1 KORINTUS 10:16 - KITTA' MATANGKASA'

¹⁶ Ri wattunta sipangnginungang anggoro' siagang appala' sukkuru' mae ri Allata'ala, sai iaminjo a'jari pammatei angkanaya a'jari se're ngaseng maki' siagang Almasi lalang ri kamateanNa? Kammayatompa ri wattunna nibage-bage anjo roti se'rea nampa assama-samaki' angkanrei, sai iaminjo a'jari pammatei angkanaya a'jari se're maki' lalang ri batangkalenNa Almasi?

1 KORINTUS 10:16 ပူးပေါင်းရင်းမြစ်များ

LUKAS 22:17

Le'baki anjo Naangka'mi Isa piala anggoroka, nampa appala' sukkuru' ri Allata'ala. Nampa Nakana, “Allemi anne, nanubage-bage;

LAMPA-LAMPANA 2:42

Tuli attojeng-tojemmi ke'nanga appilajara' ri tunisuroNa Allata'ala. Siagang tuli a'rappungammi ke'nanga appala' doang siagang sipangnganreang.

LAMPA-LAMPANA 2:46

Allo-allona ke'nanga tuli a'rappungang ri Balla'Na Batara; kammayatompa a'le'ba'-le'basaki ke'nanga assama-sama angnganre ri balla'na. Na rannu pa'mai' siagang tuna pa'mai' ngasengi ke'nanga.

LAMPA-LAMPANA 20:11

Le'baki anjo nai'mi ammotere' Paulus ri kamara' napa'rappungia ke'nanga. Nabage-bagemi rotia nampa para angnganre ke'nanga. Sa'genna bari'basa' a'bicara iji Paulus. Le'baki anjo a'lampami Paulus.

LAMPA-LAMPANA 20:7

Ri wattunna bangngi daminggu a'rappungang maki' ero' sipangnganreang ampakajarreki passari'battanganta. A'bicara memammi Paulus siagang sikamma tau hadereka, nasaba' ammukona ero'mi a'lampa. Sa'genna tangnga bangngi a'bicara iji Paulus.

1 KORINTUS 1:9

Akkullei nipatappa' tojeng-tojeng Allata'ala. Iami Allata'ala le'baka angkiokko untu' a'jari se're siagang Ana'Na, iamintu Isa Almasi, Batarata.

1 KORINTUS 10:15

Kupaumi anne mae ri kau ngaseng, kubilanga tau cara'de' annimbang bicara. Parallui nupikkiri' baji'-baji' anne bicara kupaua.

1 KORINTUS 12:13

Kamma ngaseng tommaki' anjo; ikatte tu Yahudia kammayatompa bansa-bansa maraenga, ikatte nikanaya kalenta ata kammayatompa tau bebasaka, le'ba' ngaseng maki' nije'ne' lalang se're Roh, sollanta nipa'jari se're lalang ri tubuNa Almasi. Sukku' ngaseng tommi le'ba'na nikasia' kakoasanNa anjo Roh se'rea.

IBRANI 3:14

Ikatte anne bela sipanjama-jamanna ngasengki' Almasi, assala' tuli nita'gala' jarreki katappakkang niaka ri katte battu ri uru-uruna sa'genna kala'busang.

1 YOHANES 1:3

Apa le'baka nacini' siagang nalangngere' ikambe, ia tomminjo nabirittakang ikambe mae ri kau ngaseng; sollannu amminawang todong siagang ikambe ampa'nyatai katallassang assiamaka, asse'rea siagang Manggea, kammayatompa asse're siagang Ana'Na iamintu Isa Almasi.

1 YOHANES 1:7

Mingka punna attallasakki' lalang ri singaraka, sangkamma Allata'ala niaki lalang ri singaraka, assiama' maki' massing para ikatte lalang ri katallassanta; kammayatompa nitangkasimi sikontu dosa-dosata lalang ri cera'Na Isa, Ana'Na Allata'ala.