Varumi 12:1 - KITABU KITAKATIFU

¹ Kunangwa mugoonyaa nu mwoyo gwosi ligali, avaamitu vange, kigira ovonene vwi zimbavasi zia Nyasaye ku kunyi, mwihaane munyi aveene ku Nyasaye kuli kisiuviriru keveeye mwoyo, kitakatifu kivugiliywi kandi chukuyaanziza Nyasaye. Yiyi niyio inzira yinyu ya giligali idukanaa kusigamira Nyasaye mu Roho.

Varumi 12:1 ပူးပေါင်းရင်းမြစ်များ

Zaburi 116:12

Nyara kuhaana ki ku Yahova, kigira uvulahi vwivwe vwosi ku inzi?

Zaburi 19:14

Makuva gange kandi zing'anagani ziange zivugiriki ku ivi, imbiri woovo, O, Yahova, uvuhaliru kandi mutungiri wange.

Isaya 56:7

“Ndamuleeta muduuki mu Ziyoni, kiguru change Kitakatifu, ndamuha uvusangari munyumba yange yilisaala, kandi ndavugilira visiuviliru vienyu via muhaanaa ku vwali vwange. Litembeli liange lilalangwa inyumba yilisaala ku vandu vi zihiiri ziosi.”

Jeremia 6:20

Simbugilira ku kimuli chamundetera kutura Sheba anoho ivindu vifunya umwayu kutura mukivala chihale mba? Sindavugilira zisadaka ziavo anoho sindayanzilira ivisiuviliru viavo mba.

Hosea 14:2

Mwirane ku Yahova na musaale lisaala yili kuye kuli kihanwa: “Ukusamihi uvwoni vwitu vwosi kandi uvugiliri lisaala lietu. Kunyi kulakwizominya kuli kumali kulaga.

Livalidza 7:21

kemoli kilala kigiriki, ligondi lilala limigu, ne kememe kilala kimigu chu muhiga mulala, vive kuli vihaanwa viu kusambwa.

Luka 7:47

Kunangwa, ngovolera, vuyanzi vonene vwa amali kumanyia vudinyirizaa ndi, uvwoni vwivwe vunyingi vumali kusamiifa. Navuzwa ku vosi umali kusamiifa hakekeke amanyia vuyanzi vokekeeke vuzwa.”

Varumi 12:2

Mutalonda miima ji lirova yili mba, navuzwa muleke Nyasaye amugirung'anyie munyore uvuhia mu vogeri nu muziganagani zienyu. Na ndio muladuuka kumanyiriza uvulariri vwa Nyasaye, kandi agaveeye malahi kandi gavugililwa kandi madukiru.

Varumi 15:16

nduuki kuva mutumikiri wa Yeso Kristo ku vandu vizihiiri. Ndumikaa kuli musaalisi mu lilwaza makuva malahi kutura ku Nyasaye, ku vandu vizihiiri vaduuki kuva isadaka ivugilirwa na Nyasaye, kandi kihanwa chatakaswa na Roho Mutakatifu.

Varumi 15:30

Kunangwa avaamitu vange, mugoonyaa ligali imbiri wo Mwami wiitu Yeso Kristo, kandi mu vuyanzi vwa Roho ahaanaa, muhambane harara ninzi mu lisaala nu mwoyo gwu vugulu ku Nyasaye.

Varumi 2:4

Anoho hawundi uchayaa zimbavasi zizie, uvwikuzihizi kandi uvwikuziri vwivwe. Ivi siumanyi ndi Nyasaye nuwizimbavasi kigira yivu vwenya koleta kuivi ligerizaa kukwimilira onyoore lieganira.

Varumi 6:13

Anoho mutaleki kali kevero kilala chi miviri jinyu kuva kiju cho kokora vudamanu nuvwoni mba. Navuzwa mwihaane ku Nyasaye kuli vandu vasimugukizwa kutura mu vakuzu, muhaane vivero vienyu viosi ku Nyasaye ku kivuni chuvulungi.

Varumi 6:16

Si mumanyi ndi lwa mwitulizaa aveene kuli vatugwa kuhulira mundu wundi, munyi muveeye ligali avatugwa vu munene wa muhulira oyo-munyala kuva avatugwa vu vwoni, navwo voleetaa likuza, anoho munyala kuva avatugwa vi lihulira ilimwimiliraa muduuki kokolwa avalungi imbiri wa Nyasaye.

Varumi 6:19

Hano moloma kuli mundu wa kase kigira vodedekere vwi liiva lienyu aveene. Ku ing'inga ndala mwihaana aveene ligali kutumikira uvudamanu kandi kifwavwi kigira uvudamanu. Navuzwa kalunu kuduuka mwihaane aveene ligali muve avatugwa vu vulungi kigira kivuni kitakatifu.

Varumi 9:23

Yenya kandi kuvuula vukumi vwivwe vunyingi vwaviikwa ku kunyi avakoveeye viju viu vukumi vwivwe, yavo avavetegekiza vanyoore vukumi vwivwe.

1 Vakorintho 1:10

Avaamitu vange, mugoonyaa ligali mu lieta liu Mwami wiitu Yeso Kristo ndi, vosi muvugilirizane aveene naveene mu goosi ga muvooraa, muve kindu kilala vosi kunangwa muvuli kuva ni liavukana hagati hinyu. Muhambane muve kindu kilala ligali mu zing'anagani kandi mu likalaga lilala.

2 Vakorintho 10:1

Inzi, Paolo, ovolwa kuva muhocha kandi umwegehizu nimbeeye harara ni munyi moni na moni, navuzwa mululu papapa lwa mbeeye ihale kutura ku munyi, ng'oonya munyi ligali nu mwoyo gwosi, ku vohocha novohooma vwa Kristo!

2 Vakorintho 4:1

Mu zimbavasi zia Nyasaye, umali kuhaana ku kunyi muyinzi yigu kokole, kulwayago, sikunyala kukuza mwoyo mba.

2 Vakorintho 4:16

Kigira kivuni yiki, kunyi sikukuzaa mwoyo mba. Navuzwa kali niiva liiva lietu lio muviri liguundaa galaha, liiva lietu liu mu Roho likolwa lihia kazozo.

2 Vakorintho 5:20

Kunyi koveeye avatumwa va Kristo; Nyasaye mwene atumikiraa kunyi kogoonya munyi. Kumugoonya mu vogono vwa Kristo, muhambanywe na Nyasaye.

2 Vakorintho 6:1

Kuli kunyi koveeye avayinziri harara na Nyasaye, kumugoonya mutumikiri vulahi zimbavasi zizie zia mumali konyoora.

Vafeso 4:1

Kunangwa, inzi oveeye muhambe kigira ndumikiraa Mwami, mugoonyaa mumenye kolondekana ni liiva lia Nyasaye yaviikaho lwa yamulanga.

Vafeso 5:10

Mugerizi kwiga agayaanziza Mwami.

Kwidzulitsa 14:2

Muveeye avandu vatovole va Yahova Nyasaye winyu. Kutura mu vandu vosi ku lirova, Yahova umali kotovola munyi muve avandu veve mwene.

Vafilipi 1:20

Ilikayirwa ni lisuuvirizwa liange linene liveeye ndi, inzi mburi kwononya miyinzi jange, navuzwa vuli kazozo mbitilira kalunu ndakave nu vuluviliri ligali, kunangwa mu liiva liange liosi ndakaleete uvukumi ku Kristo, kali niiva ndava mwoyo anoho nguzi.

Vafilipi 2:17

Hawundi amasahi gi livamwoyo liange gaduukanaa gasundulwi kuli kihanwa ku kisiuviriru chi lisuuvira lienyu lihaana ku Nyasaye. Niiva gaveeye ndio, inzi nyanza, kandi sangala harara ni munyi mwosi.

Vafilipi 4:18

Yee, mali konyoora ivindu viosi viamumali kuhaana ku inzi, kandi ni ivinyingi kuvita lienya liange. Mali kuvinyoora kuvitira mu amakono ga Epafurodita. Vihaanwa yivi viveeye kuli kihanwa kifunyaa umwayu umulahi ku Nyasaye; kandi viveeye isadaka indahi ivugilirwa nu kuyaanziza Nyasaye.

1 Vatesalonike 4:1

Mu limaliriza, avaamitu, viitu, mwigi kutura ku kunyi kuli gamuduukira komenya kunangwa muduuki kuyaanziza Nyasaye. Nindio mwamenyangi kandi kalunu kumugoonya nu kumwiganihiza mu lieta liu Mwami Yeso mumeede kokora ndio ligali.

1 Vatesalonike 4:10

kigira mukoraa likuva yilio ndio, kuyaanza avamwavo vosi avaveeye mu Makedonia mwosi, avaamitu viitu kunyi kumuzuva mumeede kokora ndio ligali.

1 Vatesalonike 5:12

Avaamitu viitu, kogoonya munyi muhaane luyali luduukanaa ku yavo avayinziraa hagati hinyu, ava mwimiliraa nukwigiza mu liiva liu Vukristayo.

Filemona 1:10

Kunangwa ngogonya ligali mu vogono vwa Onesimasi, oveeye mwana wange mu Kristo; kigira lwa mbeeye mu vuhambe, mali kuva baba weve mu roho.

Filemona 1:9

Navuzwa kigira nguyaanzaa, ngogonya vuzwa mu vogono yivwo. Ngolaa ndio kali nimbeeye Paolo, umutumwa wa Kristo Yeso kandi kalunu mbeeye umuhambe kigira oyo.

Vahebraina 13:22

Ng'onyaa munyi avaamitu vange, muhulirizi nu vwikuziri ku likuva lie lizuvwa yili, kigira ibarwa ya mung'odeye yiyi sieveeye indambi mba.

1 Petro 2:20

Mulava ni lizominywa ki niiva mulikuzira ilikuywa lidukanaa munyore kigira likora vudamanu? Navuzwa niiva mulikuzira mu vusaliri, kali nimumalikokola vulungi, Nyasaye alamugasiza.

1 Petro 2:5

Munyi muveeye, kuli amagina ga veeye mwoyo, agumbakiywi kuva Litembeli Litakatifu, kuva avasaalisi vatakatifu, avahaana ivihaanwa via Roho, ivivugilirwa imbiri wa Nyasaye mu Yeso Kristo.