Lwimbu lwa Solomoni 1:5 - KITABU KITAKATIFU

⁵ O, avakali va Jerusalemi, inzi mbeeye ni ligondo limwamu, navuzwa mulahi ligali, mbeeye mumwamu kuli lihema lia Kedari, navuzwa mbeeye mulahi ligali kuli zisuka munyumba ya Solomoni yu vwami.

Lwimbu lwa Solomoni 1:5 ပူးပေါင်းရင်းမြစ်များ

Zaburi 120:5

Komenya hagati hinyu koveeye vudamanu ligali kuli komenya mu Mesheki anoho komenya hagati havandu va Kedari.

Zaburi 149:4

Yahova ayaanzizwa na vandu veve. Ahaanaa uluyali ku vahocha kigira liguuta liavo.

Zaburi 45:9

Avakaana va vami vaveeye valala ku vakali vinyumba yooyo vuluyali kandi mukali wu mwami usingiyi ku mukono gugwo mulungi; niyiviiki liesiaha lie zahabu indahi ligali.

Zaburi 90:17

O, Yahova Nyasaye wiitu, leka uvugasu vuvwo vove ku kunyi. Okohe liguuta ni ligasizwa mu vindu viosi via kokora!

Lwimbu lwa Solomoni 2:14

Ivi oveeye kuli likuulu lievisaa mu zimbangaywa zia magina. Leka ndore mumoni mumwo kandi mbuliri mwoyo gugwo; Kigira mwoyo gugwo goveeye mulahi ligali, kandi mumoni mumwo muveeye mwuvuyaanzi.

Lwimbu lwa Solomoni 2:7

Mundage, O, avakali va Jerusalemi mwisuuhi, kulieta lie visusu kandi ku lieta lie zimbongo ziu muvulimu, ndi si mulagoyanyia vuyanzi vwitu mba.

Lwimbu lwa Solomoni 3:10

Miguliru ja lio jakunikwa ni ifeza. Vwidiliru vwalombwa ni zahabu, na vwikaliru vwalio vwakunikwa ni zinguvu ziu muzambarao, zianavwa vulahi navakari va Jerusalemi.

Lwimbu lwa Solomoni 3:5

Mundage O, vakali va Jerusalemi, mwisuuhi, kulieta lievisusu kandi kulieta lie zimbongo ziu muvulimu; ndi simulagoyanyia uvuyanzi vwitu mba.

Lwimbu lwa Solomoni 4:3

Munwa gugwo goveeye kuli luvusi lwakanyu, goveeye mulahi ligali lwo molomaa. Zisaya zizio zing'ereng'ana inyima wi suka yooyo.

Lwimbu lwa Solomoni 5:16

Limoloma lilie liveeye lilahi ligali, vindu viosi kuye viyanziza. Avakali va Jerusalemi, uyu nu muyanze wange kandi nu mulina wange.

Lwimbu lwa Solomoni 5:8

Munyi vakali va Jerusalemi, musuuvirizii; niiva mulanyola muyanze wange, mumuvolere ndi mbeeye mudedekere kigira vuyanzi.

Lwimbu lwa Solomoni 6:4

Muyanze wange ivi oveeye mulahi ligali kuli Jerusalemi, 2 oveeye mulahi ligali kuli lidaala linene lia Tiriza. Ogendaa ni kivigu kuli muganda gwi liihi ne bendera yaavo imbiri.

Lwimbu lwa Solomoni 8:4

Musuuvirizii, munyi vakali va Jerusalemi ndi simulagoyanyia vulina vwitu mba.

Isaya 21:16

Maku Yahova yambolera, “Mu muhiga mulala, ovonene vwi ihiiri ya Kedari vuladuuka ku keheri.

Isaya 53:2

Vwali uvulariri vwa Yahova ndi umutumikiri weve aduuki kuviruka kuli kitagwa kedoto ikihilaa imiri hasi mu kivala chumu. Siyaali nuvukumi anoho ligondo lilahi, okokora kunyi kumukayirwi mba. Sichali ho ni kindu kuye chukuyaanziza, sichali ho ni kindu ichakakungusi kunyi kuye mba.

Isaya 60:7

Chayo cha amagondi goosi ga Keda kandi Nebaiozi; galaletwa ku munyi kuli visiuviliru, kandi galahaanwa ku vwali kuyaanziza Yahova. Yahova alalomba Litembeli lilie kuva liu vukumi ligali kuvita maziambiri.

Isaya 61:10

Avandu va Jerusalemi vasangala kigira aga Yahova amali kokora. vaveeye kuli mwiha yiviiki kigira keserero chiche. Nyasaye yamukunika novohonyi kandi nuvuguuti.

Ezekieli 16:14

Mwamanyikana mu vuli ihiiri kigira vulahi vwinyu vwuvuduukiru, kigira ndaamukora kuva avukuyaanzilira ligali.” Yaga nigo ga Yahova Wuvunyali avoora.

Ezekieli 27:21

Avandu va Arebia na aviimiliri vosi va Kedari vaali avakiranyi vinyu avamwayaanzilira mu likiranyia lie vimeme, amagondi amakole kandi zimburi.

Matayo 10:25

Gaduukiraa umwigi ave kuli mwigizi weve, nu mutugwa kuli mutugi weve. Niiva valangi mwene nyumba Belizebuli, na valalanga ndi avandu vinyumba yeeye? Avandu vandi si valalangwa amita amadamanu mbitilira mba!

Matayo 22:11

“Lwu mwami yingira kolola avageni, yanyoora mundu mulala uwavula kwivika inguvu ye keserero.

Luka 13:34

“O, vayaye munyi avandu va Jerusalemi! Ivi Jerusalemi, wita avaporofeti, nulasa amagina avatumwa va Nyasaye atumaa ku ivi! Ndayeenyaa kuvungiza harara avana vovo kuli engoko ivungizaa viminyu viayo muzimbaha ziayo haali kanga, navuzwa munyi simwa mbugilira!

Luka 15:22

Navuzwa baba weve yavolera avatumikiri veve: ‘Koli vwangu! Leeti inguvu indahi mumuviiki kandi muviiki ebede ku kedete chiche ni ivilatu mu virenge vivie.

Varumi 13:14

Navuzwa muvuguli viugi viu Mwami Yeso Kristo, kandi muleke kuganaganyia iliiva lienyu liu vwoni liukwigutiza likayirwa liavwo.

2 Vakorintho 5:21

Kristo siyali nuvwoni mba, navuzwa Nyasaye yamulomba kusanga muvwoni vwitu, kunangwa kunyi kuduuki kusanga mu vulungi vwa Nyasaye muye.

Vagalatia 4:26

Navuzwa lidaala lia Jerusalemi yu mwigulu liveeye livoholore, kandi liveeye mama wiitu.

Vafeso 5:26

Yakola yaga aduuki kulitakasa ku Nyasaye ni likuva lilie, lwa mali kulinihiza na amazi

1 Yohana 3:1

Heenzi vuyanzi vwa Baba amali kuhaana kunangwa kuduuki kulangwa avana va Nyasaye! Nindio koveeye. Yiki nicho kivuni kigira vandu vumukivala nivavula kukumanya; kigira sivamanya Nyasaye mba.