Matayo 25:34 - KITABU KITAKATIFU

³⁴ Ma Mwami alakavoolere avaveeye ku mukono gwigwe umulungi, ‘Hambi munyi avaagasizwa na Baba wange munyore miandu ju vwami vwa mwalomberwa kutura lwi lirova liatanga.

Matayo 25:34 ပူးပေါင်းရင်းမြစ်များ

Zaburi 2:6

Yahova avoora, “Mali kwamiihiza mwami wandatovola, ku Ziyoni, kiguru change kitakatifu.”

Tsing'ano 11:17

Mundu oveeye ni zimbavasi, aveeye nuvukara, navuzwa noveeye mululu ulisaliriza.

Isaya 33:22

Kigira Yahova aveeye mukalagi wiitu; alakakohonyie.

Isaya 6:5

Inzi ndavoora, “O, vayaayi, kivi keveeye ku inzi! Choosi cha mboraa keveeye chu vwoni, kandi menyaa hagati havandu va vuli likuva liavo liveeye liuvwoni. Navuzwa mali kolola mwami, Yahova Wuvunyali!”

Isaya 9:7

Uvwami vwivwe vwi zinguru vulazizagilira kuviruka; uvwami vwivwe vulava ni mirembe kazozo. Alamiiha kuli mwami mu vogono vwu mwami Daudi. Zinguru zizie zilereda ku likalaga lirungi, kandi liagigali kutura kalunu kuduuka mihiga ni mihiga. Yahova Wuvunyali amali kusaavira kokora yaga goosi.

Danyeli 9:25

Uhuliri kandi umanye yaga, kutura ing'inga yi lilago liahaanwa liu kwumbaka vuhia lidaala lia Jerusalemi, kuduuka liza liu mwimiliri wa Nyasaye amali kotovola, mihiga 7 haali 7 jilakaviti. Jerusalemi ilakumbakwe uvuhia ni zinzira kandi lugaga lwi zinguru, kandi lilakasingili kumihiga 7 haali 62, navuzwa yiyi ilakave ing'inga yi kivi.

Zefania 3:15

Yahova umali koheriza kuhaana mageri ku munyi kandi umali kutuliza ho avasigu vinyu vosi. Yahova, mwami wa Isiraeli aveeye harara ni munyi; si mulava nu vuti kandi mba.

Matayo 13:35

Yakola yaga aduuki kutwekiza agu muporofeti yavoola, “Ndatumikira zing'ano ulwa inzi moloma kuvo; Ndavavolera ivindu vitamanyikani kutura lwi lirova lialombwa.”

Matayo 19:29

Navuzwa, ku yavo vosi avaleka zinyumba ziavo anoho avamwavo vaavo, anoho avavozo, anoho ava baba anoho avamama vaavo, avana, anoho milimi jaavo kigira inzi, valanyora ivindu haali mia, kandi valanyora imiandu je livamwoyo litahera mba.

Matayo 20:23

Yeso yavavolera, “Agiligali mulanwera mu kekombe change, navuzwa kwikala ku mukono mulungi anoho ku mukono mumosi gwange, siaveeye inzi uhaanaa mba. Navuzwa vwiyangu yivwo voveeye ku yavo, ava Baba wange yalombera.”

Matayo 21:5

“Muvoolere lidaala lia Jerusalemi, Henza, mwami woovo yazaa ku ivi! Aveeye muhooma kandi aniini ku isukiri, kemoli chibunda.”

Matayo 25:21

Mwami weve yamuvolera, ‘Okoli vulahi, umutugwa mulahi kandi umusuuvirifu. Walinda vulahi ivindu vikekeke; ndakuviika ove umulindi wi vindu ivinyingi. Hamba wingiri mu vusangali harara nu mwami woovo.’

Matayo 25:23

Mwami weve yamuvolera, ‘Okoli vulahi mutumiri mulahi, kandi umusuuvirifu. Waali umusuuvirifu ku vindu vikekeke; ndakuviika kulinda ivindu ivinyingi. Hamba wingiri usangale ninzi!’

Matayo 25:40

Mwami alakavativuliri, ‘Muvooleraa, choosi cha mwakolera mulala ku avamwavo vange avakeekeke yava, mwakolera inzi!’

Matayo 25:41

“Alakavoolere avaveeye ku mukono gwigwe mumosi, ‘Tuli ku hizi munyi avalaamwa na Nyasaye! Muzie mu muliru gwi mihiga ni mihiga ugwalomberwa Setani harara ni zingelosi veve!

Matayo 27:37

Higulu hu umutwi gwigwe vang'oda ho agavamuyalira kuli ndi, “UYU NIYIE YESO, UMWAMI WA VAYUDA.”

Matayo 3:2

“Mwiganiri, kigira Uvwami vwu mwigulu voveeye ahimbi.”

Matayo 5:19

Kunangwa, ku vosi ulivunaga lilago likekeeke ku goosi, nu kwigiza avandi vakole ndio, umwene oyo alakalangwe mukekeeke ligali mu Vwami vwu mwigulu. Navuzwa ku vosi uligakola nu kwigiza avandi, mwene oyo alakalangwe munene mu Vwami vwu mwigulu.

Marko 10:17

Lwa Yeso yaatanga logendo lwilwe, umundu mulala yanyagula nasigama imbiri weve, ma na muteeva, “Mwigizi mulahi, ngola ndi nduuki konyoora livamwoyo litahera mba?”

Marko 10:40

Navuzwa avaliikala ku mukono gwange mulungi anoho mumosi simbeeye nuvunyari kotovola nivwaha ulikala ku mukono gwange mulungi anoho mumosi mba. Ni Nyasaye ulihaana uvwiyangu yivu ku yavo ava yamala kwetegekizira.”

Luka 11:28

Yeso yamutivulira, “Yee, navuzwa vaveeye nuvugasu ligali kuvita, avahulira likuva lia Nyasaye, ma valilonda.”

Luka 11:50

Kunangwa likula yili lilakanyoole mageri kigira masahi gavaporofeti agasunduka kutura mulitanga lie lirova,

Luka 12:32

“Mutatia, munyi ichayo change kekekeeke! Baba winyu uyanziziywi kumuha Uvwami yivwo.

Luka 19:38

Vavoola, “Nyasaye agaasizi Mwami Munene uza mu lieta liu Mwami. Mirembe jive mwigulu, nu uvukumi vove mwigulu igulu ku Nyasaye!”

Yohana 1:49

Nazanieli yamutivulira, “Mwigizi, ivi niyie Mwana wa Nyasaye! Ivi oveeye Mwami wa Isiraeli!”

Yohana 12:13

Kunangwa vaavugura zisia zia makindu nivazia kumwaganira, nivakuba isango nivavoora, “Hosana! Agasizwi uyu uzaa mu lieta liu Mwami. Agasizwi Mwami wa Isiraeli.”

Yohana 17:24

“Baba! Nyenya, yava avu wamba vave harara nainzi ahambeeye, ku valore uvukumi vwange vwa wamba; ku lwukuva wanyanza imbiri wi kivala kikiri kolombwa.

Yohana 19:15

Navo vahanzuka, “Mu mwiti! Mu mwiti!” Pilato yavateva “Inzi mbambe mwami winyu?” Avasaalisi vanene vativura, “Kunyi sikoveeye nu mwami wundi natali Kaisari!”

Vikolwa 15:18

Nindio Mwami, uwakola vindu yivi vimanyikane kutura kale, avoora ndio.’

Vikolwa 3:26

Kunangwa, Nyasaye yatovola mutumikiri weve naamutuma kutanga ku munyi amugasizi ku likora samulala ku munyi agirung'ane kutura muzinzira zizie ziu vudamanu.”

Varumi 8:17

Na kigira koveeye avana va Nyasaye, kulanyoola imiandu josi ja Nyasaye yavikira avandu veve, kulasanga harara na Kristo miandu ja Nyasaye; kigira nikuva nikusanga mu vusaliri vwa Kristo, kulasanga kandi mu vukumi vwivwe harara.

1 Vakorintho 15:50

Kunangwa muvooleraa yaga avaamitu vange, inyama na masahi sivinyala konyoora vwami vwa Nyasaye mba; kandi vwoneku sivunyala konyoora vutaveeye uvwoneku mba.

1 Vakorintho 2:9

Navuzwa kuli Mang'oda Matakatifu gavoora, “Kindu chu mundu yavula kolola anoho kuhulira, kindu chu mundu yavula kuganagana kilekoleka, nicho kindu zana cha Nyasaye, yeetegekizira yavo ava muyanzaa.”

1 Vakorintho 6:9

Si mumanyi ndi vandu vachamu sivalinyoola vwami vwa Nyasaye? Mutagadwa mba! Avandu vamenyaa mu kifavwi cho voheyi, avasigamiraa misaambwa, anoho avaheyi, malaya masaaza anoho avasaza vagonaa avasaza vache,

Vagalatia 5:21

likendeka, vwiti, uvuhambiku, uvuhuvaali vwi zing'ano ziosi, ni vindu kuli yivio; ndanga kumwiganihiza lero kuli lwa ndaamwiganihiza maziambiri. Yava avakolaa vindu kuli yivi sivanyala konyoora vwami vwa Nyasaye mba.

Vafeso 5:5

Kigira yaga muve nilimanya ligali ndi, umuheyi woosi anoho utaveeye munifu mu miima, muhuvaali, wi vifananyi mukayirwi, siaveeye nilisanga mu vwami vwa Kristo kandi vwa Nyasaye mba.

1 Vatesalonike 2:12

Kwa muluviriza nu komuleminya umwoyo muduuki kumenya nokogenda mu liiva liyaanziza Nyasaye, uwamulanga muduuki kusanga mu vwami nu vukumi vwivwe.

Vahebraina 1:14

Kunangwa zingelosi nivwaha? Vaveeye vatumwa vatumikira Nyasaye, kandi vatumwa na Nyasaye, kuzia kokonya avandu vaadukana vanyoore vohonyi.

Vahebraina 11:16

Navuzwa kuli gaveeye, veegomba kivala kilahi ligali, nacho keveeye kivala chu mwigulu; kigira yaga, Nyasaye siaveeye esoni ku yavo kumulanga Nyasaye wavo, kigira uvalombeeye lidaala linene.

Vahebraina 4:3

Kunyi avakumali kusuuvira, konyoora vosoosi zana yivwo, vwa Nyasaye yasuuviriza. Gaveeye kuli yavoola, “Ndaali nu vutima ma ninomba lisuuviriza lie liesuuha ndi, ‘Sivalakingiri mu kivala cha ndakavaheye vosoosi vwange mba!’ ” Yavoola yaga kali niiva miyinzi jije jaali nijatwekizwa kutura lwa yalomba lirova.

Vahebraina 9:26

galava ndio, ngano Kristo yaali yakasaliyi haali kanyingi kutura lirova nililombwa. Mu vogono yivwo kalunu lwi zing'inga ziesunda ko keheri, umali kololeka lulala vuzwa kandi lwu kumaliriza, kutuliza vwoni kuvitira mu liehaana mwene kuli kisiuviriru.

Yakobo 2:5

Muhuliri, avaamitu vange avayaanze! Nyasaye yatovola avadaka vu mukivala vave avatugi mu lisuuvira, kandi vanyoore vwami vwa yasuuviriza yavo ava muyanzaa.

1 Petro 1:9

kigira munyoora ovohonyi vwi mioyo jinyu; Yiki nicho ekeveeye kivuni kenene chi lisuuvira lienyu muye.

1 Petro 3:9

Mutatung'ana uvudamanu ku vudamanu, anoho ikilaamo ku kilaamo; nitali muvasavili vugasu, yaga goosi gatuungwi nu vugasu, kigira uvugasu nivwo vwa Nyasaye yamulaga lwa yamulanga.

Likunula 13:8

Avandu vosi avamenyaa mu lirova valakisigamira, nivatali avamita gaavo gang'odwa mu kitabu chi livamwoyo chu Mwana wi Ligondi witwa; kutura lirova nilikikiri kolombwa.

Likunula 17:8

Iking'ang'a cha walola kila chaali mwoyo maziambiri, navuzwa sikeveeye mwoyo kalunu mba. Kandi keveeye ahimbi kutura mu gehena, navuzwa kiladuuka mu lidivizwa. Avandu vamenya ku lirova, ava amita gaavo gatang'odwa mu kitabu chi livamwoyo, lirova nilikikiri kolombwa, valagenya muno ulwa valora king'ang'a yicho chaali mwoyo lulala ulwimbiri na kalunu sikeveeye mwoyo mba. Navuzwa kilaloleka kandi.

Likunula 19:16

Ku iganza yeeye nu ku litango lilie, kwaali nikong'odeywe ilieta “Mwamihi wa avamihi, kandi mwami wa avami.”

Likunula 21:7

Mundu woosi uliguuta alakanyoole imiandu yiji kutura ku inzi: Inzi ndava Nyasaye weve, naye alakave umwana wange.

Likunula 5:10

Ivi umali kuvakola vave vami kandi avasaalisi kutumikira Nyasaye wiitu, kandi valamiha ku lirova.”