Ezekieli 8:3 - KITABU KITAKATIFU

³ Kelombe yiki chanyiira mukono nigudiila liisu ku mutwi gwange. Maku mu malola yaga Roho wa Nyasaye yang'inga igulu mwigulu niyambila mu Jerusalemi. Yambira mugati mwuvwingiliru vwa Ivaale vwi Litembeli, ahikifananyi chukuvihiliriza ku Nyasaye chaali.

Ezekieli 8:3 ပူးပေါင်းရင်းမြစ်များ

1 Avami 18:12

Galava ki niiva Roho wa Yahova gulakuvugula gukuhili kuduuka havundu hatamanyikani, nonoho lwa mba nindula? Maku, lwambolera Ahabu ndi oveeye hano ma avuli kukonyoola, alaanzita. Wizulizi ndi ndaasigamira Yahova kutura mu vosooleri vwange.

2 Avami 16:14

Uvwali vwu mugasa uvwaviikwa halovega kigira uvutumiki vwa Yahova vwali hagati hu vwali vuhia ni Litembeli, kunangwa Ahazi yavusunda ku lovega lwa ivaale wu vwali vwivwe vuhia.

2 Avami 2:16

ni vavoola, “Koveeye hano avasaza vi zinguru amusini. Leka kuzie kukwenyera munene woovo. Hawundi Roho wa Yahova umugingi nu kumusigisa ku kiguru kilala anoho mu livona lilala.” Elisha yativura “Awa, mutazia mba.”

2 Avami 21:7

Yavika kifananyi chu munyasaye wi kikali Ashera mu Litembeli, ahimbi na ha vundu ha Yahova yaali navoleeye Daudi kandi muyaayi weve, Solomoni: “Hano mu Jerusalemi, mu Litembeli yili, halava havundu hamali kotovola kutura mu kivala choosi chi zihiiri komi na mbiri zia Isiraeli kuli havundu hanyala kusigamirwa.

Zaburi 78:58

Vaavihiliriza Nyasaye nuvwaali vwavo vwu kusigamira misambwa, kandi vamukendekiza nivifananyi viavazwa viavo.

Kutwula 20:4

“Mutelomberi vifananyi vie kindu choosi mwiligulu anoho chuku lirova, anoho chu mumazi musi mwi lirova mba.

Kutwula 20:5

Mutinamiri nukusigamira kifananyi choosi mba, kigira Inzi mbeeye Yahova Nyasaye winyu kandi simbugilira avanyasaye vandi mba. Mbana amageri ku yavo avandunyira kandi ku visukululwi viavo kuduuka ku likula lia kavaga kuduuka ni lia kane.

Kutwula 34:14

“Mutasigamiri umunyasaye wundi mba kigira Inzi, Yahova, mbeeye Nyasaye wokokendeka.

Jeremia 32:34

Kali vaviika vifwananyi viavo viu kuvihiliriza mu Litembeli liumbakwa kigira lisigamira, kandi vamali kuliononyia.

Jeremia 7:30

“Avandu vi Ivuyuda vamali kokora vindu vidamanu imbiri wange. Vamali kuviika vifananyi viavo via inzi ndasuura mu Litembeli liange kandi vamali kuliononyia.

Ezekieli 1:1

Ku lidiku lia katano ku mweli gwa kane mu muhiga gwa salasini, Inzi Zacheli musaalisi, mwana wa Buzi, ndaamenya harara na Vayuda vahaminywa ahimbi nu mugera gwa Kebari mu kivala cha Babiloni. Ligulu liakunuluka, na ndaalora malola ga Nyasaye.

Ezekieli 10:3

Vakerubi vaali nivasiingiyi Isavaalu wi Litembeli lwu mundu uyu yingilamu. Kandi amalesi gakunikaa mugizi gwu mugati gwi Litembeli.

Ezekieli 11:1

Roho wa Nyasaye yang'inga igulu kandi nambira mu kirivwa chi Ivugwi chi Litembeli. Hene yaho ahimbi nikilivwa ndaalora avasaza 25, harara na Jaazania mwana wa Azuri, Pelatia mwana wa Benaya na aviimiliri vaviri vi kivala.

Ezekieli 11:24

Mu amalola, roho wa Nyasaye yang'inga igulu kandi niyanziranyia inyima ku vandu vaali nuvuhambe mu Babiloni. Maku malola gatulizwaho,

Ezekieli 2:9

Kandi lwa ndahenza, ndaalora mukono nigunyiriywi kuuza ku inzi, gwaali nigoveeye nilikaradasi liamang'oda;

Ezekieli 3:12

Maku Roho wa Nyasaye yang'inga igulu, kandi ndaahulira inyima wange muhuumu munene gwu mwoyo ugovolaa ndi, “Uvukumi vwa Yahova mwigulu igulu vwizominywe!”

Ezekieli 3:14

Roho yang'inga igulu ma mambila ihale, kandi ndaazia mu vululu nu vutima, zinguru zia Yahova ziali na inzi.

Ezekieli 37:1

Ndaahulira zinguru zinene zia Yahova, kandi Roho weve yambugura nambira indangu mu livona uwi vigumba viali niviizura.

Ezekieli 40:2

Mu malola, Nyasaye yambira mu kivala cha Isiraeli ma niyaambika ku kiguru kitambi. Ndaalora zinyumba imbiri wange zialoleka kuli Lidaala linene.

Ezekieli 43:5

Maku Roho wa Yahova yaali ku Inzi, kandi yambira mu mugizi gwu mugati, na ndaalora uvukumi vwa Yahova nivwizuyi mu Litembeli.

Ezekieli 43:8

Avandu va Isiraeli harara na vami vaavo valomba oloze lwavo kandi vigutu viavo vie miliango ahimbi no loze lwange kandi vigutu vie miliango ji Litembeli liange, kunangwa hatigale vuzwa ni lidigi hagati hange navo. Vonogonyia lieta liange Litakatifu ni vindu viu kuvihiliriza via vaakora. Ku lwayago, ndavadiviza mu vutima vwange uvululu.

Ezekieli 5:11

“Kulwayago, kuli inzi mbeeye Nyasaye oveeye mwoyo, Mwami Munene Yahova, kigira mumali kwonogonyia Litembeli liange ni vindu vidamanu kandi ni vindu viukuvihiliriza, ndatuliza liyaanzilira liange ku munyi. Si ndamuhonyia mba kandi si ndamuvererera zimbavasi mba.

Ezekieli 7:20

Maziambiri velola kigira magina gaavo guvuguli, navuzwa vaagatumikila kolomba vifananyi viukuvihiliriza. Kulwayago inzi ndavikola kuva ivindu kitaveeye vinifu kuvo.

Ezekieli 8:5

Nyasaye yambolera, “Mwana wu Mundu, henza kolovega lwa Ivaale.” Ndahenza, na ndaalora kifananyi chaali chukuvihiliriza ku Nyasaye ahimbi nu vwali mu vwingiliru vwi kirivwa.

Ezekieli 9:2

Nonoho avasaza sita vaza kutura kunzira ya higulu, kulovega lwi kirivwa cha Ivaale. Vuli mulala kuvo yaali nagingi ichugi. Harara navo, yaliho nu mundu uwaali niyiviiki inguvu yu luvaala, kandi nagiingi kindu chu kong'odera. Vosi vaza nivasingila ha vwali vwu mugasa.

Danyeli 10:10

Maku mukono gwangimira kandi gusingiriza kumalu na makono gange, ningedegera.

Danyeli 10:18

Oyo waloleka kuli mundu ya ndiraa kandi yamba zinguru.

Danyeli 5:5

Nonoho mukono gwu mundu gwa loleka kandi ni gutanga kong'oda kulidigi munyumba yu vwami halovega hu vulavu vwi taya vwaka vunyingi. Mwami yalora mukono lwa gwang'odaa.

Vikolwa 8:39

Lwa vaatura mu mazi, Roho wu Mwami yavugula Filipo vwangu, kiziri oyo si yamulola kandi mba, navuzwa yaazizagilira nologendo lwilwe ni yizuuyi uvusangari.

Kwidzulitsa 32:16

Lisigamira vanyasaye vandi liakendekiza Yahova, vudamanu vwavo vwakola Nyasaye kuva nu vutima.

Kwidzulitsa 32:21

Harara nifananyi viavo, vamali kongola mbe nu vutima, vamali kungola kokendekela vanyasaye vaavo vanyasaye vataveeye vagiligali kunangwa, ndatumikira ihiiri kuvakola vave nu vutima, Ndavakora vandekele ihiiri yavandu vasiru.

Kwidzulitsa 4:24

kigira Yahova Nyasaye winyu aveeye kuli muliru gusambaa. Aveeye Nyasaye we likendeka.

Kwidzulitsa 5:9

Mutinamiri vifananyi ku viosi anoho mukisigamiri mba, kigira Inzi mbeeye Yahova Nyasaye winyu, mbeeye Nyasaye wilikendeka uhaanaa mageri ku vana kigira vwoni vwa vababa vaavo. Mbana amageri ku yavo avandunyira kandi ku ivisukulurwi viavo kuduuka ku likula lia kavaga kandi lia kane.

Kwidzulitsa 6:15

Nimusigamira avanyasaye vandi, uvutima vwa Yahova vulaaka ku munyi kuli muliru na gulamudiviza ligali, kigira Yahova Nyasaye winyu oveeye hagati hinyu siavugiliraa vandu vahing'ana naye mba.

Joshua 24:19

Joshua yavolera avandu zana, “Navuzwa mutaganagani ndi voveeye vodoto kutumikira Yahova mba. Aveeye Nyasaye Mutakatifu. Yenya mumusigamiri yeng'ine. Niiva musigamira avanyasaye vandi, sialamusamiiha uvwoni vwinyu mba.