Ndeuteronomio̱ 12:5 - Xo̱jo̱n eén Néná5-6 »Néná kjo̱a̱ꞌájin ngo ngi̱ndie nínga kꞌuijñá nga kꞌuijñájinjnú kuí, kó ki̱a̱ boá nínga kongínjnú tsi̱ꞌe̱ nga si̱ꞌantsjajnúu̱, nga xꞌi̱a̱jnú kjo̱a̱tjó xi kꞌuitíjnú nganda tsi̱ꞌe̱. Kó ti̱ ki̱a̱a̱ chjiéngá kongínjo̱jnú tie nga úchaán ngayeje ni xi si̱ꞌánjnú, ko̱jo chji̱e̱ xi ngayeje ini̱ma̱jnú nga si̱ꞌankꞌasꞌienjnú, ko̱jo ndí xí tjoón cho̱yojojnú, ko̱jo cho̱tsa̱nga̱jnú, ko̱jo kje̱ꞌe ngase kjo̱a̱tjó xi kiꞌmíyatjónjnú nga ko̱e̱ꞌéjnúu̱. အခန်းကိုကြည့်ပါ။ |
Ndeuteronomio̱ 12:5
50 ပူးပေါင်းရင်းမြစ်များ
»Kjiꞌanga si̱ꞌandajnú ngo ṉchandikón tsi̱ꞌe̱ nga an si̱ꞌandikónjnúꞌun, ńdie ti̱ꞌandajo̱jnú, kó ki̱a̱ ti̱ꞌankꞌiènjnú cho̱tsa̱nga̱ ko̱jo cho̱yojo xi̱ꞌin xi si̱ꞌankꞌasꞌienjnúꞌun. Ki̱a̱ tꞌíjñájnú nga̱soón kui ṉchaa̱n kui kjo̱a̱tjó xi si̱ꞌankꞌasꞌienjnú kjo̱a̱a̱ jeé xota̱ na̱xi̱ńdaá, ko̱jo kui kjo̱a̱tjó xi bokó nga mejénjnú nga kꞌuiéná kjo̱a̱xió jún ko̱jo an, ko̱jo jún ko̱jo xota̱ xi ngasee̱. An kji̱ndi̱bá an ngo ngi̱ndie xi kjoaꞌajin an tsi̱ꞌe̱ nga kjo̱a̱ꞌátsjienjnú an, kó án boá xi sa̱ꞌin an nga nda ka̱ma ngayeje ni xi si̱ꞌánjnú.
»Chónjnú nga ta̱xkiya mongínjo̱jínjnú kjo̱a̱tjójnú ta̱jñà ngi̱ndiení, chjiéngá ta̱ ki̱a̱ tsí kongínjo̱jnú ngi̱ndie xi Néná kjo̱a̱ꞌájin ngi̱jii̱n xota̱ tji̱e̱e̱. Ki̱a̱ boá nínga si̱ꞌánjnú ni xi je atixomájnúꞌun nga si̱ꞌánjnú, kó ki̱a̱ ko̱e̱ꞌéjnúu̱ ndokꞌóchjì Néná, ngatꞌa̱ achichí tsie ni tjié xi katsjájnú nga kachjaꞌátikójnú. Nga ka̱ma kui sꞌueé ka̱ma xi̱ni̱e̱jnú ngayeje ni xi kichꞌiájnú. Ngayeje xota̱ na̱xi̱ńdaá ka̱ma sa̱ꞌín kui nii̱, tsi ma ko̱jo tsi májín fochó ngindyi̱ko̱n Néná. Ta̱kuítsí ni xi ka̱májín sa̱ꞌín, nga ka̱májín skji̱ni̱e̱ yojo xi to̱kó tjiín jín, chjiéngá nga tsjandiè máraa̱ nga kjo̱tjo jiín kui yojoo̱ ki̱a̱ nga̱són tꞌanangii̱. »Tji̱e̱nga ki̱a̱ tindyiónjnú na̱xi̱ńdáꞌniújnú, ka̱májín xi̱ni̱e̱jnú ni xi chji̱a̱ni kjo̱a̱tjó xi ko̱e̱ꞌéjnú, ngaskande nga kjóchójnú ngi̱ndie nínga Néná kjo̱a̱ꞌájin nga si̱ꞌandaa̱ ndiꞌandikoón. Ngata̱ niꞌánchíyájínjnú nga ko̱e̱ꞌéjnúu̱ chiboa ni xi sa̱kójnú xota̱ tji̱e̱e̱ Lebii̱ kui xi síndo ki̱a̱ na̱xi̱ńdájnú.
»Ni̱xtjin tjoón sꞌué paskuaa̱, nga jñoó, chjiéngá kongínjnú ki̱a̱ ndiꞌandikoón, kó ngo cho̱yojo, ko̱jo ngo cho̱tsa̱nga̱ ti̱ꞌankꞌasꞌiénjnúu̱ Néná. Ngata̱ ki̱a̱jín na̱xi̱ńdáꞌniú xi tsja̱ajnú Néná niꞌánkꞌasꞌiénjnú kui cho̱o̱, chjiéngá ta̱ ki̱a̱ tsí ndiꞌandikoón ti̱ꞌankꞌasꞌiénjnú, kó nga kjimajñoó boá nga ti̱ꞌánjnú kui nii̱, ngatꞌa̱ bo̱a̱ chon nga jatjojnú nangi Ejipto̱. Ka̱má xi̱ni̱e̱jnú yojoo̱ kui cho̱o̱, ta̱nga ta̱ pan xi jmí nisanjiín tsí xi ka̱ma xi̱ni̱e̱tꞌajo̱jnú, kó ka̱májín chií si̱ꞌankꞌangíjnú tsi̱ꞌe̱ kamángindyiojón. Chjiéngá xi̱ni̱e̱ yejejnú. »Ngo xomana̱ ndo̱jò ndójo̱ nga ka̱ma kui sꞌueé. Ngayeje kui ni̱xtjii̱n ta̱ pan xi jmí nisanjiín tsí xi ka̱ma xi̱ni̱e̱jnú, xikoó xi kichiniejnú kui ni̱xtji̱e̱e̱n, kjiꞌanga xi tsá xi boaꞌa jatjojnú ki̱a̱ nangi Ejipto̱. Kui paa̱n, kuí boá xi “paa̱n kjo̱a̱ni̱ma̱” kꞌuin. Ngatsjéni̱xtjin nga xi̱ni̱e̱jnú, chjiéngá kjo̱a̱ꞌátsjienjnú kui kjo̱a̱ni̱ma̱ xi ikitjajinjnú ki̱a̱ nangi Ejipto̱, ko̱jo kótsꞌèn jatjojnú kui ngi̱ndiee̱. Ngayeje kui xomana̱ nga ka̱ma kui sꞌueé, nde ka̱májín chií nisan chjiéngá kꞌuié ngayeje kui na̱xi̱ńdaá. »Nga kamángindyiojón, ngije kiniꞌánchjánjnú ko̱jo ngije kichiniejnú kui cho̱ xi kiniꞌánkꞌasꞌienjnúu̱ Néná, ka̱ma kongín nginíjnú ndiꞌajnú.
ကြော်ငြာတွေ