Matioo̱ 13:22 - Xo̱jo̱n eén Néná

²² Kó kui xojmá xí ixó ngi̱jin ndaꞌyaá, kuí xí xikoó xota̱ xi ntꞌié eén Néná, ta̱nga ta̱soboá nda̱ kjimaa̱ ni xi tjiín kui nga̱sondiee̱, kó kjo̱a̱chꞌáṉchaa̱ kjo̱a̱cho̱o̱n tsꞌénxí eén Néná, kó kui nii̱ xi tsjandièjín nga boajaá to.

Matioo̱ 13:22 ပူးပေါင်းရင်းမြစ်များ

Xo̱jo̱n Salmoo̱ 52:7

«¡Tsitsíjenjnúu̱ kꞌi̱e̱e̱ kui nda̱ xi jmí tsi Néná tsangase nga tsja̱angaꞌniuú! ¡Ta̱sá kjo̱a̱cho̱n tsiee̱ xi kamáꞌniátakón, kó ꞌniú ngase kamá nga katsꞌén ni xi ndajín!»

Xo̱jo̱n Salmoo̱ 62:10

Ngata̱ ki̱a̱jín maꞌniátakónjnú ni xi ꞌniú ndajiín, ti̱nde ngata̱ ꞌbejínjnú kjo̱a̱chiyá kjo̱a̱a̱ kjo̱a̱chejeé, ndatsi ka̱matsie ngase kjo̱a̱cho̱njnú, nga ki̱a̱jín ꞌbíjñajnú ini̱ma̱jnú.

Énkjínkón 11:28

Xota̱ xi kjo̱a̱cho̱o̱n maꞌniátakón, ku̱i̱xo̱ xikoó xka̱ kixií ngo yá, ta̱nga xota̱ xi kixi̱i̱, xtjóntsꞌién nginí xikoó tjiaa̱ ngo yá.

Énkjínkón 23:5

A jè kamáyè ji tsi tjín kjo̱a̱cho̱n. Jmí jmíjín. Ngatꞌa̱ xikónií tsi nga̱a̱ ja̱ fotjoo̱, sꞌe̱ fítji̱e̱n nga chaja nkꞌa jàn.

Eklesiastee̱ 4:8

Kamábe an ngo nda̱ xi tikón soboá, xi jmí ndíjiín ko̱jo xi jmí ntsꞌi̱e̱jín, kó ngatsjéni̱xtjin nga tjitsꞌénxá, kó jmíni̱xtjin nga bo̱a̱ kjiꞌi kamánii̱, ta̱sá ꞌniú ngase kamámejeén nga tsie ngase ni kꞌuieé. Kui nda̱a̱ jmíni̱xtjin bi̱ tsꞌén tsꞌénkjó: ꞌYá xí tjítsꞌenxáñáa̱. Kó míkjo̱a̱a̱ nga tsꞌénmejée̱n ko̱n an ni xi ndaa̱. ¡Ta̱kjo̱a̱ndaní bo̱a̱ kui nii̱, kó chꞌià é boá!

Matioo̱ 12:32

Kó ta̱ ꞌyání xi chꞌo ka̱tso̱o̱ ndií nda̱ xi̱ꞌii̱n, si̱ꞌanjetakoón, ta̱nga xi chꞌo ka̱tso̱ kondra̱a̱ A̱si̱énni̱xtjii̱n Néná si̱ꞌanjetakónjiín, ti̱nde kui nga̱sondiee̱ xi̱ꞌbi̱, ti̱nde nga̱sondie xi sꞌe̱ ndibaá.

Matioo̱ 13:39

kó kondra̱ xi ítji̱e̱ kui xka̱a̱, kuí xí xindajín ndiabloo̱, ni xi kamáxchaá, kuí boá xi nga fetꞌaa̱ nga̱sondiee̱, kó já xí jaꞌáꞌyá kui ni xi kamáxchaá, kuí boá xi ndítsjiee̱ Néná.

Matioo̱ 13:40

Kó xikótsꞌèn chjaníyá xka̱ xi ndajiín sꞌe̱ ꞌbítí ngi̱jin ndiꞌií, bo̱a̱ ti̱ ka̱ma nga kju̱i̱e̱ kui nga̱sondiee̱,

Matioo̱ 13:7

Kó ingo tjín kuí xojmaá xi ixó ngi̱jin yándáꞌyaá, kó nga kamánkꞌá yándáꞌyaá, katsꞌénxí.

Rkaa̱ 12:15

Kósꞌe̱ bi̱ katsó ngase: –Tsitsíjenjnú, kó chónjnúu̱ yojojnú kjo̱a̱a̱ ngayeje kjo̱a̱xki̱ꞌá to̱n, ngatꞌa̱ kui kjo̱a̱mindyioo̱n xotaa̱, jmí tsi tsi̱ꞌe̱ nga kjín ni kꞌuieé nga síndo.

Rkaa̱ 12:21

Bo̱a̱ máa kui xota̱ xi tsie kjo̱a̱cho̱n ꞌbitíkoó yojoo̱, ta̱nga achichí ni̱ma̱ síndo ngindyi̱ko̱n Néná.

Rkaa̱ 21:34

Chónjnúu̱ yojojnú, kó ngata̱ ꞌbíjinjínjnú ini̱ma̱jnú, kjo̱a̱xki̱ꞌaá, ko̱jo kjo̱a̱chꞌi̱i̱, ko̱jo ni nga̱sondiee̱, ngatꞌa̱ tsi ta̱ bi̱ má tji̱e̱n kjo̱chó kui ni̱xtjii̱n,

Rkaa̱ 8:14

Kó kui xojmá xí ixó ngi̱jin ndaꞌyaá, kuí xí xikoó xota̱ xi ntꞌié eén Néná, ta̱nga chíchi̱ chíchi̱ ꞌbijñá kui eén, ngatꞌa̱ kjo̱a̱nda̱a̱ kjo̱a̱cho̱o̱n, ko̱jo kjo̱a̱tsja xi tjiín kuí nga̱sondiee̱, tsꞌénchájá, kó jmí to ꞌbéjiín nga maxchá.

Ni xi kamá 8:18

Kó nga kamábe Ximoo̱ nga já apostro̱ Peé ko̱jo Juaa̱ ta̱ íjñasónrií tsja xotaa̱ nga katsjaá A̱si̱énni̱xtjii̱n Néná, kamámejeén nga to̱n tsja̱á,

Xota̱ Roma̱ 12:2

Kó ngata̱ bo̱a̱jín tsꞌén mindyiónjnú xikótsꞌèn síndo xotaa̱ kui nga̱sondiee̱, ta̱sá te̱ꞌéndièjnúu̱ nga ka̱matja̱tsi̱e̱ya kjo̱a̱kjíntakónjnú, tsi̱ꞌe̱ nga bo̱a̱ tsꞌén xcha̱jnú ni xi nda, ko̱jo xi tsjakjiꞌi, ko̱jo xi ndo̱jò kjin kjin xi mejeén Néná.

1 Xota̱ Korinto̱ 1:20

Mí chjínií nda̱ kjínkoón kui nga̱sondiee̱. Mí chjínií nda̱ chji̱ni̱e̱kjo̱a̱kitii̱ kui nga̱sondiee̱. Mí chjínií nda̱ xi maa̱ fotí kjo̱a̱a̱ ngayeje nii̱ kui nga̱sondiee̱. Ngatꞌa̱ Néná boá xi katsꞌéntsobéjii̱n kjo̱a̱kjínkoón xotaa̱ kui nga̱sondiee̱.

1 Xota̱ Korinto̱ 2:6

Ta̱nga eén kjo̱a̱kjínkón boá xi ndokjo̱a̱jojne̱ kui xota̱ xi je ꞌniú makjiín eén Néná, ta̱nga kuijín kjo̱a̱kjínkoón kui nga̱sondiee̱, ti̱nde kuijín chji̱a̱ni xi botixómaá kui nga̱sondie xi je kjifee̱.

1 Xota̱ Korinto̱ 2:8

Kui kjo̱a̱kjíntakoón nde ngojín xota̱ xi botixómaá nga̱sondiee̱ xi kamákjiín, ngatꞌa̱ tsi kamákjiín kui nii̱, yítꞌajínra̱ kro kui Ndi̱a̱ xi tjiín kjo̱a̱jee̱ tsobo̱a̱.

1 Xota̱ Korinto̱ 3:18

Ngata̱ ngojín xi ꞌboṉcha̱jo yojoo̱, tsi tjín ngi̱jinjnú ngo nda̱ xi nda̱ kjínkón kjimaa̱ yojoo̱, xikoó xota̱ kjínkoón kui nga̱sondiee̱, ta̱sá xikoó tsi ngo xota̱ xi jmí ni bejín nga tsꞌén yojoo̱, tsi̱ꞌe̱ nga ngo nda̱ xi kjínkón ja̱koxi̱ ka̱ma.

2 Xota̱ Korinto̱ 4:4

Ngatꞌa̱ nee̱ kui nga̱sondiee̱ katsꞌénjñoó kjo̱a̱kjíntakoón kui xota̱ xi sꞌijinjiín, tsi̱ꞌe̱ nga sku̱i̱e̱ cha̱n cha̱njín, kjo̱a̱tsijee̱n ndiꞌí ꞌna̱a̱ éntjatsi̱e̱ xi tsꞌéntsáyà kjo̱a̱jee̱ Kristoo̱, kó kuíni nga, nga ya ñá Kristoo̱, makjínná kókjiꞌi kjo̱a̱jee̱ Néná.

Xota̱ Ngalasia̱ 1:4

kui xi katsjá yojoo̱ nga kiniꞌánkꞌién ta̱ngatꞌanii̱ jéná, tsi̱ꞌe̱ nga kꞌo̱xiéꞌáná kui nga̱sondie xi ndajín xi tindyión kuí ni̱xtjii̱n, xikótsꞌèn kamámejeén Néná xí Na̱ꞌmii̱.

Xota̱ Éfeso̱ 2:2

kui ni xi kixindyionjinjnú kje̱ꞌe ni̱xtjin, ngatꞌa̱ ki̱a̱ tsangíntji̱ngijnúu̱ nii̱ kui nga̱sondiee̱, kó kiniꞌánjnú ni xi mejeén ngito̱ko̱o̱ a̱siénni̱xtjin xi ndajín, kui xi botixómá ngi̱jin tjo̱o̱, ko̱jo xi tsꞌénxá ngi̱jii̱n xota̱ xi ntꞌiéꞌénjiín Néná.

1 Timoo̱ 6:17

Xota̱ cho̱o̱n kui nga̱sondiee̱ tatíxomée̱ nga jejín ꞌboxié yojoo̱, ti̱nde nga kjo̱a̱cho̱o̱njín xi ka̱maꞌniátakón, ngatꞌa̱ kjo̱a̱cho̱o̱n jmí tsi ngatsjéni̱xtjii̱n nga sꞌi̱jña, ta̱sá kui Néná xi tikoón xi ngatamaꞌniátakón, ngatꞌa̱ kuí boá xi tsjáná ngayeje ni xi machjiénná, tsi̱ꞌe̱ nga tsjatsꞌèn si̱ꞌankjién kuí nii̱.

2 Timoo̱ 4:10

ngatꞌa̱ Ndemaa̱, tjó ngase kamaá nii̱ kui nga̱sondiee̱, kó jè íjñámasienna nga kijí na̱xi̱ńdáꞌniú Tesalónika̱. Kresentee̱ je kijí nangi Ngalasia̱, kó Titoo̱ nangi Ndalmasia̱ kijí.