Éksondo̱ 27:9 - Xo̱jo̱n eén Néná

^9-19 »Nga ngo foaꞌatjiyajoo̱n ndiꞌandikoón mejénna nga ngo ndi̱tsen kꞌuijñíi̱ xi ńjño kortina̱ kꞌuíchjáꞌyáni. Xtji̱e̱e̱n ta̱ꞌin ko̱jo xtji̱e̱e̱n nangii̱ kui ndi̱tsee̱n chjiéngá yichán ún metro̱ nga ndojoó ka̱ma, kó nga ngo kui nga̱ndee̱ kan yásé kꞌuíndoo̱, kó nga ngo nga ngo kui yáseé ngatꞌíndoo̱ ngindie. Kó nga tiyaá kui ndi̱tsee̱n xtji̱e̱e̱n nínga fotjo ko̱jo xtji̱e̱e̱n nínga ꞌbosꞌien tsꞌueé chjiéngá kan jó metro̱ masien ka̱ma. Ki̱a̱ xtji̱e̱e̱n nínga ꞌbosꞌien tsꞌueé, ki̱a̱ nínga nga̱xto̱n nínga fetꞌaa̱ ndiꞌandikoón chjiéngá tie yásé kꞌuíndoo̱, kó ngi jun yásé kꞌuíndoo̱ xtji̱e̱e̱n nínga fotjo tsꞌueé, ján ján kꞌuíndo nínga bitjasꞌi̱e̱nni kui nga̱ndee̱. Kó nga ngo nga ngo kui yáseé ngatꞌieé ngo ngindie. »Ngayeje ndi̱tsee̱n chjiéngá ńjño kortina̱ xi lino̱ xi ꞌniú nda kꞌuíchjáꞌyáni, kó jó metro̱ ko̱jo kan ún sentímetro̱ nga nkꞌa ka̱ma. Kó xtji̱e̱e̱n kje̱n kui ngi̱ndiee̱ yito metro̱ ńjño kortina̱ tꞌíjñíi̱ nga ngo nga ngo ndiè nínga bitjasꞌi̱e̱nni. Sꞌe̱ ki̱a̱ nínga bitjasꞌi̱e̱nni nijan metro̱ kortina̱ xi ńjño xi linoo̱ xi ꞌniú nda, ko̱jo ńjño xi koán, ko̱jo ńjño xi aso, ko̱jo ńjño xi iní tꞌíndée̱. Kui kortinaa̱ chjiéngá nda si̱ꞌan chji̱ni̱e̱ xi kꞌuijñaá, kó ki̱a̱ si̱ꞌankaꞌajo̱ nga nijón kui yáseé ko̱jo ngindiee̱. »Ngayeje yáseé chjiéngá kꞌuijñaá ni ńtsó ko̱jo ki̱cha̱tji̱ xi to̱ntiboa. Ngindiee̱ kui yáseé chjiéngá ki̱cha̱ bronse̱ ngatama, ko̱jo ki̱cha̱ xi ku̱i̱ndyianijín xi si̱ꞌankaꞌa ńjñoo̱ kui ndiꞌandikoón, ko̱jo ni xi kꞌuíchjáꞌyáni ndi̱tsee̱n ko̱jo ngayeje ni xi ka̱machjién kjiꞌanga si̱ꞌantsjaa̱ Néná.

Éksondo̱ 27:9 ပူးပေါင်းရင်းမြစ်များ

Xo̱jo̱n Salmoo̱ 100:4

Ti̱tjásꞌi̱e̱njnú nínga tikón nga̱ntjo̱a̱ Ndiꞌandikoón, ¡kó ti̱ꞌantsjàjnúu̱ nga ku̱i̱tjásꞌi̱e̱njnú ndi̱tsee̱n! Te̱ꞌéjnúu̱ ndokꞌóchji̱ì, kó ti̱ꞌantsjàjnúu̱ jaꞌeén.

Xo̱jo̱n Salmoo̱ 84:10

Ngatꞌa̱ ta̱sá nda ngase nga ngo ni̱xtjin kotíjña̱ an na̱ngo̱xi̱i̱, ta̱bo̱a̱jiín tsi ngo mi̱ ni̱xtjin kjin kotíjña̱ñaa. Ta̱sá kjo̱a̱ꞌajin an nga ki̱a̱ kotíjña̱ an nga̱ntjo̱a̱ Ndiꞌaa̱ Néna, ta̱bo̱a̱jiín nga ki̱a̱ kotíjña̱ an ndiꞌaa̱ nínga ndajín kjima.

Xo̱jo̱n Salmoo̱ 92:13

Ki̱a̱ kꞌuítji̱e̱ ki̱a̱ Ndiꞌaa̱ Néná, kó ki̱a̱ ko̱a̱ja̱a̱ naxó ki̱a̱ ndi̱tsen Néná.

Éksondo̱ 40:33

Nga jetꞌa, Moisee̱ íchjáꞌyá nga ngo foaꞌatjiyajoo̱n ndiꞌandikoón ko̱jo ṉchandikoón, kó ti̱ yején ńjño kortinaa̱ nínga bitjasꞌi̱e̱nni ndi̱tsee̱n. Ngije kamándo̱jo̱ó Moisee̱ nga iskjininkꞌa ndiꞌandikoón,

Éksondo̱ 40:8

Ngije síndo ngayeje nii̱ ngi̱ndiee̱, tꞌíchjéꞌyé ji nga ngo foaꞌatjiyajoo̱n ndiꞌandikoón, kósꞌe̱ tjin ji ńjño kortinaa̱ ki̱a̱ nínga bitjasꞌi̱e̱nni ndi̱tsee̱n.

Xki̱ 3:26

ko̱jo ńjño kortina̱ xi tji̱e̱n ndi̱tsee̱n nínga bitjasꞌi̱e̱nnii̱, ko̱jo ńjño kortina̱ xi tji̱e̱n nga̱ntjo̱a̱ xi tikón ndi̱tsee̱n nga ngo foaꞌatjiyajoo̱n ndiꞌandikoón, ko̱jo ṉchandikoón. Kó ti̱ kuí boá xi askoo̱n ńꞌniú xí kiniꞌánkjién nga ikjien kui ńjño kortinaa̱.

Xki̱ 4:26

ko̱jo ńjño kortinaa̱ ndi̱tsee̱n, ko̱jo ńjño kortinaa̱ nínga bitjasꞌi̱e̱nnii̱ ndi̱tsen xi foaꞌatjiyajoo̱n ndiꞌandikoón ko̱jo ṉchandikoón, ko̱jo ńꞌniuú, ko̱jo ngayeje ni xi machjién nga niꞌántsjána.

Xki̱ 4:32

Kó ti̱ kuí boá xi ko̱nkꞌá yásé xi chji̱a̱ni ndi̱tsen xi foaꞌatjiyajoo̱n ndiꞌandikoón, ko̱jo ngindiee̱ kui yáseé, ko̱jo yáyojó xi mindyianijiín, ko̱jo ńꞌniuú, ko̱jo ngayeje ni xi machjieén kjiꞌanga niꞌántsjána. Jí boá xi chjiéngá kꞌuiyé cha̱n cha̱a̱n nga ngo nga ngo ni xi chjiéngá ko̱a̱ꞌa̱.