Ndeuteronomio̱ 16:2 - Xo̱jo̱n eén Néná

^2-7 »Ni̱xtjin tjoón sꞌué paskuaa̱, nga jñoó, chjiéngá kongínjnú ki̱a̱ ndiꞌandikoón, kó ngo cho̱yojo, ko̱jo ngo cho̱tsa̱nga̱ ti̱ꞌankꞌasꞌiénjnúu̱ Néná. Ngata̱ ki̱a̱jín na̱xi̱ńdáꞌniú xi tsja̱ajnú Néná niꞌánkꞌasꞌiénjnú kui cho̱o̱, chjiéngá ta̱ ki̱a̱ tsí ndiꞌandikoón ti̱ꞌankꞌasꞌiénjnú, kó nga kjimajñoó boá nga ti̱ꞌánjnú kui nii̱, ngatꞌa̱ bo̱a̱ chon nga jatjojnú nangi Ejipto̱. Ka̱má xi̱ni̱e̱jnú yojoo̱ kui cho̱o̱, ta̱nga ta̱ pan xi jmí nisanjiín tsí xi ka̱ma xi̱ni̱e̱tꞌajo̱jnú, kó ka̱májín chií si̱ꞌankꞌangíjnú tsi̱ꞌe̱ kamángindyiojón. Chjiéngá xi̱ni̱e̱ yejejnú. »Ngo xomana̱ ndo̱jò ndójo̱ nga ka̱ma kui sꞌueé. Ngayeje kui ni̱xtjii̱n ta̱ pan xi jmí nisanjiín tsí xi ka̱ma xi̱ni̱e̱jnú, xikoó xi kichiniejnú kui ni̱xtji̱e̱e̱n, kjiꞌanga xi tsá xi boaꞌa jatjojnú ki̱a̱ nangi Ejipto̱. Kui paa̱n, kuí boá xi “paa̱n kjo̱a̱ni̱ma̱” kꞌuin. Ngatsjéni̱xtjin nga xi̱ni̱e̱jnú, chjiéngá kjo̱a̱ꞌátsjienjnú kui kjo̱a̱ni̱ma̱ xi ikitjajinjnú ki̱a̱ nangi Ejipto̱, ko̱jo kótsꞌèn jatjojnú kui ngi̱ndiee̱. Ngayeje kui xomana̱ nga ka̱ma kui sꞌueé, nde ka̱májín chií nisan chjiéngá kꞌuié ngayeje kui na̱xi̱ńdaá. »Nga kamángindyiojón, ngije kiniꞌánchjánjnú ko̱jo ngije kichiniejnú kui cho̱ xi kiniꞌánkꞌasꞌienjnúu̱ Néná, ka̱ma kongín nginíjnú ndiꞌajnú.

Ndeuteronomio̱ 16:2 ပူးပေါင်းရင်းမြစ်များ

Xki̱ 9:2

«Xota̱ Israee̱l chjiéngá sa̱ꞌín sꞌué paskuaa̱, kó nga kamángixoón ni̱xtjin tienijoón sá xí ꞌmí Abii̱b ku̱i̱ꞌítsꞌi̱yanii̱ nga sa̱ꞌín, xikótsꞌèn je akoyájnúꞌun».

Matioo̱ 26:17

Ni̱xtjin tjoón nga chinie pan xi jmí nisan mindyiajiín, jachókoón xota̱ tsi̱ꞌe̱ Kjisoo̱, kó bi̱ katsó kui jaá: –Ñání nga mejeén nga kꞌuijñándajne̱ ni xi xi̱ni̱ ji nga ka̱ma sꞌué paskuaa̱.

Matioo̱ 26:2

–Ja̱ jè yàjnú nga ngi jó ni̱xtjin chaja nga ka̱ma sꞌué paskuaa̱, kó ndií nda̱ xi̱ꞌii̱n si̱ꞌankꞌasꞌien tsi̱ꞌe̱ nga kjótꞌa kro.

Markoo̱ 14:12

Ni̱xtjin tjoón nga chinie pan xi jmí nisan mindyiajiín, kjiꞌanga niꞌánkꞌién ngo cho̱tsa̱nga̱ tsi̱ꞌe̱ sꞌué paskuaa̱, xota̱ tsi̱ꞌe̱ Kjisoo̱, bi̱ katsoó: –Ñání nga mejeén nga kꞌuijñándajne̱ ni xi xi̱ni̱ ji sꞌué paskuaa̱.

Rkaa̱ 22:15

Kó bi̱ katsoó kui jaá: –Achichí kamámejénna nga skjíni̱e̱jo ngasejnúꞌun ṉño̱ kui sꞌué paskuaa̱, ngindiee̱ nga kjo̱a̱ꞌatio an kjo̱a̱ni̱ma̱.

Rkaa̱ 22:8

Kó Kjisoo̱ katsangiya Peé ko̱jo Juaa̱, nga bi̱ katsoó: –Tangínjnú, kó tꞌíjñandajnú ni xi xi̱ni̱e̱ ñá nga ka̱ma sꞌué paskuaa̱.

1 Xota̱ Korinto̱ 5:7

Kó kuíni nga chje̱ꞌéxínjnú kui jeé, ngatꞌa̱ kui jeé tsꞌénkjátsónjnú jún. Kuí xí xikoó nisan xi mindyiakátjo̱ nda̱ꞌyo̱paa̱n, kó ta̱sá xikoó tsi nda̱ꞌyo̱ tja̱tsi̱e̱ ngatamajnú, kui xi niꞌánkjién nga manda pan xi chinie ni̱xtjii̱n sꞌué paskuaa̱, nda̱ꞌyo̱ xi tja̱tsi̱e̱ xi jmíjiín nisan xchá. Ja̱koxi̱ nga jún xi bo̱a̱ kónjnú ngotꞌe̱, ngatꞌa̱ Kristoo̱ kuí xí cho̱tsa̱nga̱a̱ sꞌué paskua̱ná kui xi kiniꞌánkꞌién nganda tsa̱ñá.

Ndeuteronomio̱ 12:26

Ti̱ bo̱a̱ ti̱ ti̱ꞌánjnúu̱ jiín cho̱ xi kjo̱a̱tjó si̱ꞌánjnú nga si̱ꞌankꞌasꞌienjnú nganda tsi̱ꞌe̱ Néná: Tjón mára chjatjónjnú kui jiín ki̱a̱ nga̱són ṉchaa̱n, sꞌe̱ jaskan ka̱ma xi̱ni̱e̱jnú yojoo̱.

Ndeuteronomio̱ 12:5

»Néná kjo̱a̱ꞌájin ngo ngi̱ndie nínga kꞌuijñá nga kꞌuijñájinjnú kuí, kó ki̱a̱ boá nínga kongínjnú tsi̱ꞌe̱ nga si̱ꞌantsjajnúu̱, nga xꞌi̱a̱jnú kjo̱a̱tjó xi kꞌuitíjnú nganda tsi̱ꞌe̱. Kó ti̱ ki̱a̱a̱ chjiéngá kongínjo̱jnú tie nga úchaán ngayeje ni xi si̱ꞌánjnú, ko̱jo chji̱e̱ xi ngayeje ini̱ma̱jnú nga si̱ꞌankꞌasꞌienjnú, ko̱jo ndí xí tjoón cho̱yojojnú, ko̱jo cho̱tsa̱nga̱jnú, ko̱jo kje̱ꞌe ngase kjo̱a̱tjó xi kiꞌmíyatjónjnú nga ko̱e̱ꞌéjnúu̱.

Ndeuteronomio̱ 15:20

»Xki̱ nó chjiéngá chjábéjnú kui cho̱o̱, kó ki̱a̱ xi̱ni̱e̱jnú nga ka̱ma ngo ni xi ndikón, nínga tikón ndiꞌandikoón, jún ko̱jo xota̱ ndiꞌajnú.

Ndeuteronomio̱ 16:1

Moisee̱ bi̱ katsó ngasee̱ xota̱ na̱xi̱ńdaá: «Sá Abii̱b boá nga si̱ꞌánjnú sꞌué paskuaa̱ nganda tsi̱ꞌe̱ Néná. Ngatjaꞌátsjienjnú nga ngo má ni̱xtji̱e̱e̱n sá Abii̱b nga Néná katsꞌéndéjnú ki̱a̱ nangi Ejipto̱.