1 KARAENG-KARAENG 4:8 - KITTA' MATANGKASA'

^8-19 Anjo sampuloa anrua nipimpingi ri sitau Guburnur. Iaminne massing arenna anjo bupatia siagang daera kakoasanna ke'nanga: Ben-Hur: Daera monconna Efraim Ben-Deker: Kota Makas, Saalbim, Bet-Semes, Elon, Bet-Hanan Ben-Hesed: Kota Arubot, Sokho, siagang sikontu daera Hefer Ben-Abinadab, bura'nenna Tafat ana' bainena Salomo: Sikontu daera Dor Baana ana'na Ahilud: Kota Taanakh, Megido, siagang sikontu daera ri ampi'na Bet-Sean, ri ampi'na kota Sartan ri bageang timboranna kota Yizreel sa'genna kota Abel-Mehola siagang kota Yokmeam. Ben-Geber: Kota Ramot ri Gilead, kampong-kamponna bijanna Yair turunganna Manasye ri Gilead, daera Argob ri Basan; yangasenna nia' annampulo kota lompo, ia nipakajarreka siagang tembo' akkuliling siagang ammakea panjoli-panjoli tambaga ri pakke'bu' lompona Ahinadab ana'na Ido: Daera Mahanaim Ahimaas, bura'nenna Basmat ana' bainena Salomo: Daera Naftali Baana ana'na Husai: Daera Asyer, kota Alot Yosafat ana'na Paruah: Daera Isakhar Simei ana'na Ela: Daera Benyamin Geber ana'na Uri: Daera Gilead, ia nikoasaia riolo ri Sihon karaeng Amori, siagang Og karaeng Basan.

1 KARAENG-KARAENG 4:8 ပူးပေါင်းရင်းမြစ်များ

1 KARAENG-KARAENG 4:7

Salomo angngangkaki sampulo anrua bupati ri sikontu pa'rasangang Israel. Ia tugasa'na ke'nanga iamintu appa'rappung battu ri daerana ke'nanga apa-apa lanakanrea karaenga siagang sikontu bonena balla' karaenga. Sikontu bupatia a'le'basaki tanggong jawa' ri anjo passalaka lalanna sibulang tassitaung.

YOSUA 19:50

Kamma le'baka Naparentakang Batara, napassareangi ke'nanga mae ri ia kota napalaka, iamintu: Timnat-Serah ri pa'monconganna Efraim. Nabangummi Yosua ammotere' anjo kotaya, nampa ammantang anjoreng.

YOSUA 24:33

Nampa mate tommo Eleazar ana'na Harun, na nitarawang ri Gibea, iamintu kota niaka ri daera pa'monconganna Efraim. Anjo kotaya le'ba'mi nipassareang mae ri Pinehas, ana'na Eleazar.

HAKING-HAKING 17:1

Nia' sitau bura'ne niarenga Mikha. Anjorengi ammantang ri bulu'na Efraim.

HAKING-HAKING 19:1

Ri wattu tenanapa karaenna tu Israel, nia' se're tu Lewi ammantang ri padalamang, ri daera pa'bulukanna Efraim. Angngallei sitau baine piara battu ri Betlehem Yehuda.