1 KARAENG-KARAENG 1:25 - KITTA' MATANGKASA'

²⁵ Annemi alloa nale'ba' assare jai koro'bang gimbala', sapi laki, siagang ana' sapi co'mo'-co'moka. Yangaseng ana'-ana' bura'neta naundangi. Kammayatompa sikamma panglima tantarata siagang Imang Abyatar. Kamma-kamma anne sitabangi ke'nanga assua'-suara' siagang akkiok-kio' rannu angkana, ‘Attalasaki Karaeng Adonia!’

1 KARAENG-KARAENG 1:25 ပူးပေါင်းရင်းမြစ်များ

2 SAMUEL 16:16

Ri wattunna anjo Husai agang majarre'na Daud assibuntuluki Absalom, akkio'mi angkana, “Mattallasaki karaenga! Mattallasaki karaenga!”

1 KARAENG-KARAENG 1:19

Le'ba'mi assare jai koro'bang gimbala', sapi laki, siagang ana' sapi co'mo'-co'moka. Le'ba' tommi naundang mae ri passua'-suarranga ana'-ana' bura'neta siagang Imang Abyatar, kammayatompa Yoab, panglima tantarata. Mingka, tena naundangi Salomo.

1 KARAENG-KARAENG 1:24

Nakanamo Natan, “Karaeng mala'biri', apaka le'ba'mi kipauang ra'yaka angkanaya Adonia lansambeangki' a'jari karaeng?

1 KARAENG-KARAENG 1:34

Anjoreng musti niangkaki ri Zadok siagang Natan a'jari karaeng Israel. Le'baki anjo musti nupasa'rai tarompeka nampa akkio' rannuko angkana, ‘Mattallasaki Karaeng Salomo!’

1 KARAENG-KARAENG 1:39

Nampa angngalle Zadok minynya' zaitun le'baka naerang battu ri KemaNa Batara, nampa naminynyaki na naangka' Salomo a'jari karaeng. Nipasa'rami tarompeka nampa sikontu tau hadereka anjoreng akkio'mi angkana, “Mattallasaki Karaeng Salomo!”

1 KARAENG-KARAENG 1:9

Ri se'reang allo, ri tampa' niarenga Batu Ulara' ri ampi'na timbuseng je'ne' En-Rogel, Adonia assaremi koro'bang gimbala', sapi laki siagang ana' sapi co'mo'-co'moka. Naundammi ana'-ana' bura'nena Karaeng Daud maraenga, siagang pagawe-pagawena balla' karaeng battua ri suku Yehuda mange ri anjo passua'-suarrang koro'banga.

1 KARAENG-KARAENG 2:15

Appialimi Adonia angkana, “Kiassengi ibu' angkanaya mustina inakkeji a'jari karaeng. Iaminjo naminasai sikontu Israel. Mingka ia kajarianga ta'bale'mi. Andikku a'jari karaeng, lanri kammai anjo Nakaerokia Batara.

2 KARAENG-KARAENG 11:12

Le'baki anjo nierammi Yoas assulu' ri Yoyada, nampa napataba ri ulunna Yoas songko' kakaraenganga, siagang napassareang mae ri ia kitta' HukkunNa Allata'ala. Nilanti'mi Yoas a'jari karaeng, nampa nipa'la'bang anjo passalaka mae ri sikontu ra'yaka. Attempa lima kabusu'mi ke'nanga siagang akkio' rannu angkana, “La'bui umuru'na karaenga!”

2 KARAENG-KARAENG 11:14

Nacini'mi anjo karaeng berua ammenteng ri pakke'bu' antamaya ri Balla'Na Batara ri napattampakkia nilanti', nitammulili ri perwira-perwiraya siagang patui' tarompeka. Sikontu ra'yaka akkio' rannu kabusuki nampa nipasa'raya tojeng tarompeka. Lussa'mi nasa'ring nyawana Atalya nanakekke' pakeanna, siagang a'gora angkana, “Pasingkongkolang! Pasikongkolang!”

2 KARAENG-KARAENG 9:13

Akkaro-karomi agang-aganna Yehu ansungkei jubana ke'nanga nampa napaka'rang ri tukaka ri dallekanna Yehu. Nampa appasa'ra ke'nanga tarompe' siagang a'gora angkana, “Yehu a'jari karaeng!”

1 PATTOTTORANG 29:13

Kamma-kamma anne, o Allata'alana ikambe, appala' sukkuruki ikambe mae ri Katte, siagang mammuji ikambe ri areng mala'biritTa.

1 PATTOTTORANG 29:21

Ammukona ammolommi ke'nanga olo'-olo' untu' a'jari koro'bang passare mae ri Batara, nampa nibage-bage mae ri sikontu ra'yaka. Pantaranganna anjo nia' 1.000 sapi laki, 1.000 gimbala' laki, 1.000 gimbala' laki rungkaya nipolong siagang nitunu akkayu irate ri tampa' pakkoro'bangnganga. Assare tommi ke'nanga anggoro' ia nitantukanga untu' massing-massing anjo sikamma koro'banga.

2 PATTOTTORANG 23:11

Le'baki anjo nierammi Yoas ri Yoyada assulu', nampa napadongko' songko' kakaraenganga ri ulunna, siagang napassareang Kitta' “HukkunNa Allata'ala” mae ri Yoas. Kammami anjo batena niangka' Yoas a'jari karaeng. Nampa massing appatiri' minynya' Imang Yoyada siagang sikamma ana'na, iamintu minynya' upacara palantikang mae ri Yoas; a'gora lompomi sikamma taua angkana, “La'bui umuru'na karaenga!”

MATIUS 21:9

Nampa a'jappa anjo tau jaia ri dallekanNa siagang ribokoNa Isa. Akkiok-kio'mi ke'nanga angkana, “Nipakalompoi Ana'na Daud! Nibarakkakimi battua lalang arenNa Batara! Nipujimi Allata'ala Kaminang Tinggia!”

MATIUS 22:4

Jari nasuromi pole pala'-palayanna maraenga anjo Karaenga. Napasammi ke'nanga angkana: ‘Pauang ngasengi anjo tau le'baka niburittai angkanaya: Tattala ngasemmi apa-apaya ri passua'-suarrang pa'buntinganna Karaenga. Sikamma sapia siagang sapi rungka kaminang bajika le'ba'mi nisuro polong. Kamma-kamma anne sadia ngasemmi. Umbamo kimange anjoreng assua'-suara' ri pa'buntinganga!’

LUKAS 19:38

Akkiok-kio'mi ke'nanga angkana, “Nibarakkakimi Karaeng battua lalang arenNa Batara! Salewangangi ri suruga, nanipuji Allata'ala!”

1 SAMUEL 10:24

Nampa nakanamo Samuel mae ri ra'yaka, “Iaminne tau nipilea ri Batara, tena sangkammanna ri katte ngaseng.” A'gora lompomi sikontu bansaya angkana, “Mattallasaki karaenga!”