1 KORINTUS 1:17 - KITTA' MATANGKASA'

¹⁷ Nasuroa' Almasi teai untu' a'je'ne' tau, passangalinna untu' ambirittakangi Kabara' Baji' battua ri Allata'ala, siagang pole, anjo kugaukangi teai lanri kacara'dekang a'bicara salaku rupatau, sa'genna la'jari sia-siamo anjo koasa kamateanNa Isa Almasi ri kayu sallika.

1 KORINTUS 1:17 ပူးပေါင်းရင်းမြစ်များ

YOHANES 4:1

Nalangngere'mi tu Farisia angkanaya anje'ne' tongi tau Isa, siagang jaiangangi ana'-ana' guru nagappa kala Yohanes. (

YOHANES 4:2

Sikontutojenna teai KalenNa Isa anje'neki taua passangalinna ana'-ana' gurunNaji bawang.)

LAMPA-LAMPANA 10:48

Jari nasuromi Petrus ke'nanga nije'ne' lalang arenNa Isa Almasi. Le'baki anjo napala'mi ke'nanga, sollanna ammantang ija Petrus angngagangi ke'nanga pirang-pirangallo are sallona.

1 KORINTUS 2:1

Sikamma sari'battangku! Ri wattungku battu mae ri kau, nakupabattu rancanaNa Allata'ala tenayapa naassengi anne linoa, teai kacara'dekanna anne linoa kupake, yareka teai bicara ta'liwa'-liwaka baji'na nilangngere'.

1 KORINTUS 2:13

Lanri kammana, punna napakasingara' ikambe sikamma anjo passala' battua ri Allata'ala mae ri tau nikoasaia ri RohNa Allata'ala, teai kacara'dekang battu ri rupataua napake ikambe ampakasingaraki anjo passalaka, mingka situru' ajarang battua ri RohNa Allata'ala.

2 KORINTUS 1:12

Lompomi pa'mai'na ikambe lanri tappa'na ikambe, angkanaya sikamma apa nagaukanga ikambe ri anne linoa, la'biangampa pole nagaukanga ikambe mae ri kau ngaseng, akkullemi nagaukang ikambe siagang lambusu' pa'mai' kammayatompa ati maci'nong. Yangasenna anjo nagaukangi ikambe, teai lanri kacara'dekanna ikambe, mingka lanri pakkulle Napassareanga Allata'ala mae ri kambe.

2 KORINTUS 10:10

Lanakana kapang taua, “Sanna' terasa'na siagang sanna' baji'na sura'-sura'na Paulus. Mingka punna kalenna nia' ri tangnga-tangngata, lamma sikaliji siagang tena nasiapa pau-pauna!”

2 KORINTUS 11:6

Nakkulle kapang tena nakucara'de' a'bicara; mingka ri passala' pangngassengang mae ri Allata'ala, teaiya' tau dongo'. Anjo le'ba'mi kupa'butti mae ri kau lalang a'rupa-rupa passala'.

2 KORINTUS 4:2

Tena nakiaccokko-cokko siagang tena nakiappakasiri' bateta anggaukangi anne jama-jamanga. Tena nakiero' jekkong anggaukangi anne jama-jamanga, yareka tena nakiero' amputara' baleki kananNa Allata'ala. Silambusu'na bawang ero'Na Allata'ala nabirittakang ikambe. Lanri kammana, naminasai ikambe nanabilang baji' ngaseng ri pa'mai'na taua anjo apa nagaukanga ikambe.

2 PETRUS 1:16

Ri wattunna kipabattu mae ri kau antekamma mala'biri'na kabattuanNa Batarata Isa Almasi, tena nakituruki carita kosong battua ri rupataua. Anjo kala'biranNa Almasi mata kalennami ikambe le'ba' anciniki.