-jamanga, iami anjo nanapala' tojeng-tojemmo ikambe sollanna tena nanubawang-bawangangi anjo kabajikang pa'mai'Na Allata'ala.

GALATIA 3:4

Maka tena matu-matunna anjo apa le'baka nutarima? Tena na sia-sia!

EFESUS 2:8

Nakarimangngiko Allata'ala. Iaminjo Nanapasalamakko, lanri tappa'nu mae ri Isa. Anjo kasalamakkannu, teai wassele' usaha kalennu. Mingka passare malammoro'Na Allata'ala. Jari, tena manna sitau akkulle ampattampo-tampoangi kalenna ri anjo passalaka.

KOLOSE 1:23

Mingka tantu musti tuli majarrekko tappa' siagang ammenteng kassa' ri katappakkannu. Gassingka nulappassangi anjo panrannuang le'baka nisareangko ri wattunna nutarima anjo Kabara' Baji' battua ri Allata'ala. Anjo kabaraka le'ba'mi nibirittakang mae ri sikontu taua ri lino. Na untu' iatommi anjo nainakke anne, iamintu Paulus, ku'jari palayang.

2 TESALONIKA 2:15

Lanri kammana, sikamma sari'battangku, paralluko tuli tamalanrea siagang tuli majarre' anna'gala' mae ri pangngajarang-pangngajarang le'baka napabattu ikambe mae ri kau ngaseng, baji' lalang kana-kana, kammayatompa lalang apa natulisika ikambe.

2 TIMOTIUS 1:9

Napasalamakki' siagang Nakiokki' Allata'ala untu' a'jari umma' KalenNa. Iaji naNagaukang Allata'ala anjo kammaya teai lanri apa-apa le'baka nigaukang nabilang ri kalenta, passangalinna lanri ero' KalenNa siagang lanri pangngamaseang malammoro'Na tete ri Isa Almasi, ri wattu tenanapa nanipa'jari anne linoa.

IBRANI 10:23

Paralluko anna'gala' jarre' mae ri panrannuang le'baka nimangakui, nasaba' tappakki' angkanaya laNarupai janjinNa Allata'ala.

IBRANI 2:1

Iaminjo saba'na kimusti la'bi attojeng-tojeng anna'gala' jarre' mae ri sikontu pangngajarang le'baka nilangngere' battu ri Allata'ala, sollanna tena nanibokoi katappakkanta.

IBRANI 3:14

Ikatte anne bela sipanjama-jamanna ngasengki' Almasi, assala' tuli nita'gala' jarreki katappakkang niaka ri katte battu ri uru-uruna sa'genna kala'busang.

IBRANI 3:6

Mingka tamalanreai Isa salaku Ana' antanggongiai amparakai Balla'Na Allata'ala. Na ikattemi anne sanrapang Balla'Na Allata'ala, punna tuli lompona sumangatta siagang tuli tappatta angkanaya tena tanigappana anjo apa niminasaia.

IBRANI 4:14

Iaminjo saba'na kimusti anna'gala' jarre' mae ri pangakuang katappakkanta. Nasaba' nia' Imang Malompota, le'bakamo antama' sa'genna ri dallekanNa Allata'ala – iamintu Isa, Ana'Na Allata'ala.

YAKOBUS 2:14

Sikamma sari'battangku! Apa matu-matunna angkana taua, “Inakke tappakka',” punna tena napa'nyatai anjo katappakkanna lalang ri panggaukanna? Maka akkullei anjo katappakkang kammaya ampasalamaki anjo taua?

YAKOBUS 2:17

Kammatommi anjo ri katappakkanga; punna tena nanipa'nyatai lalang ri panggaukanga, tena matu-matunna anjo katappakkanga.

YAKOBUS 2:26

Jari, sanrapang tubua punna tena rohna nikana matei, kammatommi anjo katappakkanga, punna tena na'nyata lalang ri panggaukanga nikanami mate anjo katappakkanga.