1 KARAENG-KARAENG 22:43 - KITTA' MATANGKASA'

^43-51 Sangkamma Asa, manggena, nagaukangi apa bajika Yosafat ri dallekanNa Batara. Napa'lanynyaki battu ri kakaraenganna sikamma pasundala' bura'ne bainea, ia tugasaka ri tampa'-tampa' panynyombanga ri barhalaya, ia niakaija tassesa ri jammanna Asa, manggena. Mingka kalenna anjo tampa'-tampa' panynyombanga tena naancuruki. Tuli assareiji ra'yaka koro'bang siagang kamanynyang anjoreng. Yosafat appareki kappala'-kappala' Tarsis untu' angngalle bulaeng battu ri Ofir, mingka anjo kappala'-kappalaka tena nanjari assombala' lanri panraki ri Ezion-Geber. Napalaki Karaeng Ahazia battu ri Israel sollanna ana'-ana' kappala'na a'lampai siagang ana'-ana' kappala'na Yosafat assombala'. Mingka taerokai Yosafat, manna pole nabaji' passisambunganna siagang karaeng Israel. Nampa matemo Yosafat na nitarawang ri jera'na karaeng-karaenga ri Kota Daud. Yoram ana'na ansambeangi a'jari karaeng. Riwaya' maraengannaya ri sesena Yosafat, ri sesena kabaranianna, siagang sikamma pa'bundukang le'baka nagaukang le'ba'mi nicata' lalang ri kitta' Riwaya'na sikamma karaeng Yehuda. Ri anjo jammanga tena karaenna pa'rasangang Edom. Ammarentaya anjoreng iamintu sitau kapala daera.

1 KARAENG-KARAENG 22:43 ပူးပေါင်းရင်းမြစ်များ

1 KARAENG-KARAENG 14:23

Irate ri bulu'-buluka siagang irawanganna poko'-poko' kayu lompoa, ambangummi ke'nanga tampa'-tampa' panynyombang mae ri barhalaya, siagang appaentemmi ke'nanga bangunang-bangunang kammayatompa patung-patung rewata baine Asyera untu' nasomba ke'nanga.

1 KARAENG-KARAENG 15:11

Sangkamma Daud, boe-boena, Asa napakasannangi atinNa Batara.

1 KARAENG-KARAENG 15:14

Manna natenapa naancuru' ngasengi Asa sikontu tampa' panynyombanna barhalaya, mingka tuli majarreki mae ri Batara lalang tallasa'na.

1 KARAENG-KARAENG 15:5

Kammaminjo Nagaukang Batara lanri nipakasannangi atinNa ri Daud. Tena nale'ba' Daud ambalang parekangi parenta-parentaNa Batara, pantaranganna ri parkarana Uria, anjo tau battua ri Het.

1 KARAENG-KARAENG 22:42

Anjo wattua umuru'na tallumpulo allima taung. Ammarentai ri Yerusalem ruampulo allima taung sallona. Amma'na iamintu Azuba ana'na Silhi.

1 KARAENG-KARAENG 3:2

Lanri tenapa nibangungi Balla'Na Batara anjo wattua, ra'yaka assareiji koro'bang ri a'rupa-rupa tampa'.

2 KARAENG-KARAENG 12:3

Iaji bawang sayanna, lanri tenana naputtai tampa' panynyombanga mae ri rewataya, sa'genna tuli assarena ra'yaka koro'bang siagang attunu dupa anjoreng ri tampaka.

2 KARAENG-KARAENG 18:22

Nampa nasambungi bicaranna anjo perwirana tantara Asyur angkana, “Yareka nukana lamanrannuangko mae ri Batara, Allata'alanu? Ri wattunna naparentakang Hizkia sollanna tu Yehuda siagang tu Yerusalem poro ri dallekannaji bawang tampa' pakkoro'bangnganga akkulle anynyomba, sai iatonji anjo tampa' pakkoro'bangnganga siagang tampa'-tampa' panynyombanga ri Batara naancuru'?

2 PATTOTTORANG 14:11

Nampa appala' doang Asa ri Karaeng Allata'alana, nakana, “O Batara, iKatteji bawang akkulle ambantui tau lammaya andallekangi tau kassaka. Kitulung laloi ikambe kamma-kamma anne, o Karaeng Allata'alana ikambe! Ri Katteji bawang tanjeng ikambe, siagang lanri arenTa bawang nassulu' anne ikambe untu' angngewai anne pasukang sannaka lompona. O Batara, iKatteji bawang Allata'alana ikambe. TeaKi' pa'biangngi KalenTa nibeta ri se'reang rupatau.”

2 PATTOTTORANG 15:17

Manna natenapa naancuru' kabusuki Asa sikontu tampa' panynyombanga mae ri barhalaya ri anjo pa'rasanganga, mingka ia tena pamminrana tappa'na mae ri Batara lalang kabusu'na tallasa'na.

2 PATTOTTORANG 15:8

Nalangngere'na Asa kananna anjo Azarya ana'na Oded, a'rinrami sumanga'na. Napakabella kabusu'mi sikontu barhala niaka ri pa'rasangang Yehuda siagang Benyamin, kammayatompa ri kota-kota le'baka nabeta ri daera monconna Efraim, nampa napakabaji' tampa' pakkoro'bangngang niaka ri parang lakkenna Balla'Na Batara.

PAMMUJI 101:3

tena nalakubalang parekang kaja'dallanga. Kukabirisi panggaukanna tau ta'gilinga, siagang tena kuero' siurusu' siagang ke'nanga.

PAMMUJI 125:5

Mingka tau a'gau' jekkonga poro nihukkung laloi ri Batara siagang tau ja'dalaka. Poro salewangang lalo ummatTa!

PAMMUJI 40:4

Naajaraka' angkelongangi lagu berua lagu pammuji untu' Allata'alata. Jai tau anciniki siagang a'jari malla', nampa tappa' mae ri Batara.

KALAPPASSANG 32:8

Ammengkami ke'nanga battu ri parenta-parentaKu. Appareki ke'nanga patung sapi bulaeng, nampa nasomba siagang nasare passare koro'bang. Nakana ke'nanga, iaminjo rewata angngerangai ke'nanga assulu' battu ri Mesir.

PANGNGEBARANG 13:1

Ana' cara'deka naparhatikangi punna nipakainga' ri manggena; tau borroa taerokai annarima pappasaile.

PANGNGEBARANG 4:27

Pakabellai kalennu battu ri kaja'dallanga, siagang lambusukko lalang tallasa'nu. Tea' laloko ammengkai battu ri oloang annabaya.